ရန်ကုန်တိုင်းဒေသကြီးလွှတ်တော်အနေနဲ့ (၂၀၁၈)ခုနှစ်အတွင်း အသစ် ပြဋ္ဌာန်းလိုက်တဲ့ ရန်ကုန်မြို့တော် စည်ပင်သာယာရေး ဥပဒေ(၂၀၁၈) အပါအ၀င် စုစုပေါင်း ဥပဒေ(၉)ခုကို အတည်ပြု၊ပြဋ္ဌာန်းပေးထားတယ်လို့ ရန်ကုန်တိုင်းဒေသကြီး လွှတ်တော်ဥပဒေကြမ်းကော်မတီက ပြောပါတယ်။ ဒီဥပဒေတွေကတော့ ရန်ကုန်မြို့တော်စည်ပင်သာယာရေးဥပဒေ (၂၀၁၈)၊ ၂၀၁၈ခုနှစ်ရန်ကုန်တိုင်းဒေသကြီး၏ အခွန်အခဥပဒေ၊ ရန်ကုန်တိုင်း ဒေသကြီးယစ်မျိုးခွန်ဥပဒေကို ဒုတိယအကြိမ်ပြင်ဆင်သည့် ဥပဒေတွေက အဓိကပြင်ဆင်ပြဋ္ဌာန်းဖြစ်တဲ့ဥပဒေတွေဖြစ်ခဲ့ပြီး ဒီဥပဒေတွေကို နောက်ထပ်ပြန်လည်ပြင်ဆင်တဲ့ ဥပဒေတွေအဖြစ်  ၂၀၁၈ခုနှစ်ရန်ကုန်တိုင်းဒေသကြီးအခွန်အခဥပဒေကို ပြင်ဆင်သည့်ဥပဒေ၊ ရန်ကုန်မြို့တော် စည်ပင်သာယာရေးဥပဒေကို ပြင်ဆင်တဲ့ဥပဒေတွေနဲ့ကျန်တာတွေကတော့ ရန်ကုန်တိုင်းဒေသကြီးအစိုးရအဖွဲ့က ဘဏ္ဍာနှစ်အလိုက် နှစ်စဉ် တင်သွင်း ရတဲ့ဘတ်ဂျက်ဥပဒေ၊ ဒေသန္တရစီမံကိန်းဥပဒေတွေပဲဖြစ်တယ်လို့ ရန်ကုန်တိုင်းဒေသကြီးလွှတ်တော် ဥပဒေကြမ်း ကော်မတီအဖွဲ့ဝင် ဦးသော်တာအောင်ကပြောပါတယ်။

ယစ်မျိုးခွန်ဥပဒေတွေနဲ့ အခွန်အခဥပဒေတွေအနေနဲ့ကလည်း ခေတ်စနစ်တွေနဲ့ ကိုက်ညီမှုရှိအောင် နှစ်စဉ်လိုလို ပြင်ဆင်ပြဋ္ဌာန်းလာခဲ့တာဖြစ်တယ်လို့လည်းသိရပါတယ်။ ဒီဥပဒေတွေထဲ ရန်ကုန်မြို့တော်စည်ပင် သာယာရေးဥပဒေ(၂၀၁၈)ကို ပြဋ္ဌာန်းနိုင်ရေးအတွက်ကိုတော့ တိုင်းဒေသကြီးအစိုးရအဖွဲ့ အပါအ၀င် သက်ဆိုင်ရာဌာနတွေနဲ့တိုင်း ဒေသကြီးလွှတ်တော်ကိုယ်စားလှယ်တွေ၊ ရေးရာကော်မတီတွေအနေနဲ့ အချိန်ပေးကာ အားလုံစုပေါင်းစိစစ်လုပ်ဆောင်ခဲ့ရတယ်လို့လည်းဆိုပါတယ်။ ဒီဥပဒေတွေ ပြန်လည်ပြင်ဆင် ပြဋ္ဌာန်းရတဲ့အကြောင်းတွေနဲ့ပတ်သက်လို့ ဥပဒေကြမ်းကော်မတီအဖွဲ့ဝင် ဦးသော်တာအောင်က ခုလိုပြောပါတယ်။

