မန္တလေးတိုင်းဒေသကြီး မီးသတ်ဦးစီးဌာနမှာအသုံးပြုဖို့ အတွက် ပိုလန်နိုင်ငံထုတ်အဆင့်မြင့် မီးငြှိမ်းသတ်ယာဉ် ၃စီး တိုင်းဒေသကြီးဗဟိုမီးသတ်စခန်းကို ရောက်ရှိလာတယ်လို့ တာဝန်ရှိသူထံကသိရပါတယ်။ မြန်မာနိုင်ငံမီးသတ်တပ်ဖွဲ့က တစ်နိုင်ငံလုံးအတွက် နိုင်ငံတော်ချေးငွေ နဲ့ ပိုလန်နိုင်ငံက အဆင့်မြင့်မီးငြှိမ်းသတ်ယာဉ် ၆၅စီး ဝယ်ယူထားတယ်လို့သိရပါတယ်။ ဒီအထဲက မန္တလေးတိုင်းဒေသကြီးမှာအသုံးပြုဖို့ အထပ်မြင့် မီး ငြှိမ်းသတ်ယာဉ် (၄)စီး ၊ မီးငြှိမ်းသတ်ရေး နဲ့ ကယ် ဆယ်ရေးလုပ်ငန်းတွေဆောင်ရွက်နိုင်မယ့် အဆင့်မြင့်ယာဉ် (၃)စီး စုစုပေါင်း(၇)စီး ရရှိမှာဖြစ်ပါတယ်။

လက်ရှိမန္တလေးတိုင်းဒေသကြီးဗဟိုမီးသတ်စခန်းကို အထပ်မြင့်မီးငြှိမ်းသတ်ယာဉ်၁စီးနဲ့မီးငြှိမ်းသတ်ရေးနဲ့ကယ်ဆယ်ရေးလုပ်ငန်းတွေဆောင်ရွက်နိုင်မယ့်အဆင့်မြင့်ယာဉ်၂စီးစုစုပေါင်း၃စီးရောက်ရှိနေပြီလို့သိရပါတယ်။ အခုလို အဆင့်မြင့်မီးငြှိမ်းသတ်ယာဉ်တွေကြောင့် မီးငြှိမ်းသတ်ရေးနဲ့ရှာဖွေကယ်ဆယ်ရေးလုပ်ငန်းတွေမှာ ပိုမိုထိရောက်အောင် ဆောင်ရွက်ပေးနိုင်မယ်လို့ မန္တလေးတိုင်းဒေသကြီးမီးသတ်ဦးစီးမှူး ဦးသန်းဇော်ဦး ကပြောပါတယ်။အခုမန္တလေးတိုင်းဒေသကြီးအတွက်ရောက်ရှိတဲ့ ပိုလန်နိုင်ငံထုတ်အဆင့်မြှင့်မီးငြှိမ်းသတ်ယာဉ်တွေဟာ တန်ဖိုးအားဖြင့်၁စီးကို မြန်မာကျပ်ငွေသိန်း၁သောင်းဝန်းကျင်ရှိတယ်လို့ သိရပါတယ်။

ဒီအဆင့်မြင့်မီးငြှိမ်းသတ်ယာဉ်တွေကို မန္တလေးမြို့ကအထပ်အမြင့်အဆောက်အဦးတွေနဲ့ ခက်ခဲတဲ့နေရာတွေမှာ အသုံးပြုသွားမယ်လို့ သိရပါတယ်။ ဒီယာဉ်တွေကိုအလွယ်တကူအသုံးပြုနိုင်ဖို့ ပြည်နယ်နှင့်တိုင်းတစ်ခုစီက မီးသတ်တပ်ဖွဲ့ဝင် ၂ဦးစီကိုပိုလန်နိုင်ငံမှာ သင်ကြားခဲ့ပြီးထားရှိအသုံးပြုမယ့် မြို့နယ်တွေကတပ်ဖွဲ့ဝင်အဆင့်ဆင့်ကို ပြန်လည်သင်ကြားပေးမယ်လို့သိရ ပါတယ်။

အခုလက်ရှိ မန္တလေးတိုင်းဒေသကြီးအတွင်းမှာ မီးသတ်ယာဉ်၊ စက်ပစ္စည်း စုစုပေါင်း၄၀၀ကျော်ကို မီးငြိမ်းသတ် ရေး၊ရှာဖွေကယ်ဆယ်ရေးလုပ်ငန်းတွေမှာအသုံးပြုဆောင်ရွက်ပေးနေပြီး တိုင်းဒေသကြီးအစိုးရကလည်း မီးငြှိမ်းသတ်ယာဉ်တွေကို ရပ်ကွက်၊ကျေးရွာတွေကနယ်မြေစခန်းတွေအထိ ဖြည့်ဆည်းဆောင်ရွက်ပေးနေတယ်လို့သိရပါတယ်။

 

 

Related News