မန္တလေးမြို့ကသင်္ဂဇာချောင်းနဲ့ ချောင်းပတ်ဝန်းကျင်သန့်ရှင်းသာယာရေး စီမံချက်ချဆောင်ရွက်သွားမယ်လို့ မန္တလေးမြို့တော်စည်ပင်သာယာရေးကော်မတီ၊ သန့်ရှင်းရေးဌာန တာဝန်ရှိသူထံမှသိရပါတယ်။  မန္တလေးမြို့ကသင်္ဂဇာချောင်းဟာရှေးယခင်ကတည်းကရှိခဲ့တဲ့ချောင်းဖြစ်ပါတယ်။ သင်္ဂဇာချောင်းကိုရွှေတချောင်း၊ ငွေတချောင်းတွေကရေစီးဝင်ပြီး ဒီကတဆင့်ကန်တော်ကြီးထဲကိုစီးဝင်ပါတယ်။

ဒီလိုစီးဝင်ရာသင်္ဂဇာချောင်းရဲ့လက်ရှိအခြေအနေမှာ ညစ်ညမ်းပြီး ရေဆိုးမြောင်းဖြစ်နေတယ်လို့သိရပါတယ်။ ချောင်းဘေးတစ်လျောက်မှာစည်းကမ်းမဲ့အမှိုက်စွန့်ပစ်တာ၊ ချောင်းထဲကိုအမှုက်ပစ်ကြတာတွေကြာင့်အမှိုက်တွေစီးဝင်တာ၊ အမှိုက်ပိတ်ဆို့တာ၊ ရေထုညစ်ညမ်းတာနဲ့နုန်းတွေဖြစ်ပေါ်ကာရေစီးရေလာမကောင်းတာတွေဖြစ်ပေါ်နေပါတယ်။ ဒါ့ကြောင့်သင်္ဂဇာချောင်းနဲ့ ချောင်းဝန်းကျင် ပြန်လည်သန့်ရှင်းသာယာရေးတစ်စိုက်မတ်မတ်ဆောင်ရွက်ဖို့မြို့တော်ဝန်ကညွှန်ကြားထားပြီးသန့်ရှင်းရေးဌာနကတာဝန်ယူဆောင်ရွက်သွားမယ်လို့ မန္တလေးမြို့တော်စည်ပင်သာယာရေးကော်မတီ၊ သန့်ရှင်းရေးဌာန ဒုတိယဌာနမှူး ဦးစိုးတင့်အောင်ကပြောပါတယ်။ 

သင်္ဂဇာချောင်းက အောင်မြေသာဇံမြို့နယ်မှာ ပေ ၃၅၀၀ ၊ ချမ်းအေးသာစံမြို့နယ်မှာပေ ၅၀၀၀ ၊ မဟာအောင်မြေမြို့နယ်မှာ ပေ ၈၅၀၀ ရှည်လျားတယ်လို့ သိရပါတယ်။ ဒီနေရာတွေက ရေဆိုး၊ အမှိုက်နဲ့ နုန်းအနယ်အနှစ်တွေကို စီမံချက်ချပြီးသန့်ရှင်းအောင်ဆောင်ရွက်မယ်လို့သိရပါတယ်။ ယန္တရားတွေအသုံးပြုဆယ်ယူသွားမှာဖြစ် ပြီး သင်္ဂဇာချောင်းထိပ်ကနေ ကန်တော်ကြီးအထိအပိုင်းတွေအလိုက်ခွဲဆောင်ရွက်သွားမယ်လို့သိရပါတယ်။ ရေဆိုးတွေကိုသန့်စင်ပြီးမှစွန့်ထုတ်တာ၊ ချောင်းအနီးပတ်ဝန်းကျင်ကလူနေအိမ်တွေကချောင်းအတွင်းပိုက်လိုင်းချစွန့်ပစ်ခြင်းကိုတားဆီးတာ၊ သင်္ဂဇာချောင်းအတွင်းရောက်မယ့် အနယ်စစ်ကန်ကိုအဆင့်မြှင့်တင်တာတွေဆောင်ရွက်မယ်လို့ သိရပါတယ်။

ရေရှည်မျှော်မှန်းချက်အနေနဲ့ သင်္ဂဇာချောင်းတစ်လျောက်ခြံစည်းရိုးကာရံတာ၊ လူသွားလျှောက်လမ်းခင်းပေးတာ၊ ကျောက်ရိုးစီတာအပါအဝင်ချောင်းကနေတဆင့် သယ်ယူပို့ဆောင်ရေးတွေလုပ်နိုင်တဲ့အထိ အဆင့်မြှင့်ကြိုးစားသွားဖို့ အစီအစဉ်ရှိတယ်လို့ သိရပါတယ်။ ချောင်းသန့်ရှင်းရေးကိုတော့ယခုနှစ်ထဲအပြီးဆောင်ရွက်မှာဖြစ်ပြီးဘက်ဂျတ်နဲ့ဆိုင်မယ့်ကိစ္စတွေကနောက်ပိုင်းမှ တိုးချဲ့ဆောင်ရွက်မယ်လို့ ပြောပါတယ်။ 

လက်ရှိမှာတော့ပညာပေးကာလအဖြစ်သင်္ဂဇာချောင်းအနီးရပ်ကွက်တွေမှာအမှိုက်မစွန့်ပစ်ဖို့ပညာပေးညှိနှိုင်းမှုတွေပြုလုပ်နေပါတယ်။သင်္ဂဇာချောင်းသန့်ရှင်းသာယာရေးပူးပေါင်းပါဝင်ကြဖို့လိုအပ်ပြီး ပညာပေးကာလပြီးပါက စည်းကမ်းမဲ့အမှိုက်စွန့်ပစ်ရင် ရပ်ကွက်နေပြည်သူနဲ့ ပူးပေါင်းဖမ်းဆီးကာပညာပေးတာ၊ ဒဏ်ရိုက်တာတွေ ပြုသွားမှာဖြစ်မယ်လို့ သိရပါတယ်။

 

 

Related News