လမ်းမတော်မြို့နယ်၊ ဘုန်းကြီးလမ်းပေါ်မှာတည်ရှိတဲ့ လမ်းသစ်အိမ်ရာ စီမံကိန်း ကို နိုဝင်ဘာလ (၁၈)ရက်ကရတနာပိုင်တိုင် စိုက်ထူခဲ့ပါတယ်။ လမ်းသစ်အိမ်ရာစီမံကိန်းကို မြို့ပြနှင့်အိမ်ရာဖွံ့ဖြိုးရေးဦးစီးဌာနနဲ့စေပိုင်ဖွံ့ဖြိုးမှု ကုမ္ပဏီလီမိတက်တို့အကျိုးတူပူးပေါင်း ဆောင်ရွက်တာဖြစ်ပြီး လမ်းသစ်အိမ်ရာ စီမံကိန်းရတနာပိုင်တိုင် စိုက်ထူတဲ့အခမ်းအနားကို ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဟန်ဇော်နဲ့ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းတို့က  စက်ခလုတ်နှိပ်ကာရတနာပိုင်တိုင် စိုက်ထူခဲ့ပါတယ်။ဒီစီမံကိန်းနယ်မြေမှာ (၂၅) ထပ်ပါ တိုက် (၂) လုံး၊ Shop House (၂၈) လုံး၊ ဘတ်စ်ကား၊ တက္ကစီ လွှဲပြောင်း သယ်ယူပို့ဆောင်ရေး နေရာတွေအပြင် အမိုးပါ လူသွားစင်္ကြံလမ်းတွေကို သုံးနှစ်ခွဲအချိန်အတွင်း စေပိုင်ဖွံ့ဖြိုးမှုကုမ္ပဏီ လီမိတက်က တာဝန်ယူဆောက်လုပ်သွားမှာဖြစ်ပါတယ်။ ဒါပေမယ့်  စီမံကိန်းနယ်မြေအတွင်း Shop House (၂၈) လုံးကိုတော့တစ်နှစ်ခွဲအတွင်း အပြီးသတ်ဆောက်လုပ်မှာ ဖြစ်တယ်လို့စေပိုင်ဖွံ့ဖြိုးမှု ကုမ္ပဏီလီိမိတက်ကနေသိရပါတယ်။  (၂၅) ထပ်ပါ တိုက် (၂) လုံးကတော့ အထပ်မြင့်ဖြစ်တာကြောင့် ဆောက်လုပ်ခွင့်ကျဖို့စာတင်ထားဆဲ ဖြစ်တယ်လို့သိရပါတယ်။ 

လမ်းသစ်အိမ်ရာစီမံကိန်းနယ်မြေအတွင်း မူလနေထိုင်သူဦးရေ (၂၆၉) ဦးရှိခဲ့ပြီး စီမံကိန်းဆောက်လုပ်ချိန်အတွင်းမှာ အိမ်ငှားရမ်းနေထိုင်ဖို့ တစ်ဦးကိုငွေကျပ် (၁၂၄) သိန်းခြောက်သောင်း ပေးအပ်ခဲ့တယ်လို့သိရပါတယ်။  အဆိုပါ စီမံကိန်းပြီးသွားရင်လည်း (၂၅) ထပ် လူနေတိုက်မှာ မူလနေထိုင်သူတွေကို အခန်းတခန်းစီ ပြန်လည်ပေးအပ်မှာ ဖြစ်တယ်လို့သိရပါတယ်။။ ယခင်က လမ်းသစ်ရိပ်သာ အိမ်ရာစခန်းမှာ နေထိုင်ပြီး စီမံကိန်းကြောင့် ပြောင်းရွှေ့နေထိုင်နေသူ ဒေါ်ခင်လှမြင့်ကလည်း အရင်က နေထိုင်တဲ့ အိမ်ရာက သက်တမ်းကြာမြင့်နေပြီဖြစ်ပြီး ပြန်လည်တည်ဆောက်ပြီးရင် အဆင့်မြင့်တိုက်ခန်း တခန်းရရှိမှာဖြစ်တဲ့အတွက် ဝမ်းသာကြောင်း ဆိုပါတယ်။ ရန်ကုန်မြို့အတွင်း နိုင်ငံပိုင် အငှားအိမ်ရာ စီမံကိန်းကိုးခုရှိပြီး လမ်းသစ်အိမ်ရာစီမံကိန်းက ယခု အစိုးရသက်တမ်းအတွင်း မြေပြင်မှာ ပထမဆုံးအကြိမ် အကောင်ထည်ဖော်တဲ့ အိမ်ရာစီမံကိန်းဖြစ်ပါတယ်။ ဒါ့အပြင် ပုစွန်တောင် ပြည်တော်သစ်အိမ်ရာနဲ့ ရန်ကင်းအိမ်ရာတို့ကိုလည်း အဆင့်မြှင့်တင် ပြန်လည်တည်ဆောက်သွားမယ်လို့ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းကပြောခဲ့ပါတယ်။ 

 

Related News