ရန်ကုန်တိရစ္ဆာန်ဥယျာဉ်မှ တိရစ္ဆာန်များကို နေ့စဉ်ကျန်းမာရေးစောင့်ရှောက်မှု စစ်ဆေးပေးလျက်ရှိပါတယ်။ ရန်ကုန်တိရစ္ဆာန်ဥယျာဉ်မှာ တိရစ္ဆာန်အကောင်ရေ ထောင်ကျော်ရှိပြီး အဆိုပါတိရစ္ဆာန်တွေရဲ့ ကျန်းမာရေးအတွက် နေ့စဉ် ကျန်းမာရေးစစ်ဆေးပေးခြင်း အားဆေးတိုက်ကျွေးခြင်းတို့ကို ပြုလုပ်ပေးနေတာပါ။ ဒေါက်တာထွန်းမြင့်ကတော့ ရန်ကုန်တိရစ္ဆာန် ဥယျာဉ်မှာ တာဝန်ယူဆောင်ရွက်နေတာ နှစ်ပေါင်းနှစ်ဆယ်ကျော်နေပြီဖြစ်ပါတယ်။ တိရစ္ဆာန်တွေရဲ့ ကျန်းမာရေးစောင့်ရှောက်မှုကို ဆောင်ရွက်ရာမှာ အပိုင်းနှစ်ပိုင်းခွဲခြားထားပါတယ်။

ကြိုတင်ကာကွယ်တဲ့ အပိုင်းနဲ့ ရောဂါကုသတဲ့ အပိုင်းဆိုပြီး ခွဲခြားကုသပေးနေ တယ်လို့ သိရပါတယ်။ နေ့စဉ်မနက်(၇)နာရီဆို တိရစ္ဆာန်ရုံတွေအားလုံးကို လှည့်လည်ကြည့်ရှုစစ်ဆေးပြီး မနက်(၉)နာရီမှာတော့ ကြီးကြပ်တာဝန်ခံတွေ တင်ပြလာတဲ့ တိရစ္ဆာန်တွေရဲ့ ကျန်းမာရေးအခြေအနေကို ထပ်မံကြည့်ရှုပေးရတယ်လို့ ရန်ကုန်တိရစ္ဆာန် ဥယျာဉ်မှ တာဝန်ခံဆရာဝန် ဒေါက်တာထွန်းမြင့်က ပြောပါတယ်။ရန်ကုန်တိရစ္ဆာန်ဥယျာဉ်ထဲက အန္တရာယ်ရှိတဲ့သတ္တ၀ါတွေကို ဆေးကုသတဲ့အခါမှာ အလွန်သတိထားရပြီး ဆရာဝန်တစ်ယောက်ထဲ မကိုင်တွယ်ဘဲ အဆိုပါအကောင်တွေရဲ့ အနီးကပ်ကြီးကြပ်တာဝန်ခံတွေနဲ့အတူ ဆေးကုသပေးတာတွေကို လုပ်ဆောင်ရတယ်လို့ သိရပါတယ်။

အကောင်ကြီးအမျိုးအစားတွေဖြစ်တဲ့ ကျား၊ ခြင်္သေ့တို့မှာဖြစ်တဲ့ ရောဂါတွေကို ကုသတဲ့အခါမှာ  အတွေ့အကြုံသစ် တွေ ရရှိတယ်လို့ ရန်ကုန်တိရစ္ဆာန်ဥယျာဉ်မှ တာဝန်ခံဆရာဝန် ဒေါက်တာထွန်းမြင့်က ပြောပါတယ်။ရန်ကုန်တိရစ္ဆာန်ဥယျာဉ်မှာ တိရစ္ဆာန်အမျိုးအစားပေါင်း (၁၃၂)မျိုးရှိပြီး အကောင်ရေပေါင်း (၁၅၀၀)၀န်းကျင်ရှိပါတယ်။ အဆိုပါ တိရစ္ဆာန်လေးတွေကို အားဆေးတိုက်ကျွေးတဲ့အခါမှာ အကောင်ကြီးအမျိုးအစားတွေဆို နေ့စဉ်စားသုံးနေတဲ့ အစားအစာထဲမှာ ထည့်ကျွေးပြီး အခြားအကောင်သေးတွေကိုတော့ အားဆေးသီးသန့်တိုက်ကျွေးရတယ်လို့ သိရပါတယ်။

 

 

Related News