တစ်ကမ္ဘာလုံးဆိုင်ရာ ပဋိဇီဝဆေးယဉ်ပါးမှု အသိပညာပေး ရက်သတ္တပတ်လှုပ်ရှားမှု အခမ်းအနားကို နိုဝင်ဘာလ(၁၆)ရက်က မန္တလေးမြို့ Perfect Hotel မှာ ပြုလုပ်ခဲ့ပါတယ်။ အခုပြုလုပ်တဲ့ အခမ်းအနားကို မွေးမြူရေးနှင့်ကုသရေးဦးစီးဌာနနဲ့ ကမ္ဘာ့တိရစ္ဆာန်ကျန်းမာရေးအဖွဲ့ (OIE) တို့ ပူးပေါင်းကျင်းပတာ ဖြစ်ပါတယ်။ ပဋိဇီဝဆေးသုံးစွဲမှု ကွင်းဆက်မှာ ပါဝင်နေတဲ့ တိရစ္ဆာန်ဆေးကုဆရာဝန်တွေ၊ တိရစ္ဆာန်အစားအစာနဲ့ ဆေးဝါးထုတ်လုပ်၊ တင်သွင်း၊ ဖြန့်ဖြူးရောင်းချသူတွေ၊ မွေးမြူရေး ခြံလုပ်ငန်း လုပ်ကိုင်သူတွေကို ပဋိဇီဝဆေးယဉ်ပါးမှု ပြဿနာဖြစ်ရတဲ့ အကြောင်းရင်းတွေ၊ ပဋိဇီဝဆေးယဉ်ပါးမှု ပြဿနာ လျော့နည်းစေရေးကိစ္စတွေကို အသိပညာပေးပြီး နားလည်သဘောပေါက်စေဖို့ ရည်ရွယ်ကျင်းပတာ ဖြစ်တယ်လို့ မွေးမြူရေးနှင့်ကုသရေးဦးစီးဌာန မန္တလေးတိုင်းဒေသကြီးဦးစီးမှူး ဒေါက်တာမောင်မောင်က ပြောပါတယ်။ 

မွေးမြူရေးလုပ်ငန်းတွေမှာ ရောဂါကာကွယ်ရေးအစီအမံတွေ၊ ဇီဝလုံခြုံရေး အစီအမံတွေ အားနည်းတာကြောင့် ရောဂါပိုးမွှားတွေ အလွယ်တကူ ကျရောက်ပြီး ကူးစက်ပျံ့နှံ့မှုတွေ ပိုပြီး ဖြစ်ပေါ်စေတယ်လို့ သိရပါတယ်။ ဒါ့အပြင် ပဋိဇီဝဆေးဝါးတွေကို ဆေးအချိန်အဆ၊ သတ္တ၀ါ၊ ကာလ၊ ကြာချိန် စတာတွေကို စနစ် တကျသုံးစွဲမှုမရှိတာကြောင့် ပဋိဇီဝဆေးယဉ်ပါးတဲ့ ရောဂါပိုးတွေ ပေါ်ပေါက်နေတယ်လို့သိရပါတယ်။ ဒါ့ကြောင့် မွေးမြူရေးလုပ်ငန်းတွေမှာ ပဋိဇီဝ ဆေးသုံးစွဲတာတွေကို စနစ်တကျနဲ့ တာဝန်ရှိရှိ သုံးစွဲဖို့ လိုအပ်တယ်လို့ ဆိုပါတယ်။ ဇီဝလုံခြုံမှုကောင်းမွန်ပြီး ရောဂါပိုးကာကွယ်ထိန်းချုပ်တဲ့ နည်းလမ်းတွေနဲ့ တိရစ္ဆာန်တွေကို မွေးမြူဖို့ လိုအပ်တယ်လို့ မွေးမြူရေးနှင့်ကုသရေးဦးစီးဌာန၊ သုတေသနအရာရှိ ဒေါက်တာအောင်ထွန်းက ပြောပါတယ်။ အခုလို အသိပညာပေး လှုပ်ရှားမှုတွေကို နေပြည်တော်၊ ရန်ကုန်၊ မုံရွာနဲ့ တောင်ကြီးမြို့တွေမှာလည်း ပြုလုပ်ခဲ့တယ်လို့သိရပါတယ်။ နှစ်စဉ် နိုဝင်ဘာလ တတိယပတ်ဟာ တစ်မ္ဘာလုံးဆိုင်ရာ ပဋိဇီဝဆေးယဉ်ပါးမှု ပညာပေးရက်သတ္တပတ်ဖြစ်ပြီး မြန်မာနိုင်ငံမှာ ပြုလုပ်ခဲ့တာ(၂)နှစ်ရှိပြီ ဖြစ်တယ်လို့ သိရပါတယ်။ 

 

 

Related News