မန္တလေးမြို့ရှိ အစားထိုးသစ်သားအစိတ်အပိုင်းများ ပြန်လည်ဖော်ထုတ်ခြင်းနဲ့ ပန်းပုလက်မှုများ ပြန်လည်သက်ဝင် စေခြင်းနဲ့ပတ်သက်တဲ့ ဆွေးနွေးပွဲကို နိုဝင်ဘာလ ၁၄ ရက်က မန္တလေးမြို့၊ ဂျက်ဖာဆင်စာကြည့်တိုက်မှာ ပြုလုပ်ခဲ့ပါတယ်။ အခုပြုလုပ်တဲ့ဆွေးနွေးပွဲကို သာသနာရေးနှင့်ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာနရဲ့ ပံ့ပိုးမှုနဲ့ ကမ္ဘာ့ရှေးဟောင်း အဆောက်အဦများ ထိန်းသိမ်းရေးရန်ပုံငွေအဖွဲ့နဲ့ မန္တလေးမြို့ ပန်းပုဆရာကြီး ဦးကံချွန်တို့က ဦးဆောင်ဆွေးနွေးတာဖြစ်တယ်လို့သိရပါတယ်။ အခုလို ဆွေးနွေးပွဲ ပြုလုပ်တာဟာ သမိုင်းဝင်ရွှေနန်းတော်ကျောင်းမှာရှိတဲ့ အစားထိုးသစ်သားအစိတ်အပိုင်းများ ပြန်လည်ဖော်ထုတ်စေဖို့နဲ့သစ်သားပန်းပုလက်မှုများထုလုပ်ရာမှာ မူလရှေးဟောင်း လက်ရာမပျက်စေဖို့ နောက်မျိုးဆက်သစ်လူငယ်တွေကို ပန်းပုပညာနဲ့ပတ်သက်ပြီးတတ်မြောက်အောင် လုပ်ဆောင်တတ်စေဖို့အတွက် ပြုလုပ်တာဖြစ်တယ်လို့ ပြောပါတယ်။

အခုလို သမိုင်းဝင်ရွှေနန်းတော်ကျောင်း အစားထိုးသစ်သားအစိတ်အပိုင်းများ ပြန်လည်ဖော်ထုတ်ခြင်းနဲ့ ပန်းပုလက်မှုများ ပြန်လည်သက်ဝင်စေဖို့ပြုလုပ်ရာမှာ၂၅ ရာခိုင်နှုန်း ပြီးစီးနေပြီး တောင်ဘက်နဲ့ အနောက်ဘက်က ၀ရန်တာတွေကို လုပ်ဆောင်နေတာဖြစ်တယ်လို့သိရပါတယ်။ လက်ရှိမှာရွှေနန်းတော်ကျောင်းရဲ့ ကုန်းဘောင်ခေတ်ရိုးရာ အခြေအနေတွေကို ပြန်လည်ဖော်ထုတ်တာ ရှေးဟောင်းသစ်သားအဆောက်အဦတွေကို နိုင်ငံတကာစံချိန်စံညွန်းနဲ့အညီ ထိန်းသိမ်းစောင့် ရှောက်မှုတွေ၊ ၀ရန်တာမှာ ပျောက်ဆုံးနေတဲ့ အလှဆင်သစ်သားပန်းပုလက်ရာတွေကို ပြန်လည်ဖန်တီးတာ ဖြစ်တယ်လို့ သိရပါတယ်။အခုဆွေးနွေးမှုဟာ ၁၆ ကြိမ်မြောက်ပြုလုပ်တာ ဖြစ်ပြီး ရှေးဟောင်းပစ္စည်းမွမ်းမံထိန်းသိမ်းခြင်းနည်းစနစ်များ၊ ရှေးဟောင်း သစ်သား ထိန်းသိမ်းခြင်းထူးခြားမှုများ၊ ရွှေနန်းတော်ကျောင်းမှာလက်ရှိအသုံးပြုနေတဲ့ သစ်သားပန်းပုရုပ်များ ထုလုပ်မှုလုပ်ငန်း စဉ်တွေကို ဆွေးနွေးတာဖြစ်တယ်လို့ သိရပါတယ်။

 

 

Related News