မန္တလေးကွန်ဗင်းရှင်းစင်တာဖွင့်ပွဲနှင့်အတူ မန္တလေးစီးပွားရေးဖိုရမ်(၂၀၁၈)ကိုနိုဝင်ဘာလ(၉)ရက် နံနက်ပိုင်းက မန္တလေး ကွန်ဗင်းရှင်းစင်တာမှာ စတင်ကျင်းပနေပါတယ်။ မန္တလေးကွန်ဗင်းရှင်းစင်တာဖွင့်ပွဲနှင့်အတူမန္တလေးစီးပွားရေးဖိုရမ်(၂၀၁၈)ကို မြန်မာနိုင်ငံရင်းနှီးမြှုပ်နှံမှုကော်မရှင်ဥက္ကဋ္ဌ ၊ ပြည်ထောင်စုအစိုးရအဖွဲ့ဝန်ကြီးဌာန  ပြည်ထောင်စုဝန်ကြီး ဦးသောင်းထွန်း၊ မန္တလေးတိုင်းဒေသကြီး ဝန်ကြီးချုပ်ဒေါက်တာ ဇော်မြင့်မောင်၊ စစ်ကိုင်းတိုင်းဒေသကြီးဝန်ကြီးချုပ်ဒေါက်တာမြင့်နိုင်၊ မွန်ပြည်နယ်ဝန်ကြီးချုပ် ဒေါက်တာအေးဇံ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးဦးအောင်ထူး၊ တိုင်းဒေသကြီးနဲ့ပြည်နယ်အစိုးရအဖွဲ့မှဝန်ကြီးတွေ၊ မန္တလေးမြို့တော်ဝန်ဒေါက်တာရဲလွင်၊ နိုင်ငံခြားသံရုံးများမှသံအမတ်တွေ၊ ဌာနဆိုင်ရာကတာဝန်ရှိသူတွေ၊ နိုင်ငံခြားရင်းနှီး မြှုပ်နှံသူတွေနဲ့ စီးပွားရေးလုပ်ငန်းရှင်တွေ တက်ရောက်ခဲ့ကြပါတယ်။

အခမ်းအနားမှာမန္တလေးကွန်ဗင်းရှင်းစင်တာကို New Srartlight Group of Companies က မန္တလေးမြို့တော် စည်ပင်သာယာရေး ကော်မတီထံသို့ လွှဲပြောင်းပေးအပ်ခဲ့ပါတယ်။ မန္တလေးမြို့ဟာအိမ်နီးချင်းနိုင်ငံတွေနဲ့ နယ်စပ်ကုန်သွယ်ရေးအတွက် အလားအလာကောင်းတွေ ရှိနေပါတယ်။ စီးပွားရေး လုပ်ငန်းရှင်တွေအတွက် အခွင့်အလမ်းတွေရှိနေပြီး မန္တလေးတိုင်းဒေသကြီးကို နိုင်ငံခြားနဲ့ပြည်တွင်းစီးပွားရေးလုပ်ငန်းတွေ ထပ်မံဝင်ရောက်လာဖို့ရင်းနှီးမြှုပ်နှံမှုတွေကို ဖန်တီးမယ်လို့ မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင်က ပြောပါတယ်။ 

အခုပြုလုပ်နေတဲ့မန္တလေးစီးပွားရေးဖိုရမ်မှာမန္တလေးတိုင်းဒေသကြီးကထွက်ကုန်ပြခန်းတွေ၊ မန္တလေးတိုင်းဒေသကြီးအတွင်း မကြာခင်မှာအကောင်အထည်ဖော်မယ့် စီမံကိန်းတွေအကြောင်းသတင်းအချက်အလက်တွေ ၊ မြို့သာစက်မှုဇုန်၊ မြို့သစ် စီမံကိန်း၊ ခရီးသွားလုပ်ငန်းတွေနဲ့ပတ်သက်တဲ့ ရှင်းလင်းတင်ပြခြင်းအစီအစဉ်တွေ ပါဝင်မယ်လို့သိရပါတယ်။ ဖိုရမ်မှာ ပြည်တွင်း ပြည်ပက စီးပွားရေးလုပ်ငန်းရှင်တွေကိုယ်တိုင်တူရာစီးပွားရေးကဏ္ဍအလိုက် တွေ့ဆုံဆွေးနွေးနိုင်မယ့် အခွင့်အလမ်းတွေ ရရှိနိုင်မယ်လို့ သိရပါတယ်။မန္တလေးစီးပွားရေးဖိုရမ်ကိုနိုဝင်ဘာလ(၉)ရက်မှနိုဝင်ဘာလ(၁၁)ရက်အထိ၃ရက်ကျင်းပပြုလုပ်သွားမှာဖြစ်ပြီး စက်မှုလုပ်ငန်း၊ စိုက်ပျိုးရေးလုပ်ငန်း၊ ဟိုတယ်နှင့်ခရီးသွားလာရေးလုပ်ငန်းအစရှိတဲ့လုပ်ငန်းပြခန်း(၂၀၀)ကျော် ပါဝင်ပြသထားတယ်လို့ သိရပါတယ်။

 

 

Related News