ပြီးခဲ့တဲ့ ဖေဖော်ဝါရီလက ရန်ကုန်တိုင်းမှာ ဝက်သက်ရောဂါကပ်အသွင်ဖြစ်ပွားခဲ့လို့ မြို့နယ် (၇)ခုမှာ ဝက်သက်ကာကွယ်ဆေး အစုလိုက်ထိုးနှံပေးခဲ့ပြီး ကာကွယ်ဆေးလွှမ်းခြုံမှု (၈၉) ရာခိုင်နှုန်းရရှိခဲ့တယ်လို့ သိရပါတယ်။ဝက်သက်၊ ဂျိုက်သိုးကာကွယ်ဆေးကို ဖေဖော်ဝါရီ(၁၇) ရက်ကစပြီး လှိုင်သာယာ၊ အင်းစိန်၊ မင်္ဂလာဒုံ၊ ရွှေပြည်သာ၊ ဒဂုံမြို့သစ် (တောင်ပိုင်း)၊ ဒဂုံမြို့သစ် (အရှေ့ပိုင်း)နဲ့ ဒဂုံဆိပ်ကမ်းစတဲ့ မြို့နယ်တွေက အသက်ကိုးလကနေ ၁၅ နှစ်အရွယ်ကလေးတွေကို အစုလိုက်ထိုးနှံပေးခဲ့တာပါ။ ဒီလို ထိုးနှံပေးခဲ့တဲ့နေရာမှာ မြို့နယ်၊ ရပ်ကွက်အုပ်ချုပ်ရေးမှူးရုံးတွေက လူဦးရေစာရင်းအပြင် ကျန်းမာရေးဝန်ထမ်းတွေက မြေပြင်ကွင်းဆင်းပြီး ရွှေ့ပြောင်းနေထိုင်တဲ့သူတွေကို ရှာဖွေထိုးနှံပေးခဲ့ပါတယ်။ ဒါကြောင့် ကာကွယ်ဆေးလွှမ်းခြုံမှုက ၈၉ ရာခိုင်နှုန်းကျော် ရရှိခဲ့ပြီး အောင်မြင်မှုရှိတယ်လို့သိရပါတယ်။

ဝက်သက်ကာကွယ်ဆေးအစုလိုက် ကာကွယ်ဆေးထိုးနှံမှုမှာ အသက်ကိုးလကနေ ၁၅ နှစ်အရွယ် ကလေးငယ်ခြောက်သိန်းခန့်ကို ထိုးနှံပေးဖို့ ရည်ရွယ်ထားပြီး ကလေးငယ် ငါးသိန်းရှစ်သောင်းခန့်ကို ထိုးနှံပေးနိုင်ခဲ့ပါတယ်။ ဝက်သက်၊ ဂျိုက်သိုးကာကွယ်ဆေးကိုတော့ မြို့နယ် ဒေသန္တရဆေးခန်း၊ ကျေးလက်ကျန်းမာရေးဌာနတွေအပြင် ကျေးရွာ၊ရပ်ကွက်တွေထဲအထိ ကွင်းဆင်းထိုးနှံပေးခဲ့ပါတယ်။ မြန်မာနိုင်ငံမှာဖြစ်ပွားနေတဲ့ ဝက်သက်ရောဂါလူနာရဲ့ ငါးဆယ်ရာခိုင်နှုန်းက ရန်ကုန်တိုင်းမှာဖြစ်ပွားနေတာဖြစ်ပြီး မြို့နယ် (၇)ခုမှာ ဝက်သက် ကပ်ရောဂါအသွင်ဖြစ်ပွားခဲ့လို့ ကာကွယ်ဆေးအစုလိုက်ထိုးနှံခဲ့ရတာဖြစ်ပါတယ်။ လာမယ့် ၂၀၁၉ အောက်တိုဘာမှာလည်း ဝက်သက်ကာကွယ်ဆေးကို တစ်နိုင်ငံလုံးအတိုင်းအတာနဲ့ ထိုးနှံပေးသွားမယ်လို့သိရပါတယ်။

 

 

Related News