ဝက်သက်ကာကွယ်ဆေး အစုလိုက်ထိုးနှံခဲ့တဲ့ (၇) မြို့နယ်ထဲမှာ လှိုင်သာယာမြို့နယ် ပါဝင်ခဲ့ပြီး အဆိုပါမြို့နယ်ရှိ ရွှေ့ပြောင်းနေထိုင်သူမိသားစုထဲမှ ကလေးတွေကို  GIS နည်းပညာသုံးကာ ဖော်ထုတ်ပြီး ကာကွယ်ဆေး ထိုးနှံပေးခဲ့တယ်လို့သိရပါတယ်။GIS နည်းပညာက မြေပြင်ကွင်းဆင်းကာ သတင်းအချက်အလက်ရယူတဲ့ စနစ်ဖြစ်ပြီး ရွှေ့ပြောင်းနေထိုင်သူဦးရေများတဲ့ လှိုင်သာယာမှာ ဒီစနစ်ကို အသုံးပြုကာ ဆေးထိုးနှံရမယ့် ကလေးတွေကို ဖော်ထုတ်ခဲ့တာပါ။ လှိုင်သာယာက ရွှေ့ပြောင်းနေထိုင်သူဦးရေအများဆုံးမြို့နယ်ဖြစ်ပြီး အဲ့ဒီလူဦးရေတွေရဲ့ စာရင်းကို အတိအကျ ကောက်ခံဖို့ကလည်း မလွယ်ကူပါဘူး။ ဒါကြောင့် GIS နည်းပညာ အသုံးပြုကာ လက်လှမ်းမမီတဲ့ လူဦးရေတွေကို ဖော်ထုတ်ခဲ့တာဖြစ်ပြီး သန်းခေါင်စာရင်းထဲက လူဦးရေထက် နှစ်ဆကနေ လေးဆအထိ များတဲ့ အသက် ကိုးလကနေ ၁၅ နှစ်အရွယ်ကလေးတွေကို ကာကွယ်ဆေးထိုးနှံပေးနိုင်ခဲ့ပါတယ်။

ဒီလို ရှာဖွေ ထိုးနှံပေးနိုင်ခဲ့တာကြောင့် လှိုင်သာယာမြို့နယ်မှာ ကာကွယ်ဆေးလွှမ်းခြုံမှု ရာခိုင်နှုန်းအားကောင်းခဲ့ပြီး (၇) မြို့နယ်ရဲ့ ဝက်သက်ကာကွယ်ဆေး လွှမ်းခြုံမှုကလည်း (၈၉) ရာခိုင်နှုန်းကျော်အထိ ရရှိခဲ့ပါတယ်။ မြေပြင်စာရင်းရရှိဖို့ ကျန်းမာရေးဝန်ထမ်းတွေကိုယ်တိုင် တစ်မြို့နယ်လုံး ကွင်းဆင်းကာ ရွှေ့ပြောင်းသူတွေနေထိုင်တဲ့ ကျူးကျော်တဲ၊ စက်ရုံမြေကွက်လပ်စတဲ့ နေရာကို GIS မှာ မှတ်သားတာတွေ ဆောင်ရွက်ခဲ့ရတာဖြစ်ပါတယ်။ ဒီနည်းပညာကို အသုံးပြုပြီး ကာကွယ်ဆေးထိုးနှံပေးခဲ့မှုက ပထမဆုံးအကြိမ်ဖြစ်ပြီး ယူနီဆက်ဖ်နဲ့ ဂါဗီတို့ က နည်းပညာနဲ့ငွေကြေးကို ပံ့ပိုးပေးတာဖြစ်ပါတယ်။

 

 

Related News