ရန်ကုန်မြို့တော်စည်ပင်သာယာရေးဥပဒေ(၂၀၁၈) ကိုဝန်ကြီးချုပ်ဦးဖြိုးမင်းသိန်းအတည်ပြု၊လက်မှတ်ရေးထိုးပြဌာန်းပွဲမှာ ၀န်ကြီးချုပ် ဦးဖြိုးမင်းသိန်းက ဒီဥပဒေဟာ အနာဂတ်ရန်ကုန်မြိုတော်အတွက် အရေးကြီးဆုံးဥပဒေဖြစ်ပြီး မြို့တော်ကို မောင်နှင်သွားမယ့် ဥပဒေဖြစ်လို့ ဌာနဆိုင်ရာတွေအပါအ၀င် အများပြည်သူတွေလိုက်နာဆောင်ရွက်ရမှာ ဖြစ်တယ်လို့ ပြောကြားခဲ့သလို ရန်ကုန်မြို့တော်ဝန်ကလည်း မြို့တော် စည်ပင်သာယာလုပ်ငန်းတွေ ဒီမိုကရေစီစံနှုန်းနဲ့ကိုက်ညီစေဖို့ မြို့တော်သူ၊မြို့တော်သားတွေရဲ့ လိုအပ်ချက်တွေ အပြည်အ၀ရရှိစေဖို့၊ စီးပွားရေး မြို့တော်ကြီးတစ်ခုဖြစ်စေမယ့် ဥပဒေတစ်ရပ်အတည်ပြုပြဋ္ဌာန်းနိုင်အောင် လုပ်ဆောင်ခဲ့တာဖြစ်တယ်လို့ပြောကြားခဲ့ပါတယ်။

လက်ရှိမှာ ဒီဥပဒေအပေါ် မြို့တော်စည်ပင်က ဆောင်ရွက်နေမှုအခြေအနေနဲ့ ပတ်သက်လို့ဒဂုံမြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျက ခုလိုသုံးသပ်ပြောကြားပါတယ်။အခုအစိုးရလက်ထက် (၂၀၁၆)ခုနှစ်ကစတင်ခဲ့တဲ့ ဒုတိယအကြိမ်ရန်ကုန်တိုင်းဒေသကြီးလွှတ်တော်မှာတော့ ပထမပုံမှန်အစည်းအဝေးကနေ သတ္တမပုံမှန်အစည်းအဝေးထိ ပုံမှန်အစည်းအဝေး(၇)ကြိမ်နဲ့ အထူးအစည်းအဝေး (၁)ကြိမ်၊ အရေးပေါ် အစည်းအဝေး(၁)ကြိမ် ကျင်းပပြုလုပ် နိုင်ခဲ့ပြီး ဒီအစည်းအဝေးတွေကနေ ပြင်ဆင်ပြဋ္ဌာန်းခဲ့တဲ့ဥပဒေတွေအနေနဲ့ (၂၀၁၈)ခုနှစ်အတွင်းက ပြဋ္ဌာန်းခဲ့တဲ့ဥပဒေတွေ အပါအ၀င် (၁၇)ခုဝန်းကျင်ရှိခဲ့တယ်လို့သိရပါတယ်။ ဒီထဲမှာ ရန်ကုန်တိုင်း ဒေသကြီးအတွင်းဖြစ်ပေါ်လာနိုင်တဲ့မီးဘေး၊ သဘာဝဘေးအန္တရာယ် တွေနဲ့ ပတ်သက်လို့ အများပြည်သူအတွက် ဥပဒေနဲ့ အညီမူဝါဒချမှတ်ကာ စနစ်တကျထိထိရောက်ရောက် ကြိုတင်ပြင်ဆင်ကာကွယ် လုပ်ဆောင်နိုင်ဖို့ ရန်ကုန်တိုင်းဒေသကြီး မီးဘေးနှင့် သဘာဝဘေးအန္တရာယ်ကြိုတင်ကာကွယ်ရေးဥပဒေကိုလည်း (၂၀၁၇)ခုနှစ်ကတည်းက ပြဋ္ဌာန်းပေးထား တယ်လို့လည်း သိရပါတယ်။

 

 

Related News