စင်္ကာပူနိုင်ငံ Singapore International Foundation (SIF) ၊ Singapore Health Services (Sing health )နဲ့ ရန်ကုန်ပြည်သူ့ဆေးရုံကြီး တို့ပူးပေါင်းပြီး ပြုလုပ်တဲ့ ထိခိုက်ဒဏ်ရာရရှိမှုမှ ပြန်လည်သန်စွမ်းရေးဆိုင်ရာ ကျန်းမာရေးစောင့်ရှောက်မှု စီမံကိန်းကို သြဂုတ်လ (၃၁)ရက်က ရန်ကုန်မြို့ ပြည်သူ့ဆေးရုံကြီးမှာ ပြုလုပ်ခဲ့ပါတယ်။မြန်မာနိုင်ငံမှာရှိတဲ့ဆေးရုံတွေမှာ ဆေးကုသမှုခံယူနေတဲ့လူနာအများစုက ယာဉ်မတော်တဆမှု၊အထပ်မြင့်တွေကနေ ပြုတ်ကျမှု၊လုပ်ငန်းခွင်အတွင်းမှာ ထိခိုက်မှုတွေကြောင့် ဒဏ်ရာရရှိသူများပြားလာတယ်လို့သိရပါတယ်။ ရန်ကုန်ပြည်သူ့ဆေးရုံကြီးမှာ လက်ရှိထိခိုက်ဒဏ်ရာနဲ့ သက်ဆိုင်တဲ့ ဆေးကုသမှုခံယူတဲ့ လူနာတွေက နေ့စဉ်ပျှမ်းမျှ အယောက်(၃၀)ရှိပြီး ထိခိုက်ဒဏ်ရာကုသမှုဌာနမှာတော့ နေ့စဉ် ပျှမ်းမျှ လူဦးရေ (၂၀၀)ကို ကုသမှုခံယူနေတယ်လို့သိရပါတယ်။

အခုပြုလုပ်တဲ့ ထိခိုက်ဒဏ်ရာရရှိမှုမှ ပြန်လည်သန်စွမ်းရေးဆိုင်ရာ ကျန်းမာရေးစောင့်ရှောက်မှုစီမံကိန်းကို (၃)နှစ်ကြာ ပြုလုပ်သွားမှာဖြစ်ပါတယ်။ ပြည်တွင်းမှာရှိတဲ့ ကျန်းမာရေး စောင့်ရှောက်မှုပညာရှင်တွေက လူနာတွေကို ပြန်လည်သန်စွမ်းရေး အကဲဖြတ်မှု၊ဆေးကုသမှုအပိုင်းတွေမှာ နောက်ဆုံးပေါ်ကုသနည်းစနစ်တွေ၊ လက်တွေ့သင်ကြားပြသမှုတွေပါဝင်မှာဖြစ်တယ်လို့သိရပါတယ်။ဒီစီမံကိန်းမှာ မြန်မာနိုင်ငံက ကျန်းမာရေးစောင့်ရှောက်မှုပေးနေတဲ့ပညာရှင် (၁၈၀)ခန့်ကိုသင်တန်းပို့ချပေးမှာဖြစ်ပြီး (၃)နှစ်တာ ကာလမှာ လူနာဦးရေ (၃)သောင်းဝန်းကျင်ကို အကျိုးပြုနိုင်မယ်လို့သိရပါတယ်။ ဒီစီမံကိန်းမှာ ရန်ကုန်ပြည်သူ့ဆေးရုံကြီး၊ အမျိုးသားပြန်လည်သန်စွမ်းရေး၊ မြောက်ဥက္ကလာပအထွေထွေရောဂါကုဆေးရုံ၊ ရန်ကုန်အရိုးအထူးကုဆေးရုံ၊ မန္တလေးအထွေထွေရောဂါကုဆေးရုံ၊ ဆေးတက္ကသိုလ် (၁)နဲ့ ဆေးတက္ကသိုလ် (၂) ရန်ကုန်တို့ပါဝင်တယ်လို့သိရပါတယ်။

 

 

Related News