လက်နက်ကိုင်အဖွဲ့အစည်းတွေအနေနဲ့ အင်အားတည်ဆောက်တာ၊ နယ်မြေတည်ဆောက်တာတွေမပြုလုပ်ကြဖို့ ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ(JMCU) ဥက္ကဋ္ဌက သတိပေးတိုက်တွန်းလိုက်ပါတယ်။ ရန်ကုန်မြို့ ရွှေလီလမ်းမှာရှိတဲ့ အမျိုးသားပြန်လည်သင့်မြတ်ရေးနှင့်ငြိမ်းချမ်းရေး ဗဟိုဌာနမှာ စက်တင်ဘာ(၁၂)ရက်ကစပြီး သုံးရက်ကြာပြုလုပ်နေတဲ့ JMCU အစည်းအဝေးမှာ ထည့်သွင်းပြောကြား လိုက်တာပါ။

လက်ရှိပဋိပက္ခတွေဟာ ဒီအပေါ်မှာအခြေခံပြီးဖြစ်ပေါ်နေတာကြောင့် အခုလိုပြောကြားတာဖြစ်ပြီး တပ်မတော်ရဲ့ ထာဝရ ငြိမ်းချမ်းရေးတည်ဆောက်နေမှုကိုလည်း ကြီးမားတဲ့ အဟန့်အတား ဖြစ်စေတယ်လုိ့ ဥက္ကဋ္ဌ ဒုတိယဗိုလ်ချုပ်ကြီးရာပြည့်က ရှင်းပြပါတယ်။ ယုံကြည်မှုတည်ဆောက်နေချိန်မှာ ထိပ်တိုက်တွေ့ဆုံမှုတွေမဖြစ်ဖို့ နယ်မြေအင်အားမတည်ဆောက်ဖို့လိုပြီး ကိုယ်ပိုင်သွင်ပြင်လက္ခဏာကိုအလွန်အကျွံ ဦးစားပေးဆောင်ရွက်နေတာထက် နိုင်ငံတော်သွင်ပြင်လက္ခဏာအတွက် စဉ်းစားဆောင်ရွက်ဖို့တိုက်တွန်းပါတယ်။

ပူးတွဲစောင့်ကြည့်ရေးကော်မတီ JMC အဆင့်ဆင့်ကိုတော့ တပ်မတော်၊ အပစ်ရပ်တိုင်းရင်းသားလက်နက်ကိုင်အဖွဲ့နဲ့ အရပ်သားကိုယ်စားလှယ်တွေပါဝင် ဖွဲ့စည်းထားတာဖြစ်ပြီး ပြီးခဲ့တဲ့မေလအထိ ကော်မတီအဆင့်ဆင့်ကို တိုင်ကြားစာပေါင်း(၄၀၀)ကျော်ရောက်ရှိထားတယ်လို့ သိရပါတယ်။ အခုတစ်ကြိမ်(၃)ရက်တာ အစည်းအဝေးမှာတော့ ရပ်ကွက်၊ ကျေးရွာတွေမှာ ဒေသခံအရပ်သားစောင့်ကြည့်သူတွေ ထားရှိရေးနဲ့ ပတ်သက်ပြီး ဆက်လက်ဆွေးနွေးဖို့ရှိတယ်လို့ သိရပါတယ်။

ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ(JMC)ဟာ သုံးနှစ်နီးပါး သက်တမ်း ရှိပြီဖြစ်ပြီး  လက်ရှိမှာ တိုင်းနဲ့ပြည်နယ်အဆင့် စောင့်ကြည့်ရေးကော်မတီတွေအဖြစ်(ရှမ်း၊ တနင်္သာရီ၊ ကရင်၊ မွန်၊ပဲခူး)မှာ JMC-S ငါးခုကို ဖွဲ့စည်းပြီး ဖြစ်သလို ရှမ်းပြည်နယ် လင်းခေးနဲ့ကရင်ပြည်နယ် ဖာပွန်မှာလည်း ဒေသဆိုင်ရာ အဆင့်စောင့်ကြည့်ရေးကော်မတီ (JMC-L)တွေကို ဖွဲ့စည်းထားပြီးဖြစ်ပါတယ်။

 

Related News