ရန်ကုန်တိုင်းဒေသကြီး၊ အင်းစိန်မြို့နယ်၊ အောက်မင်္ဂလာဒုံလမ်းမကြီးမှာတည်ရှိတဲ့ ရတနာဂဟေဆက်နည်းပညာသင်တန်းကျောင်း (အောင်ဆန်း)မှာ အမှတ်စဉ် (၁၁)အတွက် သင်တန်းသား/သင်တန်းသူ (၁၅) ဦးကို လက်ခံသွားမှာဖြစ်တယ်လို့ သိရပါတယ်။ရတနာဂဟေဆက်နည်းပညာသင်တန်းကျောင်း(အောင်ဆန်း)ဟာ ပညာရေးဝန်ကြီးဌာနလက်အောက်မှာရှိတဲ့ နည်းပညာ၊ သက်မွေးပညာနှင့် လေ့ကျင့်ရေးဦးစီးဌာနနှင့် တိုတယ်မြန်မာရတနာစီမံကိန်းတို့ပူးပေါင်းဖွင့်လှစ်ထားတာ ဖြစ်ပါတယ်။

လက်ရှိမှာတော့  သင်တန်းသား/သင်တန်းသူ အသစ်တွေကို လက်ခံသွားမှာဖြစ်ပြီး နိုင်ငံပိုင်သတင်းစာတွေကမှ တစ်ဆင့်လျှောက်လွှာဖောင်တွေကို ခေါ်ယူခဲ့တာဖြစ်ပါတယ်။ လျှောက်လွှာဖောင်တွေ ကိုတော့ ဇူလိုင်လ (၂၂)ရက်မှ စတင်လက်ခံနေတာဖြစ်ပြီး သြဂုတ်လ (၉) ရက်အထိ နောက်ဆုံးထားလျှောက်ထားရမှာဖြစ်ပါတယ်။ သင်တန်းတက်ရောက်လိုတဲ့ သင်တန်းသား/သင်တန်းသူတွေအနေနဲ့ အခြေခံပညာအလယ်တန်းအောင်မြင်ပြီး ကျန်းမာရေးကောင်းမွန်သူ၊အသက်(၁၈)နှစ်မှ (၃၅)နှစ်အထိရှိသူတွေ လျှောက်ထားနိုင်တယ်လို့ သိရပါတယ်။

သြဂုတ်လ (၁၄)ရက်မှာတော့ လျှောက်လွှာတင်ထားတဲ့သူတွေကို လူတွေ့စစ်ဆေးသွားမှာဖြစ်ပြီး  သင်တန်းတက်ရောက်ခွင့်ရရှိသူ တွေကိုတော့ သြဂုတ်လ(၁၅)ရက်မှာ ကြေညာပေးသွားမှာဖြစ်ပါတယ်။အခုလို ဂဟေဆက်သင်တန်းတွေကိုဖွင့်လှစ်ပေးရတာက အရည်အချင်းပြည့်ဝတဲ့ ဂဟေဆက်ကျွမ်းကျင်သူတွေကိုမွေးထုတ်ပေးနိုင်ရန်၊ ဂဟေဆက်ခြင်းနဲ့ပတ်သက်ပြီး လုပ်ငန်းခွင်အတွင်းမှာ အလုပ်အကိုင်အခွင့်အလမ်းတွေကို ရရှိစေရန် ၊ဂဟေဆက်လုပ်ငန်းများတွင် လုံခြုံစ်ိတ်ချရမှုများ မြင့်မားလာစေရန်စတဲ့ ရည်ရွယ်ချက်တွေနဲ့ဖွင့်လှစ်မှာဖြစ်တယ်လို့သိရပါတယ်။

ရတနာဂဟေဆက် နည်းပညာသင်တန်းကျောင်း (အောင်ဆန်း)မှာ အခြေခံဂဟေဆက်နည်း (၃)မျိုးကို(၃)လကြာ သင်ကြားပေးနေတာဖြစ်ပြီး အဆင့်မြင့် ပိုက်ဂဟေဆက်သင်တန်းကိုလည်း (၃)လကြာ သင်ကြားပေးမှာဖြစ်ပါတယ်။လက်ရှိမှာ သင်ကြားနေတဲ့ အမှတ်စဉ်(၁၀)မှာတော့ အခြေခံဂဟေဆက်သင်တန်းမှာ သင်တန်းသား/သူ (၁၅) ဦးသင်ကြားနေတာဖြစ်ပြီး အဆင့်မြင့် ပိုက်ဂဟေဆက် သင်တန်းမှာတော့ သင်တန်းသား/သင်တန်းသူ (၁၀) ဦး တက်ရောက်သင်ကြားနေတယ်လို့ သိရပါတယ်။

 

 

 

Related News