အနောက်တိုင်းဟန်နဲ့ မြန်မာမှုလက်ရာပေါင်းစပ်ထားတဲ့ အထက(၂)ဒဂုံ (မြို့မ)ကျောင်းအဆောက်အအုံကို မြို့ပြအမွေအနှစ် သတ်မှတ်တဲ့ အနေနဲ့ အပြာရောင်ကမ္ပည်းပြားကိုနိုဝင်ဘာလ (၁၈)ရက်က တပ်ဆင်ခဲ့ပါတယ်။ရန်ကုန်မြို့တော်စည်ပင်သာယာရေး ကော်မတီနဲ့ ရန်ကုန်မြို့ပြအမွေအနှစ် ထိန်းသိမ်းစောင့်ရှောက်ရေးအဖွဲ့တို့ပူးပေါင်းပြီး ရန်ကုန်မြို့ရှိ အမွေအနှစ်အဆောက်အအုံနှင့် နေရာများကို အပြာရောင်ကမ္ပည်းပြားများ တပ်ဆင်နေတာဖြစ်ပြီး အထက(၂)ဒဂုံ (မြို့မ)ကျောင်း အဆောက်အအုံကိုတော့ (၂၃)ခုမြောက်အဖြစ် တပ်ဆင်ခဲ့တာဖြစ်တယ်လို့သိရပါတယ်။ မြို့မကျောင်းဟာ နယ်ချဲ့ပညာရေးကို ဆန့်ကျင်တဲ့ လှုပ်ရှားမှုကနေ အခြေပြုခဲ့ပြီး အမျိုးသားပညာရေးစနစ်ကို ထူထောင်ခြင်းရဲ့ ပြယုဂ်တစ်ခုဖြစ်တယ်လို့သိရပါတယ်။

ဒီကျောင်းဟာ အမျိုးသားကျောင်းအဖြစ်အောင်မြင်ခဲ့သလို နောက်ခေတ်အဆက်ဆက်မှာ မျိုးဆက်သစ်တွေကို ဆက်လက်မွေးထုတ်ပေးတဲ့ကျောင်း ဖြစ်တာကြောင့် အပြာရောင်ကမ္ပည်းပြားကို တပ်ဆင်ဂုဏ်ပြုခဲ့တာလို့ ရန်ကုန်မြို့ပြအမွေအနှစ် ထိန်းသိမ်း စောင့်ရှောက်ရေးအဖွဲ့ ဒါရိုက်တာ ဒေါ်မိုးမိုးလွင်က ပြောပါတယ်။(၁၉၂၀)ခုနှစ် ပထမကျောင်းသားသပိတ်အတွင်း အမျိုးသားကျောင်းများတည်ထောင်ဖို့စတင်ခဲ့ပြီး (၁၉၂၆)ခုနှစ်မှာ မြို့မကျောင်း ဆောက်ဖို့ မြေနေရာရရှိတာဖြစ်တယ်လို့ သိရပါတယ်။ နောက်ထပ်(၂၄)ခုမြောက် အပြာရောင်ကမ္ပည်းပြားကိုတော့ အထက(၁)လမ်းမတော်မှာ တပ်ဆင်သွားမှာဖြစ်တယ်လို့ သိရပါတယ်။ 

 

 

 

Related News