ဗဟိုဘဏ်က ပြည်တွင်းစီးပွားရေးလုပ်ငန်းများကို ပို့ကုန်၊ သွင်းကုန်ဆိုင်ရာ ကူးသန်းရောင်းဝယ်ရေး ဘဏ်ဝန်ဆောင်မှုပေးနိုင်ရန် နိုင်ငံခြားဘဏ် ဘဏ်ခွဲများတိုးချဲ့ခွင့်ပြုခဲ့ပြီး ချေးငွေထုတ်ချေးခွင့် စတင်ခွင့်ပြုလိုက်ပါတယ်။ ခွင့်ပြုပြီး တစ်ပတ်အကြာ နိုဝင်ဘာလ(၁၄)ရက်က ဗဟိုဘဏ်သတင်းစာရှင်းလင်းပွဲမှာ ချေးငွေအတိုးနှုန်းကို တရားဝင်သတ်မှတ်ခဲ့ပါတယ်။ နိုင်ငံခြားဘဏ်တွေအနေနဲ့ ပြည်တွင်းစီးပွားရေးလုပ်ငန်းများကို ငွေချေးပါက ဒေါ်လာနဲ့ ငွေထုတ်ချေးမှုတွင် နိုင်ငံတကာဈေးကွက်မှာ ပေါ်ပေါက်နေတဲ့ အတိုးနှုန်းအတိုင်း ချေးရမှာဖြစ်တယ်လို့သိရပါတယ်။

ကျပ်ငွေဖြင့်ချေးမယ်ဆိုပါက ဗဟိုဘဏ်က ပြည်တွင်းဘဏ်များကို သတ်မှတ်ထားတဲ့အတိုင်း အတိုးနှုန်းကန့်သတ်ချက်ဘောင် (၈)ရာခိုင်နှုန်းကနေ (၁၃)ရာခိုင်နှုန်းအတွင်းသာ ချေးရမှာဖြစ်တယ်လို့  မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဦးစိုးသိန်းက အဆိုပါ သတင်းစာရှင်းလင်းပွဲမှာ ပြောကြားခဲ့တာပါ။အခုလိုသတ်မှတ်လိုက်ခြင်းအားဖြင့် နိုင်ငံခြားဘဏ်တွေက မြန်မာကျပ်ငွေလိုအပ်ချက်ကို ပြည်တွင်းဘဏ်တွေမှတစ်ဆင့် ချေးနိုင်ခြင်း၊ ပြည်တွင်းဘဏ်များနဲ့ ပူးပေါင်းပြီး ကျပ်ငွေလိုအပ်ချက်ကို ဖြည့်ဆည်းနိုင်ခြင်း၊ နိုင်ငံခြားဘဏ်ပိုင် ဒေါ်လာများကို ရောင်းချခြင်းအစရှိတဲ့ နည်းလမ်းတွေကို ဆောင်ရွက်နိုင်မှာဖြစ်တယ်လို့သိရပါတယ်။

ဒါ့အပြင် ယခုကဲ့သို့ နိုင်ငံခြား ဘဏ်လုပ်ငန်းများကိုခွင့်ပြုပေးခြင်းအားဖြင့် သွင်းကုန်လုပ်ငန်းရှင်များအတွက် လိုအပ်တဲ့ နိုင်ငံခြားငွေကို ဖြည့်ဆည်း ပေးနိုင်မှာဖြစ်ပြီး အပေါင်ပစ္စည်းမဲ့ ငွေချေးခြင်းစနစ်မှာပါ အားကောင်းလာမှာ ဖြစ်တယ်လို့ ဗဟိုဘဏ်ရဲ့ ဒုတိယ ဥက္ကဋ္ဌ ဦးဘိုဘိုငယ်က အခုလို ပြောကြားခဲ့ပါတယ်။ပြည်ပဘဏ်များကို ငွေချေးခွင့်နဲ့ အခြားသော ဘဏ်ဝန်ဆောင်မှုများကို ပေးတယ်ဆိုပေမယ့်လည်း ဘဏ်ဝန်ဆောင်မှု သုံးစွဲသူတစ်ဦးချင်းမှ အပ်ငွေအပ်ခြင်း၊ ငွေလွှဲခြင်း စတာတွေကို ခွင့်ပြုမှာမဟုတ်ဘူးလို့ သိရပါတယ်။

ဗဟိုဘဏ်က နိုင်ငံခြားဘဏ်(၁၃)ဘဏ်ကို (၂၀၁၅)ခုနှစ်နဲ့ (၂၀၁၆)ခုနှစ်တွင် တရားဝင် ဘဏ်ခွဲဖွင့်လှစ်ခွင့် ပေးခဲ့ပြီး (၂၀၁၇)ခုနှစ် နှစ်ကုန်ပိုင်းမှာ ပို့ကုန်လုပ်ငန်းနဲ့ ဆက်စပ်တဲ့ ၀န်ဆောင်မှုကို ခွင့်ပြုခဲ့ကာ ပြည်တွင်းစီးပွားရေးလုပ်ငန်းများကို ငွေချေးခြင်းနဲ့ အခြားသော ဘဏ်ဝန်ဆောင်မှုပေးခြင်းတို့ကိုတော့ ယခုနှစ် နိုဝင်ဘာလ(၈)ရက်က စတင်ခွင့်ပြုခဲ့တာဖြစ်တယ်လို့ အဆိုပါ သတင်းစာရှင်းလင်းပွဲမှ သိရပါတယ်။ 

 

 

Related News