အမွေအနှစ်လျှောက်လမ်း ဖော်ဆောင်နိုင်ဖို့အတွက် လမ်းလျှောက်ခရီးစဉ်ကို စက်တင်ဘာလ(၈)ရက်က ရွှေတိဂုံဘုရားတောင်ဘက်မုခ်မှာ စုရပ်ပြုလုပ်ပြီး  ရန်ကုန်မြို့ပြအမွေအနှစ်နေရာတွေကို ဖြတ်သန်းလမ်းလျှောက်ခရီးစဉ်ကို ပြုလုပ်ခဲ့တာဖြစ်ပါတယ်။အမွေအနှစ်လျှောက်လမ်းကို  နိုင်ငံတကာခရီးသွားဧည့်သည်တွေ ရန်ကုန်မြို့ကို စိတ်ဝင်စားမှုမြင့်တက်လာစေဖို့နဲ့ မြို့နေပြည်သူတွေ လုံခြုံဘေးကင်းစွာ လမ်းလျှောက်သွားလာနိုင်ရေးကို ရည်ရွယ်ပြီး ရန်ကုန်မြို့ပြအမွေအနှစ်ထိန်းသိမ်း စောင့်ရှောက်ရေးအဖွဲ့ (YHT)နဲ့ မြန်မာနိုင်ငံဧည့်လမ်းညွှန်များအသင်းတို့ပူးပေါင်းပြီး ပြုလုပ်တာဖြစ်ပါတယ်။ အမွေအနှစ်လျှောက်လမ်းဖော်ဆောင်ရေးလမ်းလျှောက်ခရီးစဉ်မှာ မြို့နေပြည်သူတွေ၊ ရန်ကုန်မြို့ပြ အမွေအနှစ်ကို စိတ်ဝင်စားသူတွေနှင့် ခရီးသွားကုမ္ပဏီတွေက တာဝန်ရှိသူတွ ပါဝင်ခဲ့ပါတယ်။ 

အခုခရီးစဉ်တစ်လျှောက်မှာ  ရှေးဟောင်းစေတီ(၄)ဆူနှင့် အမွေအနှစ်နေရာပေါင်း(၅၀)နီးပါးရှိပြီး အဲဒီ အမွေအနှစ်နေရာတွေရဲ့ ရှေးဟောင်းသမိုင်း အကြောင်း တွေကိုလည်း တာဝန်ရှိသူတွေက ရှင်းလင်းပြောပြကြပါတယ်။ ရန်ကုန်မြို့လယ်အမွေအနှစ်နေရာတွေကို ဖြတ်သန်းသွားတဲ့  လမ်းလျှောက်ခရီးစဉ်မှာ   အမွေအနှစ်အဆောက်အအုံတွေ အကြောင်းတွေနှင့် အဆောက်အုံနဲ့ ပတ်သက်တဲ့ သမိုင်းအကြောင်းတွေကို ရှင်းပြတဲ့အတွက် ဗဟုသုတတွေ ရရှိခဲ့တယ်လို့ ခရီးစဉ်မှာပါဝင်သူတစ်ဦးက ပြောပါတယ်။

အခုလမ်းလျှောက်ခရီးစဉ်တွေမှာပါဝင်တဲ့ လမ်းတွေကို ပြည်သူတွေအနေနဲ့ နေ့စဉ်ဖြတ်သန်းသွားလာနေကြပေမယ့် အခုလို အမွေအနှစ်လျှောက်လမ်းဖော်ဆောင်ရေးမှာ ပါဝင်လမ်းလျှောက်ခြင်းဖြင့် အမွေအနှစ်အဆောက်အဦးတွေ၊ လမ်းတွေနှင့် ရန်ကုန်ရဲ့ မြို့ပြအမွေအနှစ်အဆောက်အဦးတွေရဲ့ သမိုင်းအကြောင်းကို သိရှိလေ့လာနိုင်ခြင်း စတဲ့ အကျိုးကျေးဇူးရရှိစေနိုင်မှာ ဖြစ်တယ်လို့ သိရပါတယ်။အခုခရီးစဉ်ကို ရန်ကုန်တိုင်းဒေသကြီးအစိုးရအဖွဲ့က ကရင်တိုင်းရင်းသားလူမျိုးရေးရာဝန်ကြီး နော်ပန်းသဉ္ဇာမျိုး လမ်းလျှောက် ပါဝင်ခဲ့ပါတယ်။ နောက်ထပ်ပြုလုပ်မယ့် ရန်ကုန်မြို့ပြအမွေအနှစ်ထိန်းသိမ်းတဲ့ လမ်းလျှောက်ခရီးစဉ်ကို တရုတ်တန်းဘက်မှာ ပြုလုပ်သွားဖို့ရှိတယ်လို့ သိရပါတယ်။ 

 

 

Related News