ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံ တတိယအစည်းအဝေး ဆဌမနေ့နှင့် ပိတ်ပွဲအခမ်းအနားကို ဇူလိုင်လ(၁၆)ရက်နေ့မနက်ပိုင်းက နေပြည်တော် မြန်မာအပြည်ပြည်ဆိုင်ရာ ကွန်ဗန်ရှင်းဗဟိုဌာန(၂) MICC(2) မှာ ပြုလုပ်ခဲ့ပါတယ်။ ပထမဦးစွာ ဦးဆောင်သဘာပတိ ဖဒိုစောကွယ်ထူးဝင်းက အဖွင့်အမှာစကားပြောကြားခဲ့ပါတယ်။  အဲဒီနောက်ကဏ္ဍအလိုက် အခြေခံမူအဆိုပြုချက်များတင်သွင်းခြင်းအစီအစဉ်မှာနိုင်ငံရေးကဏ္ဍအခြေခံမူအဆိုပြုချက်(၄)ချက်ကို UPDJC အတွင်းရေးမှူး ဒုတိယဗိုလ်ချုပ်ကြီးခင်ဇော်ဦး(ငြိမ်း)ကလည်းကောင်း၊ စီးပွားရေးကဏ္ဍအခြေခံမူအဆိုပြုချက်(၁)ချက်ကို UPDJC အတွင်းရေးမှူး ဦးလှမောင်ရွှေကလည်းကောင်း၊ လူမှုရေးကဏ္ဍအခြေခံမူအဆိုပြုချက်(၇)ချက်ကို UPDJC အတွင်းရေးမှူး ဦးနိုင်ငံလင်းကလည်းကောင်း၊ မြေယာနှင့် သဘာဝပတ်ဝန်းကျင်ကဏ္ဍ အခြေခံမူအဆိုပြုချက်(၂)ချက်ကိုတော့ UPDJC အတွင်းရေးမှူးခွန်မြင့်ထွန်းတို့က အသီးသီးတင်သွင်းခဲ့ကြတာဖြစ်ပါတယ်။

အစိုးရအစုအဖွဲ့မှကိုယ်စားလှယ် နိုင်ငံတော်သမ္မတရုံး ညွှန်ကြားရေးမှူးချုပ် ဦးကျော်ကျော်ဟန်၊လွှတ်တော်အစုအဖွဲ့မှညီလာခံကိုယ်စားလှယ် ဦးမင်းဦး၊  တပ်မတော်အစုအဖွဲ့မှကိုယ်စားလှယ် ဗိုလ်ချုပ်စိုးနိုင်ဦး၊  တိုင်းရင်းသားလက်နက်ကိုင် အဖွဲ့အစည်းများအစုအဖွဲ့မှ ကိုယ်စားလှယ် မွန်ပြည်သစ်ပါတီဗဟိုအလုပ်အမှုဆောင် နိုင်အောင်မငေး ၊ နိုင်ငံရေးပါတီများအစုအဖွဲ့မှကိုယ်စားလှယ် ကရင်ပြည်သူ့ပါတီဥက္ကဋ္ဌ စောထွန်းအောင်မြင့်တို့က  ထောက်ခံကြောင်းအဆိုတင်သွင်းခဲ့ကြပါတယ်။အဲဒီနောက် ဦးဆောင်သဘာပတိ ဖဒိုစောကွယ်ထူးဝင်းက ကဏ္ဍအလိုက်အဆိုပြုသော အဆိုပြုချက်(၁၄)ချက်အပေါ် အတည်ပြုကြောင်းကြေညာခဲ့ပါတယ်။ ပြည်ထောင်စုငြိမ်းချမ်းရေးဆွေးနွေးမှုပူးတွဲကော်မတီက တင်သွင်းလာသော စာတမ်းများအားမှတ်တမ်းတင်နိုင်ရန် UPDJC အတွင်းရေးမှူးအဖွဲ့ဝင် ရဲဘော်မျိုးဝင်းက အဆိုပြုချက်တင်သွင်းခဲ့ရာUPDJC မှ တင်သွင်းလာသော စာတမ်း(၅၆)စောင်ကို ဦးဆောင်သဘာပတိ ဖဒိုစောကွယ်ထူးဝင်းက မှတ်တမ်းတင်ကြောင်းကြေညာခဲ့ပါတယ်။

 ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံ တတိယအစည်းအဝေး မှအတည်ပြုထားသော သဘောတူညီချက်များအား ပြည်ထောင်စုသဘောတူစာချုပ်၏ အစိတ်အပိုင်းအဖြစ်လက်မှတ်ရေးထိုးချုပ်ဆိုခြင်းကိုဆောင်ရွက်ခဲ့ကြပြီး ဦးဆောင်သဘာပတိဖဒိုစောကွယ်ထူးဝင်းက ပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံ တတိယအစည်းအဝေး၏ သဘောတူညီချက်ထုတ်ပြန်ကြေညာခဲ့ပါတယ်။ အဲဒီနောက် အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန ဥက္ကဋ္ဌ ၊ နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က ကျေးဇူးတင်စကားပြောကြားခဲ့ပါတယ်။ အဲဒီနောက် သဘာပတိ ဒုတိယဗိုလ်ချုပ်ကြီးတင်မောင်ဝင်းက နိဂုံးချုပ်အမှာစကားပြောကြားခဲ့ပြီးပြည်ထောင်စုငြိမ်းချမ်းရေးညီလာခံ(၂၁)ရာစုပင်လုံ တတိယအစည်းအဝေး အောင်မြင်စွာပြီးမြောက်ကြောင်းကြေညာခဲ့ပါတယ်။

 

 

Related News