လာမယ့် မတ်လ(၃၁)ရက်မှာ ကျင်းပပြုလုပ်မယ့် ရန်ကုန်မြို့တော်စည်ပင်သာယာရွေးကောက်ပွဲမှာ တပ်မတော်၊ ရဲတပ်ရင်းအ၀န်းအ၀ိုင်းတွေမှာ နေထိုင်တဲ့တပ်ဖွဲ့ဝင်မိသားစုတွေအနေနဲ့ဆန္ဒမဲပေးခွင့်ရရှိမှာမဟုတ်ကြောင်း ရန်ကုန်မြို့တော်စည်ပင်သာယာရွေးကောက်ပွဲကော်မရှင်က ပြောကြားပါတယ်။ရန်ကုန်မြို့တော်စည်ပင်သာယာနယ်နိမိတ်အတွင်းရှိ တပ်မတော်အ၀န်းအ၀ိုင်းမှာနေထိုင်တဲ့ တပ်မတော်သားတွေ၊ မိသားစုဝင်တွေ၊ ရဲတပ်ရင်းတွေက ရဲတပ်ဖွဲ့ဝင်မိသားစုတွေအနေနဲ့ ခု(၂၀၁၉)ခုနှစ်၊ မတ်လ(၃၁)ရက်မှာ ကျင်းပမယ့် ရန်ကုန်မြို့တော်စည်ပင်သာယာရွေးကောက်ပွဲမဲစာရင်းမှာ ပါဝင်မှာမဟုတ်သလို ဆန္ဒမဲပေးခွင့်ရရှိမှာ မဟုတ်ဘူးလို့ကော်မရှင်က စည်ပင်သာယာရွေးကောက်ပွဲနည်းဥပဒေအရ ကြေညာခဲ့ပါတယ်။ ဒီတပ်ဖွဲ့ဝင် မိသားစုတွေအနေနဲ့မြို့တော်စည်ပင်အပါအ၀င် အုပ်ချုပ်ရေးအဖွဲ့အစည်းတွေရဲ့ စီမံခန့်ခွဲမှုအောက်မှာမရှိဘဲ တပ်ရင်းတွေရဲ့ စီမံခန့်ခွဲမှုအောက်မှာ ရှိနေတာကြောင့်ဖြစ်တယ်လို့ ရန်ကုန်မြို့တော်စည်ပင်သာယာရွေးကောက်ပွဲ ကော်မရှင်ဥက္ကဋ္ဌ ဦးအောင်ခိုင်က ရှင်းလင်းပြောကြားပါတယ်။

ရန်ကုန်မြို့တော်စည်ပင်သာယာနယ်နိမိတ်အတွင်းရှိ မြို့နယ်ရဲစခန်းတွေ၊မြို့မရဲစခန်းတွေမှာနေထိုင်ကြတဲ့ ရဲတပ်ဖွဲ့ဝင်မိသားစုတွေကတော့ မဲပေးခွင့်ရရှိမှာဖြစ်ပြီး ရွေးကောက်ပွဲနေ့မှာ တာဝန်ထမ်းဆောင်နေရလို့မအားလပ်ရင်လည်း ကြိုတင်မဲပေးခွင့်ရှိတယ်လို့ပြောပါတယ်။ယခု(၂၀၁၉)ခုနှစ်၊ မတ်လ(၃၁)ရက်မှာကျင်းပမယ့် ရန်ကုန်မြို့တော်စည်ပင်သာယာရွေးကောက်ပွဲမှာ မဲပေးပိုင်ခွင့် ရှိသူတွေကတော့ အသက်(၁၈)နှစ်ပြည့်ပြီး စည်ပင်သာယာနယ်နမိတ်အတွင်း ကိုယ်နေထိုင်ရာ ရပ်ကွက်မှာ တစ်နှစ်နဲ့အထက်နေထိုင်ထားပြီးသား ဘယ်သူမဆို ဆန္ဒမဲပေးခွင့်ရှိမှာလည်းဖြစ်ပါတယ်။ (၂၀၁၄) ခုနှစ်ကကျင်းပခဲ့တဲ့ ရန်ကုန်မြို့တော်စည်ပင်သာယာရွေးကောက်ပွဲမှာတော့ အိမ်ထောင်စုတစ်ခုကို တစ်ဦးသာ မဲပေးခွင့်ရှိခဲ့တာဖြစ်ပါတယ်။ ဒါ့ကြောင့် ဒီနှစ် ရန်ကုန်မြို့တော်စည်ပင်သာယာရွေးကောက်ပွဲမှာ မဲပေးခွင့်ရှိသူနဲ့ မဲရုံတွေဟာ (၂၀၁၄)ခုနှစ်ရန်ကုန်မြို့တော်စည်ပင်သာယာရွေးကောက်ပွဲက စာရင်းထက် အနည်းဆုံး(၄၊၅)ဆ ခန့်ပိုများဖို့ရှိနေပါတယ်။

 

 

 

 

 

 

Related News