ရန်ကုန်မြို့တော်စည်ပင်သာယာရေးကော်မတီဝင် အဆင့်ဆင့် ရွေးကောက်တင်မြှောက်နိုင်ရေးအတွက် ရွေးကောက်ပွဲကို အခုနှစ် မတ်လ(၃၁)ရက်မှာကျင်းပဖို့ ထုတ်ပြန်ကြေညာတာနဲ့ ရွေးကောက်ပွဲလုပ်ငန်းစဉ်တွေအကြောင်းကို  ရန်ကုန်မြို့ စည်ပင်သာယာ ရွေးကောက်ပွဲကော်မရှင်က ဇန်န၀ါရီလ(၁၆)ရက်က ရန်ကုန်မြို့ မြို့တော်ခန်းမမှာ သတင်းစာရှင်းလင်းခဲ့ပါတယ်။တိုင်းဒေသကြီးအဆင့် ရန်ကုန်မြို့တော်စည်ပင်သာယာရွေးကောက်ပွဲကော်မရှင်ကို ရွေးကောက်ပွဲအတွေ့အကြုံရှိတဲ့ ပုဂ္ဂိုလ်(၇)ဦး၊ ဌာနဆိုင်ရာပုဂ္ဂိုလ်(၈)ဦး စုစုပေါင်း(၁၅)ဦးနဲ့ ဇန်န၀ါရီလ(၃)ရက်က ရန်ကုန်တိုင်းဒေသကြီး အစိုးရအဖွဲ့က ဖွဲ့စည်းအတည်ပြုပြီး ဇန်န၀ါရီလ(၁၀)ရက်မှာ ထုတ်ပြန်ကြေညာခဲ့တယ်လို့ ကော်မရှင်က ရှင်းလင်းပြောကြားခဲ့ပါတယ်။ ရန်ကုန်မြို့တော်စည်ပင်သာယာ ရွေးကောက်ပွဲကော်မရှင်အနေနဲ့ မြို့နယ်စည်ပင်သာယာရွေးကောက်ပွဲ ကော်မရှင်တွေကိုဖွဲ့စည်းပြီး အစိုးရအဖွဲ့ကိုတင်ပြထား တယ်လို့လည်းဆိုပါတယ်။

အဲဒီနောက် ရပ်ကျေးအဖွဲ့တွေဖွဲ့ရအုံးမှာလည်းဖြစ်ပါတယ်။ မဲစာရင်းအတွက် လူဦးရေစာရင်းကို အစိုးရ အဖွဲ့ကနေ ကောက်ယူပေးဖို့စီစဉ်ထားပြီး ဒီလူစာရင်းပေါ်အခြေခံကာ မဲစာရင်းကို ဆောင်ရွက်သွားမှာဖြစ်ပါတယ်။ မဲစာရင်း ကြေညာမယ့်ရက်ကိုတော့ သတ်မှတ်ထုတ်ပြန်နိုင်ခြင်း မရှိသေးဘူးလို့ သိရပါတယ်။ဒီနှစ် ရန်ကုန်မြို့တော်စည်ပင်သာယာရွေးကောက်ပွဲမှာတော့ မဲစာရင်းတွေ၊မဲရုံတွေပိုများမှာဖြစ်ပါတယ်။ မဲဆန္ဒရှင်တွေအနေနဲ့  ပထမအဆင့် ဗဟိုကော်မတီဝင်(၆)ဦးကိုရွေးချယ်ရမှာဖြစ်ပြီး ဒုတိယအဆင့်အဖြစ်  မြို့နယ်တစ်ခုကို ကော်မတီဥက္ကဋ္ဌနဲ့ အဖွဲ့ဝင်(၂)ဦးစုစုပေါင်း မြို့နယ်အဆင့်(၃)ဦးရွေးရမှာဖြစ်ပါတယ်။ ဒီနှစ်ရန်ကုန်မြို့တော်စည်ပင်သာယာရွေးကောက်ပွဲမှာ မဲပေးပိုင်ခွင့်ရှိသူတွေကတော့ အသက်(၁၈)နှစ်ပြည့်ပြီး စည်ပင်သာယာနယ်နမိတ်အတွင်း ကိုယ်နေထိုင်ရာ ရပ်ကွက်မှာ တစ်နှစ်နဲ့အထက်နေထိုင်ထားပြီးသား မည်သူမဆို ဆန္ဒမဲပေးခွင့်ရှိမှာဖြစ်ပါတယ်။

ရန်ကုန်မြို့တော်စည်ပင်သာယာရေးကော်မတီဝင် ကိုယ်စားလှယ်လောင်းအမည်စာရင်းကို ဇန်န၀ါရီလ(၁၈) ရက်ကစတင်ပြီး ရုံးချိန်အတွင်းတင်သွင်းနိုင်ပြီး ဇန်န၀ါရီလ(၂၈)ရက် ညနေ(၄)နာရီထိ နောက်ဆုံးထားလက်ခံသွားမှာ ဖြစ်ပါတယ်။ ကိုယ်စားလှယ်လောင်းအမည်စာရင်းတင်သွင်းလွှာ ရုပ်သိမ်းလိုပါက ဇန်န၀ါရီလ(၂၉)ရက်ကနေ (၃၀)ရက်ထိ လက်ခံသွားမှာ ဖြစ်ပါတယ်။ ကိုယ်စားလှယ်လောင်းအမည်စာရင်း တင်သွင်းလွှာများစိစစ်တာကိုတော့ ဇန်န၀ါရီလ(၃၀)ရက်ကနေ ဖေဖော်ဝါရီလ(၆)ရက်ထိ ပြုလုပ်သွားမှာဖြစ်ပါတယ်။ ကိုယ်စားလှယ်လောင်းများ အယူခံတင်သွင်းနိုင်တဲ့ရက်ကိုတော့ ဖေဖော်ဝါရီ(၇)ရက်ကနေ(၁၃)ရက်ထိ သတ်မှတ်ပေးထားပါတယ်။ ကော်မရှင်က ကိုယ်စားလှယ်လောင်း အမည်စာရင်းအတည်ပြုမယ့်ရက်ကို ဖေဖော်ဝါရီလ(၁၄)ရက်နေ(၁၇)ရက်အထိ သတ်မှတ်ထားပြီး ဖေဖော်ဝါရီလ(၁၈)ရက်မှာတော့ ကိုယ်စားလှယ်လောင်း အမည်စာရင်းတွေကို ထုတ်ပြန်ကြေညာသွားမှာဖြစ်ပါတယ်။ ကိုယ်စားလှယ်လောင်းတွေရဲ့ မဲဆွယ်ရက်ကိုတော့ ဖေဖော်ဝါရီလ(၂၈)ရက်ကနေ မတ်လ(၂၉)ရက်ထိ ခွင့်ပြုပေးထားပါတယ်။ မတ်လ(၃၀)ရက်ကတော့ မဲဆွယ်စည်ရုံးမှုရပ်နားရမယ့်ရက်( Silent Day)ဖြစ်တယ်လို့ သိရပါတယ်။

 

 

Related News