လယ်သမားတွေအတွက် စိုက်ပျိုးစရိတ်ချေးငွေလုံလောက်စွာရရှိဖို့နဲ့ ဘဏ်ချေးငွေနဲ့ လယ်ယာသုံးစက်ပစ္စည်းရောင်းချမှုတွေမှာ ကွာဟာချက်တွေရှိလို့ ပြန်လည်တွက်ချက်စိစစ်သွားမယ်လို့ ရန်ကုန်တိုင်းဒေသကြီးအစိုးရအဖွဲ့က စက်တင်ဘာ(၁ရ)ရက်က ရန်ကုန်တိုင်းဒေသကြီးလွှတ်တော်မှာ ပြောကြားလိုက်ပါတယ်။ရန်ကုန်တိုင်းဒေသကြီးအတွင်းရှိ လယ်သမားတွေအနေနဲ့ စိုက်ပျိုးစရိတ်ချေးငွေ လုံလောက်မှုမရှိတာ၊ လူတစ်ဦးကို (၁၀)ဧကနဲ့အထက် ဧကတွေအတွက် ချေးငွေမရရှိတာ၊ ဘဏ်ချေးငွေနဲ့ လယ်ယာသုံး စက်ပစ္စည်းရောင်းချမှုတွေမှာလည်း ပစ္စည်းရွေးချယ်စရာ နည်းပါးတာနဲ့ ဈေးနှုန်းကွာဟမှုတွေရှိတာ စတဲ့ အခြေအနေတွေရှိနေလို့ ဒုတိယအကြိမ် ရန်ကုန်တိုင်းဒေသကြီးလွှတ်တော် သတ္တမပုံမှန်အစည်းအဝေး တတိယနေ့မှာ ကွမ်းခြံကုန်းမြို့နယ် မဲဆန္ဒနယ် အမှတ်(၂)  တိုင်းဒေသကြီးလွှတ်တော်ကိုယ်စားလှယ် ဦးအောင်မင်းမင်း က ပြောပါတယ်။  ဒါ့ကြောင် စိုက်ပျိုးစရိတ်ချေးငွေ လုံလောက်စွာရရှိဖို့ တွက်ချက်ထားတဲ့စနစ် အဆင်သင့်ရှိ/မရှိ၊ တောင်သူလယ်သမားတွေ အတွက် ပိုမိုလွယ်ကူစေပြီး နိုင်ငံတော်မှ ငွေကြေးဆုံးရှုံးမှုနည်းနိုင်သော စနစ်မျိုး ပြုပြင်ပြောင်းလဲဖို့၊ နှစ်ရှည်ချေးငွေတွေကို  နိုင်ငံတော်အဆင့်မှဖြစ်စေ သက်ဆိုင်ရာပြည်နယ်နှင့်တိုင်းဒေသကြီးတွေအလိုက်ဖြစ်စေ ပြည်တွင်းပြည်ပ ဈေးကွက်တွေနဲ့ ချိတ်ဆက်လုပ်ဆောင်ဖို့ အစီအစဉ်ရှိ/မရှိ တိုင်းဒေသကြီးလွှတ်တော်မှာမေးမြန်းခဲ့တာပါ။


