လူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန အခြေခံပညာ ဦးစီးဌာနနဲ့ UNDP တို့ပူးပေါင်းပြီး စာသင်ကျောင်းတွေမှာ ငလျင်အန္တရာယ်အသိပညာပေးလုပ်ဆောင်ဖို့အတွက် နည်းပြသင်တန်း ပေးနေတယ်လို့ သိရပါတယ်။ 

ငလျင်ဘေး အန္တရာယ်အသိပညာပေးနည်းပြသင်တန်းတက်ရောက်ဖို့ဆရာ၊ ဆရာမတွေကို ခရိုင်တစ်ခုကို(၈)ယောက်နှုန်းနဲ့ ဆရာဆရာမ(၃၂)ဦး၊ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှဝန်ထမ်း(၈)ဦး စုစုပေါင်းနည်းပြသင်တန်းသူ၊ သင်တန်းသား အယောက်(၄၀)သင်ကြားပေးနေတာပါ။ သင်တန်းမှာတော့ ငလျင်အန္တရာယ်ရင်ဆိုင်နိုင်ဖို့ အသိပညာပေးတွေ၊ သဘာဝဘေးနဲ့ပတ်သက်တဲ့ စီမံခန့်ခွဲမှု ကော်မတီဖွဲ့စည်းပုံ၊ ထိခိုက်အနာတရဖြစ်မှုနဲ့ဆုံးရှုံးမှု တန်ဖိုးလျှော့ချဖို့အတွက် ဇာတ်တိုက်လေ့ကျင့်ခန်းတွေကို သင်ကြားပေးတယ်လို့ သိရပါတယ်။

ရန်ကုန်တိုင်းဒေသကြီးအတွင်း ခရိုင်(၄)ခုက ကျောင်းပေါင်း(၄၀၀၀)ကျော်ထဲမှ အထပ်မြင့်ကျောင်းတွေနဲ့ သက်တမ်းရင့်ကျောင်းပေါင်း (၁၀၀)ကို စီမံကိန်းဒေသအဖြစ်ရွေးချယ်ခဲ့တယ်လို့သိရပါတယ်။ အခုသင်တန်းတက်ရောက်နေတဲ့ ဆရာ၊ ဆရာမတွေကနေ တစ်ဆင့်သက်ဆိုင်ရာကျောင်းတွေကို ငလျင်အန္တရာယ် အသိပညာတွေပြန်လည်မျှဝေပေးရာမှာ သဘာဝဘေးနဲ့ပတ်သက်တဲ့ စီမံခန့်ခွဲမှုကော်မတီ၊ ငလျင်အသိပညာပေးအဖွဲ့ ၊သတင်းဖြန့်ဖြူးရေးအဖွဲ့၊ အရေးပေါ်တုန့်ပြန်ရေးအဖွဲ့ဖွဲ့စည်းပုံတွေနဲ့ ဇာတ်တိုက်လေ့ကျင့်မှုတွေပြန်လည်သင်ကြားပေးသွားမယ်လို့သိရပါတယ်။ 

စီမံကိန်းဒေသအဖြစ်ရွေးချယ်ထားတဲ့ကျောင်းပေါင်း(၁၀၀)ကကျောင်းသားကျောင်းသူတွေကို ဒီဇင်ဘာလအတွင်း အပြီးသင်ကြားလေ့ကျင့်ပေးသွားမယ်လို့သိရပါတယ်။ဒါ့အပြင် ငလျင်ဘေးအန္တရာယ်အသိပညာပေးသင်တန်းတွေကို ရန်ကုန်တိုင်းဒေသကြီးအတွင်းရှိမသန်စွမ်းကျောင်း(၇)ကျောင်းမှာလည်းသင်ကြားပေးသွားမယ်လို့သိရ ပါတယ်။အခုလိုစာသင်ကျောင်းတွေမှာငလျင်အန္တရာယ်အသိပညာပေးတွေကို စစ်ကိုင်းပြတ်ရွေ့ကြောတစ်လျှောက်ရှိ ရန်ကုန်၊ ပဲခူး၊ စစ်ကိုင်း၊ မန္တလေး၊ ချင်း၊ ကချင် စတဲ့တိုင်းဒေသကြီးနဲ့ပြည်နယ်တို့မှာသင်ကြားပေးသွားမယ်လို့သိရပါတယ်။

 

 

Related News