အိမ်ခြံမြေ ၀န်ဆောင်မှု လုပ်ကိုင်သူတွေနဲ့ ၀န်ဆောင်မှုရယူသူတွေ ဥပဒေနဲ့အညီ အကျိုးရှိစေဖို့အတွက် အိမ်ခြံမြေ၀န်ဆောင်မှု ဥပဒေကြမ်းကို ပြည်သူ့လွှတ်တော်မှာ တင်ထားတယ်လို့ ဇူလိုင်လ(၂၆)ရက်က မန္တလေးမြို့ အိမ်ခြံမြေကိုယ်စားလှယ်များဖွံဖြိုးတိုးတက်ရေးအသင်းရုံးမှာပြုလုပ်တဲ့ အိမ်ခြံမြေ ၀န်ဆောင်မှု ဥပဒေကြမ်းနဲ့ ပတ်သက်တဲ့ သတင်းစာရှင်းလင်းပွဲမှ သိရပါတယ်။ အိမ်ခြံမြေ ၀န်ဆောင်မှု ဥပဒေ ပေါ်ပေါက်ရေး ဟာ နိုင်ငံတော် အတွက် အဓိကကျပြီး နိုင်ငံတော် အခွန်ဘဏ္ဍာရရှိရေး၊ စည်းမျဉ်း စည်းကမ်းများနဲ့ အညီ စနစ်တကျဆောင်ရွက်တဲ့ အိမ်ခြံမြေ ၀န်ဆောင်မှုပေးသူတွေ ပေါ်ထွက်လာစေဖို့၊ အိမ်ခြံမြေ ဈေးကွက် ဖွံ့ဖြိုးတိုးတက်စေရေးကို အထောက်အကူပြုနိုင်ဖို့၊ ၀န်ဆောင်မှုပေးသူ နဲ့ ၀န်ဆောင်မှုရယူသူတွေ ဥပဒေနဲ့ အညီအကျိုးခံစားခွင့် ရရှိစေဖို့ အတွက် အိမ်ခြံမြေ၀န်ဆောင်မှု ဥပဒေကြမ်းကို ရေးဆွဲရတာဖြစ်တယ်လို့ သိရပါတယ်။

လက်ရှိမှာ အိမ်ခြံမြေ ၀န်ဆောင်မှုပေးသူတွေကို ဥပဒေအရ စုစည်းထားတဲ့ ပညာပေးမှု လုပ်ငန်းတွေ၊ ကန့်သတ်ထားတာတွေ မရှိတဲ့အတွက် မမှန်မကန်ပြုလုပ်နေတဲ့ အကျိုးဆောင်လုပ်ငန်းတွေ ရှိနေတယ်လို့ ပြောပါတယ်။အိမ်ခြံမြေ၀န်ဆောင်မှု လိုင်စင်ဟာ အကျိုးဆောင်လုပ်ငန်းတွေကို ချုပ်ကိုင်ထားတာ မဟုတ်ဘဲ မည်သူမဆို မှတ်ပုံတင်လိုင်စင် ရယူနိုင်တယ်လို့ သိရပါတယ်။ မှတ်ပုံတင် လိုင်စင်ရယူပြီးပါက ၃ နှစ်အတွင်း သက်ဆိုင်ရာကော်မတီက သတ်မှတ်ထားတဲ့ သင်တန်းတွေကို တက်ရောက်ရမှာ ဖြစ်တယ်လို့ သိရပါတယ်။ဒီလို ပညာပေးသင်တန်းတွေ တက်ရောက်တာဟာ ၀န်ဆောင်မှုလုပ်ငန်းတွေကို နိုင်ငံတကာအကျိုးဆောင် လုပ် ငန်းများနည်းတူ ဆောင်ရွှက်ပေးနိုင်မှာ ဖြစ်တယ်လို့ ပြောပါတယ်။

အိမ်ခြံမြေ ၀န်ဆောင်မှု ဥပဒေ ပေါ်ထွက် လာပါက အိမ်ခြံမြေ ရောင်းဝယ်ငှားရမ်းရာမှာ ယုံကြည်စိတ်ချရတဲ့ အကျိုးဆောင်များနဲ့ ဆောင်ရွက်နိုင်ခြင်း၊ နိုင်ငံ ခြား ရင်းနှီးမြှုပ်နှံသူတွေအနေနဲ့ နိုင်ငံအတွင်းမှာ ယုံကြည် စိတ်ချရတဲ့ အကျိုးဆောင် လုပ်ငန်းလိုင်စင် ကိုင်ဆောင်ထားသူတွေနဲ့ ဆက်သွယ်ဆောင်ရွက်နိုင်မှာဖြစ်တယ်လို့ ပြောပါတယ်။အိမ်ခြံမြေ ၀န်ဆောင်မှု ဥပဒေကြမ်းကို ပညာရှင်များ၊ တရားရုံးချုပ်၊ ရှေ့နေချုပ်ရုံး၊ သက်ဆိုင်ရာ ၀န်ကြီးဌာနများ နဲ့ ပူးပေါင်းပြီး ဥပဒေရေးရာနဲ့ အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်မှာ ရေးဆွဲခဲ့တာ ဖြစ်တယ်လို့ သိရပါတယ်။ 

 

 

Related News