လာမယ့်(၂၀၁၈)ခုနှစ်မှာ တက္ကသိုလ်ဝင်တန်းစာမေးပွဲကို ၀င်ရောက်ဖြေဆိုမယ့် အမြင်အာရုံချို့တဲ့ သူတွေ အနေနဲ့ အင်္ဂလိပ်စာ၊ သချာင်္ဘာသာရပ်တွေမှာ အခက်အခဲကြုံတွေ့နေရတယ်လို့ သိရပါတယ်။ ရန်ကုန်မြို့ ခ၀ဲခြံမျက်မမြင်ကျောင်းမှာ လာမယ့် (၂၀၁၈)ခုနှစ်မှာ တက္ကသိုလ်ဝင်တန်းစာမေးပွဲကို ၀င်ရောက်ဖြေဆိုမယ့် ကျောင်းသား၊ ကျောင်းသူ(၇)ဦးရှိပါတယ်။ အမြင်အာရုံချို့တဲ့သူတွေအတွက်ကတော့ ၀ိဇ်္ဇာဘာသာတွဲ ဘာသာရပ်ကို ၀င်ရောက်ဖြေဆိုကြမှာဖြစ်ပါတယ်။
 
အမြင်အာရုံချို့တဲ့သူတွေအနေနဲ့ ကျက်ဖြေရတဲ့ဘာသာတွေဖြစ်တဲ့ မြန်မာစာ၊ ပထ၀ီ၊ သမိုင်းစတဲ့ဘာသာရပ်တွေမှာတော့ အခက်အခဲ မရှိပေမယ့် အင်္ဂလိပ်စာနဲ့ သချာင်္ဘာသာရပ်တွေအတွက်တော့ အခက်အခဲရှိနေတယ်လို့ ကာယကံရှင် ကျောင်းသားတွေက ပြောကြပါတယ်။ခ၀ဲခြံမျက်မမြင်ကျောင်းမှာ တက္ကသိုလ်ဝင်တန်းကို သင်ကြားပေးတဲ့ဆရာမတွေအနေနဲ့လည်း အမြင်အာရုံချို့တဲ့သူကျောင်းသား၊ ကျောင်းသူတွေကို သင်ကြားရတဲ့အခါမှာ အခက်အခဲတော့ နည်းနည်းရှိပေမယ့် ကျက်စာသင်ရတဲ့အပိုင်းမှာတော့ အခက်အခဲမရှိဘူးလို့ သင်ကြားရေးအပိုင်းမှာ တာဝန်ယူတဲ့ဆရာမတစ်ဦးက ပြောပါတယ်။
 
အမြင်အာရုံချို့တဲ့သူကျောင်းသားကျောင်းသူတွေအပါအ၀င် မသန်စွမ်းကျောင်းသား ကျောင်းသူတွေ အတွက် တက်္ကသိုလ်ဝင်တန်းစာမေးပွဲဖြေဆိုချိန်ကို ပုံမှန်သုံးနာရီထက် မိနစ်(၃၀) အပိုပေးထားတယ်လို့ သိရပါတယ်။ ဒါ့ပေမယ့်လည်း အမြင်အာရုံချို့တဲ့သူတွေအတွက်ကတော့ မိနစ်သုံးဆယ်အပိုပေးထား တာဟာ သချာင်္ဘာသာရပ်မှာတော့ အခက်အခဲတွေရှိနေသေးတယ်လို့ သိရပါတယ်။ ရန်ကုန်ခ၀ဲခြံ မျက်မမြင်ကျောင်းမှာတော့ ပြီးခဲ့(၂၀၁၇)ခုနှစ် တက္ကသိုလ်ဝင်တန်းစာမေးပွဲမှာ စာမေးပွဲဝင်ရောက် ဖြေဆိုသူ(၇)ဦးရှိပြီး(၃)ဦးအောင်မြင်ခဲ့ကာ သမိုင်းဘာသာရပ်မှာ ဂုဏ်ထူးရရှိသူတွေလည်း ပါဝင်တယ်လို့ သိရပါတယ်။
 
 
 

Related News