မန္တလေးတိုင်းဒေသကြီးမှာလက်ရှိတူးဖော်လုပ်ကိုင်နေတဲ့ ငါးမွေးမြူရေးကန်တွေထဲကလယ်ယာမြေကိုအခြားနည်းဖြင့် သုံးစွဲပိုင်ခွင့် လန(၃၉) မရှိတဲ့ ကန်တွေကို တစ်ဧကလျှင်ကျပ်ဆယ်သိန်းနဲ့တစ်နှစ်အတွင်း သုံးရစ်ခွဲ ပေးဆောင်ရန် မန္တလေးတိုင်းဒေသကြီးအစိုးရက ထုတ်ပြန်ခဲ့တယ်လို့ မြန်မာနိုင်ငံငါးလုပ်ငန်းအဖွဲ့ချုပ်မှသိရပါတယ်။မန္တလေးတိုင်းဒေသကြီး အစိုးရဖွဲ့က လယ်ယာမြေကိုအခြားနည်းဖြင့်သုံးစွဲပိုင်ခွင့် လန(၃၉) မရှိတဲ့ လုပ်ငန်းရှင်တစ်ဦးချင်းစီကို ဒဏ်ငွေ ကျပ်ဆယ်သိန်းပေးဆောင်ရန် ပြီးခဲ့တဲ့လပိုင်းကပဲထုတ်ပြန်ခဲ့တာဖြစ်ပါတယ်။ငါးကန်တစ်ဧကကို ကျပ်ဆယ်သိန်း ပေးဆောင်ဖို့ သတ်မှတ်ထားပြီး တစ်နှစ်အတွင်း သုံးရစ်ခွဲပေးသွင်းရမှာဖြစ်ပါတယ်။

ဒီလိုသတ်မှတ်လိုက်တဲ့ ဒဏ်ကြေးပမာဏ ဟာ များနေတာကြောင့် မန္တလေးတိုင်းမှ ငါးမွေးမြူရေးလုပ်ငန်းရှင်တွေကပေးဆောင်ဖို့အခက်အခဲရှိနေပြီး သက်ဆိုင်ရာ အဖွဲ့အစည်းတွေထံ လိုအပ်တာတွေ တင်ပြပေးဖို့မြန်မာနိုင်ငံ ငါးလုပ်ငန်းအဖွဲ့ချုပ်ထံ စာတင်ထားတယ်လို့သိရပါတယ်။ ၂၀၁၂ ခုနှစ်က ထုတ်ပြန်ထားတဲ့ လယ်ယာမြေဥပဒေအရ လယ်မြေပေါ်မှာ ခွင့်ပြုမိန့်မရရှိပဲ အခြားနည်းလမ်းဖြင့် သုံးချခြင်းကို အတိအလင်းတားမြစ်ထားပြီး ပုဒ်မ (၁၂) အရ အရေးယူနိုင်ကြောင်းထုတ်ပြန်ထားပါတယ်။ မြန်မာနိုင်ငံက ငါးမွေးမြူရေးလုပ်ငန်းအများစုကတော့ လယ်ယာမြေပေါ် လုပ်ပိုင်ခွင့်တွေ လျှောက်ထားခဲ့ပေမယ့်အချိန်နှောင့်နှေးကြန့်ကြာမှုတွေကြောင့် လုပ်ပိုင်ခွင့်မရသေးပဲ ငါးကန်တွေ တူးဖော်လုပ်ကိုင်ခဲ့ကြတာပါ။

ဒါကို လယ်ယာမြေအလွဲသုံးနေတယ်လို့သတ်မှတ်ပြီး တိုင်းဒေသကြီးအစိုးရအဖွဲ့က ဒဏ်ကြေးပေးဆောင်ရန် သတ်မှတ်လိုက်တာပဲဖြစ်ပါတယ်။ မြန်မာနိုင်ငံငါးလုပ်ငန်းအဖွဲ့ချုပ်ကတော့ ငါးကန်တစ်ဧက ကိုဆယ်သိန်းဆိုတဲ့ ငွေကြေးပမာဏဟာ လုပ်ငန်းရှင်တွေအတွက် များလွန်းတာကြောင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဌာန ပြည်ထောင်စုဝန်ကြီးထံ အဆိုပါ ကိစ္စကို တင်ပြတောင်းဆိုသွားမယ်လို့ပြောပါတယ်။လက်ရှိ လယ်ယာမြေတွေပေါ်မှာ တူးဖော်လုပ်ကိုင်နေတဲ့ ငါးကန်ဧကပေါင်း လေးသိန်းကိုးသောင်းကျော်ရှိနေပြီး တရားဝင် လုပ်ကိုင်ခွင့်ရတဲ့ ငါးကန်ဧက တစ်သိန်းသုံးသောင်းသာရှိသေးတယ်လို့သိရပါတယ်။ ကျန်ရှိတဲ့ ငါးကန်တွေကတော့ လယ်ယာမြေကို အခြားနည်းလမ်းဖြင့် သုံးစွဲပိုင်ခွင့် လန(၃၉)ကို လျှောက်ထားဆဲဖြစ်ပါတယ်။

 

 

Related News