မြန်မာနိုင်ငံကနေ တရုတ်ပြည်သူ့သမ္မတနိုင်ငံထံ ငါးတန်တင်ပို့တဲ့အခါမှာ ငါးမျိုးစိတ်တူညီမှု မရှိလို့ ယနေ့အချိန်အထိ တင်သွင်းခွင့်မရသေးကြောင်း မြန်မာနိုင်ငံ ငါးလုပ်ငန်းအဖွဲ့ချုပ်မှ သိရပါတယ်။ မြန်မာနိုင်ငံက တရုတ်ပြည်သူ့သမ္မတနိုင်ငံထံ မွေးမြူရေးငါးတန် တစ်ကြိမ်မှ တင်ပို့ခဲ့တာဖူးမရှိပေမယ့် တရုတ်နိုင်ငံရဲ့ မှတ်ပုံတင်စာရင်းမှာ မြန်မာနိုင်ငံမှ ငါးတန်မျိုးစိတ်ကို Pangasius Bocourti (ပန်ဂဆီးယပ် ဘိုကူတီ)လို့ ဖော်ပြထားပြီး အဲ့ဒီမျိုးစိတ်သာ တင်သွင်းရမယ်လို့  သတ်မှတ်ထားကြောင်းသိရပါတယ်။ ဒါပေမဲ့ မြန်မာနိုင်ငံမှာ တကယ်မွေးမြူနေတဲ့ ငါးတန်မျိုးစိတ်က Pangasius Hypothalmus (ပန်ဂဆီးယပ် ဟစ်ပိုသာလမက်စ်) သာဖြစ်ပြီး မျိုးစိတ်ကွဲလွဲနေမှုကြောင့် ယခုအချိန်အထိ  တရုတ်နိုင်ငံထံ တင်သွင်းခွင့်မရသေးဘူးလို့ သိရပါတယ်။ ဆော်ဒီအားရေးဗျနိုင်ငံကလည်း မြန်မာနိုင်ငံကနေ မွေးမြူရေးငါးနှင့် ပုစွန်တင်သွင်းခွင့်ကို ယခုနှစ်အတွင်းမှာပဲ ပိတ်ပင်လိုက်ပြီး ဈေးကွက်ဝယ်လိုအားလျော့ကျလာတာကို မွေးမြူရေးလုပ်ငန်းရှင်တွေနဲ့အတူ ရေထွက်ပစ္စည်းတင်ပို့နေတဲ့ ပို့ကုန်လုပ်ငန်းရှင်တွေပါ ရင်ဆိုင်နေပါတယ်။

ဒါကြောင့် ငါးတန်စားသုံးမှုဈေးကွက်ကြီးတဲ့ တရုတ်ပြည်သူ့သမ္မတနိုင်ငံထံ ငါးတန်တင်ပို့ပြီး ဈေးကွက်ဖောက်ဖို့ ကြိုးစားပေမယ့် မျိုးစိတ်ကွဲလွဲမှုကြောင့် တင်သွင်းခွင့်မရသေးတာက ဈေးကွက်ဆုံးရှုံးမှုတစ်ခုဖြစ်တယ်လို့ လုပ်ငန်းရှင်တွေကပြောပါတယ်။ ငါးလုပ်ငန်းဦးစီးဌာနကတော့ မြန်မာနိုင်ငံမှာ အမှန်တကယ်မွေးမြူနေတာ Hypothalmus (ဟစ်ပိုသာလမက်စ်) မျိုးစိတ်ဖြစ်ကြောင်း တရုတ်ပြည်သူ့သမ္မတနိုင်ငံ Certification and Accreditaion Administration (CNCA) အစိုးရအဖွဲ့ထံ ဒီရက်ပိုင်းအတွင်း စာပို့သွားမယ်လို့ သိရပါတယ်။

မြန်မာနိုင်ငံမှာ မွေးမြူနေတဲ့ ငါးတန်ရဲ့ ခုနစ်ဆယ်ရာခိုင်နှုန်းက Hypothalmus (ဟစ်ပိုသာလမက်စ်) မျိုးစိတ်ဖြစ်ပြီး ကျန်ရှိတဲ့ သုံးဆယ်ရာခိုင်နှုန်းကတော့ Bocourti(ဘိုကူတီ) မျိုးစိတ်တွေဖြစ်တယ်လို့သိရပါတယ်။ ဘိုကူတီမျိုးစိတ်က ဗီယက်နမ်မျိုးရင်းဖြစ်ပြီး ကြံ့ခိုင်မှုအားနည်းကာ ရောဂါကျရောက်လွယ်တာကြောင့် မြန်မာနိုင်ငံမှာ ၂၀၀၀ပြည့်နှစ်နှောင်းပိုင်းတည်းက ဟစ်ပိုသာလမက်စ်မျိုးစိတ် ငါးတန်တွေကိုသာ အစားထိုးမွေးမြူနေတာပါ။ လက်ရှိ အခြား ပြည်ပနိုင်ငံတွေကိုတင်ပို့နေတဲ့ ငါးတန်မျိုးစိတ်ကလည်း ဟစ်ပိုသာလမက်စ် မျိုးစိတ်တွေသာ တင်ပို့နေတာ ဖြစ်ပါတယ်။

 

 

Related News