မြန်မာနိုင်ငံအတွင်းရှိ အသေးစား၊ အလတ်စားလုပ်ငန်းတွေ ဖွံ့ဖြိုးတိုးတက်စေဖို့အတွက် JICA(ဂျိုက်ကာ)မှ ချေးငွေများ ထုတ်ချေးပေးနေတယ်လို့ နိုဝင်ဘာလ (၈) ရက်က မန္တလေးမြို့စက်မှုဇုန်ကနောင်ခန်းမမှာ ပြုလုပ်ခဲ့တဲ့ အသေးစား၊ အလတ်စားလုပ်ငန်း နှစ်ဆင့်ချေးငွေ ရှင်းလင်းဆွေးနွေးပွဲကသိရပါတယ်။ JICA(ဂျိုက်ကာ)အနေနဲ့ မြန်မာနိုင်ငံရဲ့ ငွေရေးကြေးရေးကဏ္ဍ အထောက်အပံ့ရရှိစေဖို့၊ လူ့စွမ်းအား အရင်း အမြစ် ဖွံ့ဖြိုးတိုးတက်လာစေဖို့၊ အသေးစား၊ အလတ်စားလုပ်ငန်းရှင်တွေ ရင်းနှီးမြှုပ်နှံငွေ တိုးချဲ့လာနိုင်စေဖို့အတွက် ရည်ရွယ်ကာ စီမံကိန်းရေးဆွဲပြီးချေးငွေတွေ ထုတ်ပေးနေတာဖြစ်တယ်လို့ သိရပါတယ်။

ဒီစီမံကိန်းအရ (၂၀၁၆) ခုနှစ်မှစတင်ပြီး မြန်မာနိုင်ငံရှိ SME လုပ်ငန်းရှင်ပေါင်း(၂၇၀) ၀န်းကျင်ကိုချေးငွေတွေထုတ်ပေးခဲ့ပြီး ဖြစ်တယ်လို့သိရပါတယ်။ အခုစီမံကိန်းအပိုင်း(၂)အဖြစ် ပြီးခဲ့တဲ့ စက်တင်ဘာလမှစပြီးချေးငွေတွေထုတ်ချေးပေးနေပြီဖြစ်တယ်လိုို့ JICA မှတာဝန်ရှိသူကပြောပါတယ်။ SME လုပ်ငန်းရှင်တွေ အနေနဲ့ ချေးငွေရယူလိုပါက လုပ်ငန်းနဲ့ပတ်သက်ပြီး သတ်မှတ်ထားတဲ့လုပ်ငန်းလိုင်စင်တွေ လိုအပ်ပြီး ချေးငွေသက်တမ်းကို အနည်းဆုံး (၁) နှစ်မှ (၅)နှစ်အထိ သတ်မှတ်ထားတယ်လို့သိရပါတယ်။ အိမ်ခြံမြေလုပ်ငန်း၊လယ်ယာလုပ်ငန်း၊ အရက်ဘီယာ ရောင်းချတဲ့လုပ်ငန်း၊ သတ္ထုတူးဖော်ရောင်းချတဲ့လုပ်ငန်း စတာတွေကိုတော့ကန့်သတ်ထားတယ်လို့ဆိုပါတယ်။

ချေးငွေရယူလိုပါကပုဂ္ဂလိကဘဏ်တွေဖြစ်တဲ့ CB Bank၊ ဧရာဝတီဘဏ်၊ United Amera Bank ၊ KBZ Bank၊ မြန်မာ့ရှေ့ဆောင်ဘဏ်၊ မြန်မာနိုင်ငံသားများဘဏ်၊ ပထမပုဂ္ဂလိကဘဏ် စတဲ့ဘဏ်တွေနဲ့ ချိတ်ဆက်ဆောင်ရွက်နိုင်တယ်လို့သိရပါတယ်။ အခုပြုလုပ်ခဲ့တဲ့ အသေးစား၊ အလတ်စားလုပ်ငန်းနှစ်ဆင့်ချေးငွေ ရှင်းလင်းဆွေးနွေးပွဲကို မြန်မာ-ဂျပန်စင်တာက ကြီးမှူးပြီး JICA နဲ့ မန္တလေးစက်မှုဇုန် စီမံခန့်ခွဲရေးကော်မတီတို့ ပူးပေါင်းပြီး ပြုလုပ်တာ ဖြစ်တယ်လို့သိရပါတယ်။

 

 

Related News