ဆီးချိုရောဂါနဲ့ တီဘီရောဂါတွဲလျက်ဖြစ်ပွားရင် သေဆုံးနိုင်ခြေ ငါးဆရှိတာကြောင့် အဆိုပါ ရောဂါနှစ်ခုကို အပြန်အလှန်စစ်ဆေး ကုသပေးနိုင်ဖို့ ကျန်းမာရေးနှင့်အားကစားဝန်ကြီးဌာနက မြို့နယ်ပေါင်း(၃၀)မှာ အကောင်အထည်ဖော်နေတယ်လို့ သိရပါတယ်။ ဒီအစီအစဉ်က ဆေးရုံဆေးခန်းတွေမှာ တီဘီရောဂါကြောင့် လာပြတဲ့သူတွေကို ဆီးချို ရှိ၊ မရှိစစ်ဆေးပေးပြီး၊ ဆီးချို ရောဂါရှိတဲ့သူတွေ ကိုတော့ တီဘီရောဂါပိုး ကူးစက်ခံရခြင်း ရှိ၊ မရှိ အပြန်အလှန်စစ်ဆေးပေးမှာဖြစ်ပါတယ်။ ဆီးချိုရောဂါသည်တွေရဲ့ ၁၅ ရာခိုင်နှုန်းမှာ တီဘီဖြစ်နိုင်ခြေရှိတာကြောင့် ကျန်းမာရေးနှင့် အားကစားဝန်ကြီးဌာနက တိုင်းဒေသကြီးနဲ့ ပြည်နယ်အသီးသီးက မြို့နယ်သုံးဆယ်မှာ ရောဂါနှစ်ခု အပြန်အလှန်စစ်ဆေးနိုင်အောင်၊ ကုသမှုတွေ ပေးနိုင်အောင် စတင်ဆောင်ရွက်နေတာဖြစ်ပါတယ်။

အခုနှစ်ထဲမှာ ဆီးချိုသွေးချို ရောဂါနှင့် တီဘီရောဂါတိုက်ဖျက်ရေးလုပ်ငန်းများ အပြန်အလှန် ပူးပေါင်းဆောင်ရွက်ရေးလုပ်ငန်းလမ်းညွှန် စာအုပ်ကို ကျန်းမာရေးနှင့် အားကစားဝန်ကြီးဌာနက တရားဝင်ထုတ်ဝေခဲ့ပြီး အမျိုးသားတီဘီရောဂါ စီမံကိန်းနဲ့ ဆီးချိုသွေးချိုရောဂါ ကာကွယ်ရေး ထိန်းသိမ်းစီမံချက် တို့ အတူ ပူးပေါင်းဆောင်ရွက်ကြမှာ ဖြစ်ပါတယ်။ဆီးချိုရောဂါသည်တွေမှာ တီဘီရောဂါတွေ့ ခဲ့ရင် သက်ဆိုင်ရာ တီဘီ ဆေးခန်းတွေမှာ ဆေးခြောက် လစာ ထုတ်ယူနိုင်မှာဖြစ်ပါတယ်။ တီဘီရောဂါသည်တွေမှာ ဆီးချိုရောဂါတွေ့ခဲ့ရင်တော့ သက်ဆိုင်ရာ ဆရာဝန်ရဲ့ လမ်းညွန်ကုသမှုနဲ့ ဆီးချိုရောဂါကို ကုသမှုခံယူ နိုင်အောင် လုပ်ဆောင်ပေးမယ်လို့သိရပါတယ်။

အဆိုပါရောဂါနှစ်ခု တစ်ပြိုင်နက် တွဲဖြစ်ရင်တော့ ကုသရတဲ့ ဆေးဝါးတွေ ထိရောက်မှုမရှိတာနဲ့ သေဆုံးနိုင်ခြေ ငါးဆ အထိ မြင့်တက်သွားတာကြောင့် ဒီလို စီမံကိန်းကို အကောင်အထည်ဖော်ဆောင်ရွက်နေတာလို့ သိရပါတယ်။ ဒီစီမံကိန်းအတွင်းမှာ မြန်မာနိုင်ငံ ဆရာဝန်များအသင်းကလည်း ပူးပေါင်းပါဝင်ဆောင်ရွက်နေပြီး ရောဂါရှာဖွေ ရေးလုပ်ငန်းတွေနဲ့ ပတ်သက် တာတွေ ဆရာဝန်တွေကို လေ့ကျင့်သင်ကြားပေးနေတယ်လို့ သိရပါတယ်။ကမ္ဘာ့ကျန်းမာရေးအဖွဲ့ရဲ့ ၂၀၁၆ လေ့လာမှု စစ်တမ်းတွေအရ မြန်မာနိုင်ငံမှာ တီဘီရောဂါဖြစ်ပွားမှုအများဆုံးက အဆင့် ၁၃ နေရာမှာ တည်ရှိနေတယ်လို့သိရပါတယ်။ မြန်မာနိုင်ငံရဲ့ ဆီးချိုသွေးချိုရောဂါဖြစ်နှုန်းကလည်း အသက်၂၅ နှစ်နဲ့ အသက် (၆၀) အကြားက လူဆယ်ယောက်မှာ တစ်ယောက်နှုန်း ဖြစ်ပွားနေပြီး ပြည်တွင်းမှာ ဆီးချိုရောဂါခံစားနေရသူ တစ်သန်းခန့်ရှိတယ်လို့ သိရပါတယ်။  

 

 

 

Related News