ရင်းနှီးမြုပ်နှံမှုနှင့် ကုမ္ပဏီများညွှန်ကြားမှုဦးစီးဌာန(DICA) မှာ တရားဝင်မှတ်ပုံတင်ထားတဲ့ ကုမ္ပဏီတစ်ခုချင်းစီရဲ့ ကုမ္ပဏ်ီအကြောင်းအချက်အလက်အကျဉ်းချုပ်ကို ငွေကျပ်တစ်သောင်းပေးပြီး ရယူနိုင်ပြီလို့သိရပါတယ်။ DICA ရဲ့ ၀က်ဆိုဒ်ကနေတဆင့် အွန်လိုင်းကနေငွေသွင်းပြီး ရယူနိုင်မှာဖြစ်ပါတယ်။ ကုမ္ပဏီအမျိုးအစား၊ လိပ်စာနဲ့ မှတ်ပုံတင် နံပါတ်၊ ကုမ္ပဏီက လုပ်ကိုင်နေတဲ့ လုပ်ငန်းတွေ၊ ဘယ်သူတွေက ကုမ္ပဏီတာဝန်ရှိသူတွေ ဆိုတာနဲ့ သူတို့နဲ့ပတ်သက်တဲ့ ကိုယ်ရေးအချက်အလက်တွေကို သိနိုင်မှာဖြစ်သလို မူရင်းကုမ္ပဏီအမည် ၊ ကုမ္ပဏီမှာ ရှယ်ယာဘယ်လောက်ရှိသလဲ ၊ အဓိက ရှယ်ယာရှင် တွေကဘယ်သူလဲ ၊နိုင်ငံခြားသားရှယ်ယာပါမပါ ၊ကုမ္ပဏီအနေနဲ့ မရွှေ့မပြောင်းနိုင်တဲ့ ပစ္စည်းတွေနဲ့ ပတ်သက်လို့ ဘာတွေ ဘဏ်မှာ ပေါင်နှံထားလည်းဆိုတာပါ သိရှိနိုင်မှာဖြစ်တယ်လို့ သိရပါတယ်။

နိုဝင်ဘာလ(၅)ရက်ကစပြီး ဒီဝန်ဆောင်မှု ကို ရရှိနိုင်ပြီလို့ ရင်းနှီးမြုပ်နှံမှုနှင့်ကုမ္ပဏီများညွှန်ကြားမှုဦးစီးဌာန ညွှန်ကြားရေးမှူးချုပ်က ပြောပါတယ်။၂၀၁၈ သြဂုတ်လ(၁)ရက်မတိုင်မီ ပြည်တွင်းမှာ မှတ်ပုံတင်ထားတဲ့ သက်တမ်းရှိ ကုမ္ပဏီ ခြောက်သောင်းကျော်ရှိပါတယ်။ ဒီကုမ္ပဏီအားလုံးဟာ ကုမ္ပဏီဥပဒေသစ် စတင်အသက်ဝင်တဲ့ သြဂုတ်လ(၁)ရက်ကစပြီး (၆)လအတွင်း အွန်လိုင်းကနေ ပြန်လည်မှတ်ပုံတင်တာတွေကို ပြုလုပ်ရမှာဖြစ်ပါတယ်။ ခြောက်လအတွင်း ပြန်လည်မှတ်ပုံမတင်ပါက နောက်ထပ်တစ်လ အတွင်း ဒဏ်ကြေးငွေ ပေးဆောင်ပြီး ပြန်လည်မှတ်ပုံတင်ရမှာဖြစ်ကာ ကျော်လွန်ပါက ကုမ္ပဏီအဖြစ်က ရုတ်သိမ်းမှာ ဖြစ်ပါတယ်။

ဒဏ်ကြေးငွေကတော့ ကုမ္ပဏီအမျိုးအစားပေါ်မူတည်ပြီး ကျပ်တစ်သိန်း ကနေ ၂၅သိန်းအထိ ပေးဆောင်ရမယ်လို့ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနက ထုတ်ပြန်ထားပါတယ်။ လက်ရှိအချိန်ထိတော့ ကုမ္ပဏီနှစ်သောင်း တစ်ထောင်ကျော် အွန်လိုင်းကနေ ပြန်လည်မှတ်ပုံတင် ထားပြီးကုမ္ပဏီအသစ်ခြောက်ထောင်ကျော်ကလည်း လာရောက် မှတ်ပုံတင်ထားတယ်လို့သိရပါတယ်။၂၀၁၈ သြဂုတ်လ(၁)ရက်ကစပြီး ပြည်တွင်းမှာ ၁၉၁၄ ခုနှစ်ကုမ္ပဏီများဥပဒေအစား ၂၀၁၇ခုနှစ် ကုမ္ပဏီများဥပဒေနဲ့ အစားထိုး ကျင့်သုံး လိုက်တာဖြစ်ပါတယ်။ အခုဥပဒေသစ်အရ မြန်မာကုမ္ပဏီတွေမှာ နိုင်ငံခြားသား ရှယ်ယာပါဝင်မှု (၃၅)ရာခိုင်နှုန်းအထိ ပါဝင်ခွင့် ရမှာဖြစ်ပြီး တစ်ဦးတည်းနဲ့ ကုမ္ပဏီထောင်ခွင့်လည်းရှိ နေပါတယ်။ 

 

 

Related News