တရုတ်နိုင်ငံကို မွေးမြူရေးငါး၊ ပုစွန် ရေထွက်ကုန်အသစ်တွေ တင်ပို့ဖို့ မြန်မာနိုင်ငံဘက်က ကြိုးစားနေပြီး အောင်မြင်ခဲ့ရင် တရုတ်နိုင်ငံကို မွေးမြူရေး ရေထွက်ကုန် ပထမဆုံးအကြိမ် တင်ပို့ခွင့်ရရှိမှာဖြစ်ပါတယ်။ မြန်မာနိုင်ငံကနေ တရုတ်နိုင်ငံကို သဘာဝရေထွက်ကုန်၊ ပင်လယ်ငါးတွေ တင်ပို့နေခဲ့တာ ဆယ်စုနှစ်ချီနေပြီဖြစ်ပါတယ်။ ဒါပေမဲ့ ပြည်တွင်းမှာ စီးပွားဖြစ်မွေးမြူနေတဲ့ မွေးမြူရေးငါး၊ ပုစွန်တွေကို တင်ပို့ခွင့်ရဖို့ ယခုအချိန်မှ အခွင့်အရေးရခဲ့တာဖြစ်ပါတယ်။ တရုတ်ပြည်သူ့သမ္မတနိုင်ငံ  အကောက်ခွန်ဆိုင်ရာ အထွေထွေအုပ်ချုပ်ရေးဦးစီးဌာန (GACC) ရဲ့ခွင့်ပြုချက်အရ တရုတ်နိုင်ငံကို ထပ်မံတင်ပို့လိုတဲ့ ရေထွက်ကုန်အမျိုးအစားအသစ် (၂၁)မျိုးစာရင်းကို ဇွန်လ (၂၇) ရက် တင်ပို့ခဲ့ပါတယ်။

အဲ့ဒီ ရေထွက်ကုန်အမျိုးအစားအသစ်တွေက ငါးပြေမ၊ ငါးသိုင်းခေါင်းပွ၊ ငါးရံ့၊ ငါးကြင်းဖြူ၊ ငါးခူ၊ ရွှေဝါငါးကြင်း၊ ၊ ငါးကျည်း၊ ငါးမြစ်ချင်း၊ ပုစွန်ဖြူ၊ ရေချိုပုစွန်ထုတ်ကြီး၊ ငါးဖယ်၊ ငါးနုသန်း (၂) မျိုး၊ ငါးတန် (၃) မျိုး၊ ရေငန်ပုစွန်ကြား၊ ငါးမြင်း၊ ငါးဂျောင်းနဲ့ ဘီလားတို့ပါဝင်ပါတယ်။ GACC က အဲ့ဒီစာရင်းကို  စိစစ်ပြီး ခွင့်ပြုခဲ့ရင်တော့   တရုတ်ကို မွေးမြူရေးရေထွက်ကုန်တွေ ပထမဆုံးအကြိမ် တရားဝင် တင်ပို့ခွင့်ရမှာ ပဲဖြစ်ပါတယ်။ တရုတ်နိုင်ငံဘက်ကို ပေးပို့ထားတဲ့စာရင်းမှာ ငါးတန်နဲ့ဗနားမားပုစွန်ဖြူတို့လည်းပါဝင်ပြီး ဒီရေထွက်ကုန်တွေက ယခုနှစ်တွေအတွင်းမှာ တရုတ်ဘက်ကို တင်ပို့ခဲ့ပေမယ့် ငြင်းပယ်ခံထားရတဲ့ ရေထွက်ကုန်တွေဖြစ်ပါတယ်။

တရုတ်နိုင်ငံကလည်း သူတို့နိုင်ငံရဲ့ အကောက်ခွန်ဆိုင်ရာ စာရင်းမှာ မပါဝင်လို့ ငြင်းပယ်ခဲ့တာဖြစ်ပါတယ်။ ဒါကြောင့် မြန်မာဘက်ကနေ တရားဝင် တင်ပို့ခွင့်ရအောင် GACC ကို စာရင်းတွေ တင်ပို့ခဲ့တာဖြစ်ပါတယ်။ ယခုလကုန်မှာတော့ တရုတ်နိုင်ငံကို အရင်ကတည်းက တင်ပို့နေတဲ့ ရေထွက်ကုန်အမျိုးအစား (၁၀၀) ကျော်ကို စိစစ်ပြီး GACC ကို ထပ်မံပေးပို့သွားမယ်လို့သိရပါတယ်။ 

 

 

Related News