ကလေးအလုပ်သမားဆိုင်ရာ အန္တရာယ်ရှိတဲ့အလုပ်စာရင်း(မူကြမ်း)တွေကို အချောသတ်ဆွေးနွေးကာ ရရှိလာတဲ့အချက်တွေကို ကလေးအလုပ်သမားပပျောက်ရေးဆိုင်ရာအမျိုးသားကော်မတီထံတင်ပြပြီး မြန်မာနိုင်ငံအနေနဲ့တရားဝင်ထုတ်ပြန်နိုင်အောင် ဆောင်ရွက်သွားမယ်လို့ သိရပါတယ်။
 
ကလေးအလုပ်သမားပပျောက်ရေးဆိုင်ရာ အမျိုးသားကော်မတီကဆွေးနွေးပြီးအချက်တွေကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနက ဆောင်ရွက်နေတဲ့ ကလေးသူငယ် အခွင့်အရေးဆိုင်ရာ ဥပဒေပေါ်ထွက်လာတဲ့ အခါမှာ ဥပဒေအရ တရားဝင်ချိတ်ဆက် ဆောင်ရွက်သွားနိုင်ဖို့ လုပ်ဆောင် သွားမယ်လို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးမျိုးအောင်က ပြောပါတယ်။
 
ကလေးအလုပ်သမားဆိုင်ရာအန္တရာယ်ရှိသော အလုပ်တွေရဲ့စာရင်း(မူကြမ်း)ကို အချောသတ်ဆွေးနွေးဖို့ရာ အတွက် အမျိုးသားအဆင့်ညှိနှိုင်းအစည်းအဝေးကို မေလ(၁၅)ရက်က နေပြည်တော်မှာရှိတဲ့ သင်္ဂဟဟိုတယ်မှာ ပြုလုပ်ခဲ့တာပါ။ အဲ့ဒီအစည်းအဝေးကို ပြည်သူ့လွှတ်တော်၊ အမျိုးသားလွှတ်တော်က ကိုယ်စားလှယ်တွေ၊ ဌာနဆိုင်ရာတာဝန်ရှိသူတွေ၊ အလုပ်ရှင်အလုပ်သမား အဖွဲ့အစည်းတွေက ကိုယ်စားလှယ်တွေ တက်ရောက်ခဲ့ကြပါတယ်။
 
ကလေးအလုပ်သမားဆိုင်ရာ အန္တရာယ်ရှိသောအလုပ်တွေရဲ့စာရင်း(မူကြမ်း)မှာ ကလေးအလုပ်သမားတွေအတွက် အန္တရာယ်ရှိတဲ့ ဆောက်လုပ်ရေးလုပ်ငန်းကဏ္ဍတွေ၊ သန့်ရှင်းရေးလုပ်ငန်း ကဏ္ဍတွေ အပါအ၀င် လုပ်ငန်းကဏ္ဍ(၂၀)နဲ့ လုပ်ငန်းကဏ္ဍခွဲပေါင်း (၁၁၈)ခုပါဝင်တယ်လို့ သိရပါတယ်။ 
 
မြန်မာနိုင်ငံအနေနဲ့ ကလေးအလုပ်သမားပပျောက်ရေးဆိုင်ရာ အမျိုးသားအဆင့် လုပ်ငန်း စီမံချက်ရေးဆွဲပြီး အကောင်အထည်ဖော်ဆောင်ရွက်ဖို့ရာ အတွက် ဒုတိယသမ္မတ(တစ်) ဦးဆောင်ပြီး အဖွဲ့ဝင်(၃၇)ဦး ပါဝင်တဲ့ ကလေးအလုပ်သမား ပပျောက်ရေးဆိုင်ရာအမျိုးသားကော်မတီကို ယခုနှစ် ဖော်ဖော်ဝါရီလ (၅)ရက်မှာ စတင်ဖွဲ့စည်းခဲ့တယ်လို့ သိရပါတယ်။
 
 
 
 

Related News