ဘဏ်ချေးငွေနဲ့လယ်ယာသုံးစက်ပစ္စည်းရောင်းချမှုတွေနဲ့ ပတ်သက်လို့ ရန်ကုန်တိုင်းဒေသကြီးစီမံကိန်းနှင့် ဘဏ္ဍာရေးဝန်ကြီးကဦးမြင့်သောင်းက  လယ်ယာဖွံ့ဖြိုးရေးဘဏ်မှ တာဝန်ရှိသူများနဲ့ ပစ္စည်းတင်ထားတဲ့ သက်ဆိုင်ရာကုမ္ပဏီများကိုခေါ်ယူပြီး ဈေးနှုန်းပြန်လည် သတ်မှတ်ညှိနှိုင်းပေးမယ်လို့ ပြောကြားခဲ့ပါတယ်။ စိုက်ပျိုးစရိတ်ချေးငွေနဲ့ပတ်သက်လို့ လက်ရှိမှာ သင့်တင့်တဲ့ နှုန်းနဲ့ စိုက်ပျိုးစရိတ်ကာမိစေဖို့ လုပ်ကွက်ငယ်တောင်သူတွေကို ဦးစားပေးမူဝါဒအရ (၁)ဧက ကနေ(၁၀)ဧကအထိ ပိုင်ဆိုင်တဲ့ တောင်သူတွေကို မိုး/ဆောင်း စပါးတစ်ဧက ကျပ်(၁၅၀၀၀၀)နှုန်းနဲ့ ပုံစံ(၇)မူရင်းကို အပေါင်ရယူပြီး ထုတ်ချေးပေးနေတယ်လို့ ဆိုပါတယ်။ စိုက်ပျိုးစရိတ်ချေးငွေလုံလောက်စွာ ရရှိဖို့ကိုတော့ ပြန်လည်တွက်ချက်စိစစ်ရမှာဖြစ်ပြီး စိစစ်ဖို့လိုအပ်ချက်တွေကို ပြည်ထောင်စုအစိုးရ စီမံကိန်းနှင့် ဘဏ္ဍာရေးဝန်ကြီးဌာနကို တင်ပြပေးသွားမယ်လို့  ၀န်ကြီးက ပြောကြားပါတယ်။


မြန်မာ့လယ်ယာဖွံ့ဖြိုးရေးဘဏ်ဟာ စပါး၊ ပဲမျိုးစုံ၊ ဆီထွက်သီးနှံ၊ ချက်ကြံစသည့် သီးနှံတွေအတွက် စိုက်ပျိုးစရိတ်ချေးငွေ တစ်ဧကနှုန်းထားတွေကို နှစ်အဆက်ဆက်တိုးမြှင့်ထုတ်ချေးပေးခဲ့ပြီး ၂၀၀၉-၂၀၁၀ မှာ စပါးတစ်ဧက ကျပ် (၁၀၀၀၀)နှုန်း၊ အခြားသီးနှံတစ်ဧကကျပ်  (၆၀၀၀)နှုန်း၊ ချက်ကြံ တစ်ဧက(၆၀၀၀)နှုန်း ထုတ်ချေးရာကနေ  (၂၀၁၇ -၂၀၁၈) ဘဏ္ဍာနှစ်မှာ  စပါးတစ်ဧက ကျပ်(၁၅၀၀၀၀)နှုန်း၊ ဆီထွက်သီးနှံပဲမျိုးစုံ (၅၀၀၀)နှုန်း၊ ချက်ကြံ တစ်ဧက (၁၀၀၀၀၀)နှုန်း တိုးမြှင့်ထုတ်ချေးပေးတယ်လို့ သိရပါတယ်။  ၂၀၁၇-၂၀၁၈ ဘဏ္ဍာရေးနှစ်ကစပြီး နှစ်တို၊ နှစ်ရှည်ချေးငွေ (၃)နှစ် (၃)ရစ်၊ (၅)နှစ် (၅)ရစ်နဲ့ လယ်ယာသုံးစက်ကိရိယာများဝယ်ယူဖို့၊ လယ်ယာစီးပွားလုပ်ငန်းတွေ၊ ဆန်စက်၊ ဆီစက်တည်ဆောက်ပြုပြင်မွမ်းမံဖို့၊ မွေးမြူရေးလုပ်ငန်းတွေလုပ်နိုင်ဖို့အတွက် ထုတ်ချေးပေးနေပြီး လယ်ယာသုံး စက်ကိရိယာအတွက် ချေးငွေစီမံကိန်းတွေမှာ ပါဝင်ဖို့ ကုမ္ပဏီတွေက ဘဏ်ရုံးချုပ်သို့ လာရောက် ဆက်သွယ်မှတ်ပုံတင်ထားရှိတာတွေရှိတယ်လို့လည်း သိရပါတယ်။

 

 

Related News