ကလေးသူငယ်များအပေါ်ရုပ်ပိုင်းဆိုင်ရာအကြမ်းဖက်မှုရပ်တန့်ရေးလှုပ်ရှားမှုကို စက်တင်ဘာလ(၁၇)ရက်က မန္တလေးမြို့၊ မနောရမ္မံ ကစားကွင်းမှာ ပြုလုပ်ခဲ့ပါတယ်။ဒီလှုပ်ရှားမှုအစီအစဉ်ကို မန္တလေးတိုင်းဒေသကြီး ကလေးသူငယ်အခွင့်အရေးများဆိုင်ရာကော်မတီရဲ့ ဦးဆောင်လမ်း ညွှန်မှုနဲ့ World Vision Internaional  Myanmar က ပြုလုပ်တာဖြစ်ပါတယ်။ ကမ္ဘာပေါ်မှာနှစ်စဉ်နှစ်တိုင်း ကလေးသူငယ် (၁)ဘီလျံ ဟာ အကြမ်းဖက်မှုကိုခံစားနေရတယ်လို့သိရပါတယ်။ ကလေးသူငယ်တွေကို ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာအကြမ်းဖက်မှုဟာ ပုံစံမျိုးစုံ၊ နည်းမျိုးစုံနဲ့ နေရာအနှံတွေ့မြင်နေရတယ်လို့သိရပါတယ်။

ကလေးသူငယ်အကြမ်းဖက်မှုတွေကိုကာကွယ်ဖို့က တစ်ဦး၊ တစ်ဖွဲ့တည်းဆောင်ရွက်လို့မရဘဲ အားလုံး ကိုယ်တိုင်ပူးပေါင်းကာကွယ်ပေးကြဖို့လိုတယ်လို့ World Vision Myanmar ရဲ့ အဖွဲ့အစည်းပြင်ပဆက်သွယ် ဆောင်ရွက်ရေးမန်နေဂျာ နော်ဖီဘီက ပြောပါတယ်။

ကလေးများအပေါ်အကြမ်းဖက်မှုရပ်တန့်ရေးအတွက်ကမ္ဘာလုံးဆိုင်ရာကမ်ပိန်းလှုပ်ရှားမှုကို World Vision Myanmar က “တို့တွေအားလုံးပါဝင်လို့ ကလေးများအပေါ် ရုပ်ပိုင်းဆိုင်ရာအကြမ်းဖက်မှုရပ်တန့်စို့” ဆောင်ပုဒ် နဲ့ မြန်မာနိုင်ငံမှာ(၅)နှစ်ပြုလုပ်မယ်လို့သိရပါတယ်။တိုင်းဒေသကြီးနဲ့ပြည်နယ်အသီးသီမှာလူထုအသိပညာပေးအစီအစဉ်တွေလုပ်ဆောင်တာ၊အစိုးရနဲ့ဆောင်ရွက်နေတဲ့လုပ်ငန်းတွေမှာပံ့ပိုးဆောင်ရွက်တာ၊လူမှုဝန်ထမ်းဦးစီးဌာနနဲ့ပူးပေါင်း ပြီးလက်စွဲစာအုပ်ကိုထုတ်ဝေတာတွေဆက်လက်ဆောင်ရွက်သွားမယ်လို့သိရပါတယ်။ကလေးသူငယ်များအပေါ်ရုပ်ပိုင်းဆိုင်ရာအကြမ်းဖက်မှုရပ်တန့်ရေးလှုပ်ရှားမှုအစီအစဉ်မှာ ကလေးသူငယ်အကြမ်းဖက်မှုဆိုင်ရာတစ်ခန်းရပ်ပြဇာတ်၊ အသိပညာပေးအစီစဉ်၊ ဖျော်ဖြေရေး၊ ဥာဏ်စမ်းပဟေဠိအစီအစဉ် နဲ့ အခြားစိတ်ဝင်စားစရာအစီအစဉ်တွေပြုလုပ်ခဲ့ပါတယ်။ မန္တလေးမြို့မှာပြုလုပ်တဲ့ ကလေးသူငယ်များအပေါ်ရုပ်ပိုင်းဆိုင်ရာအကြမ်းဖက်မှုရပ်တန့်ရေး လှုပ်ရှားမှုအစီအစဉ်ကိုမန္တလေးတိုင်းဒေသကြီး အစိုးရအဖွဲ့သယံဇာတနှင့်သဘာဝပတ်ဝန်းကျင်ထိန်းသိမ်းရေး ဝန်ကြီး ဦးမျိုးသစ်၊ လွှတ်တော်ကိုယ်စားလှယ်တွေ၊ ဌာနဆိုင်ရာ တာဝန်ရှိ သူတွေ၊ အဖွဲ့အစည်းအသီးသီး၊ ကလေး သူငယ်တွေ နဲ့ မိဘပြည်သူတွေ တက်ရောက်ခဲ့ကြပါတယ်။

ဒီလှုပ်ရှားမှုကို နေပြည်တော်၊ ရန်ကုန်၊ မော်လမြိုင် မြို့တွေမှာ ပြုလုပ်ခဲ့ပြီး အခုမန္တလေးမြို့မှာ စတုတ္ထအကြိမ် ပြုလုပ်တာဖြစ်တယ်လို့သိရပါတယ်။

 

 

Related News