ရန်ကုန်မြို့တော်စည်ပင်သာယာရွေးကောက်ပွဲ မဲစာရင်းတွေကို ရွေးကောက်ပွဲမကျင်းပမီ(၂)ပတ်ခန့် အလိုလောက်မှာသာ ထုတ်ပြန်ကြေညာ ပေးနိုင်ဖို့ အခြေအနေရှိနေတယ်လို့ ရန်ကုန်မြို့တော်စည်ပင်သာယာရွေးကောက်ပွဲကော်မရှင်က ပြောကြားထားပါတယ်။ မဲစာရင်းတွေ ထုတ်ပြန်နိုင်ဖို့အတွက် လူဦးရေစာရင်းတွေကို ရန်ကုန်တိုင်းဒေသကြီးအစိုးရအဖွဲ့က လက်ရှိကောက်ခံနေပြီး ကော်မရှင်ထံ ဖေဖော်ဝါရီလ(၇)ရက်နောက်ဆုံးထားပေးပို့နိုင်ဖို့ လုပ်ဆောင်နေတယ်လို့ ရန်ကုန်မြို့တော်စည်ပင်သာယာရွေးကောက်ပွဲကော်မရှင်က ပြောပါတယ်။ လာမယ့်မတ်လ(၃၁)ရက်မှာ ကျင်းပမယ့် ရန်ကုန်မြို့တော်စည်ပင်သာယာရွေးကောက်ပွဲကို အသက်(၁၈)နှစ်ပြည့်ပြီး စည်ပင် သာယာနယ်နမိတ်အတွင်း ကိုယ်နေထိုင်ရာရပ်ကွက်မှာ တစ်နှစ်နဲ့ အထက်နေထိုင်ထားပြီးသား မည်သူမဆို ဆန္ဒမဲပေးခွင့်ရှိတာကြောင့် အိမ်ထောင်စုတစ်ခုကိုတစ်ဦးသာမဲပေးခွင့်ရှိခဲ့တဲ့ (၂၀၁၄)ခုနှစ် ရန်ကုန်မြို့တော် စည်ပင်သာယာ ရွေးကောက်ပွဲထက်  မဲပေးပိုင်ခွင့်ရှိသူ၊ မဲစာရင်းပိုများမှာဖြစ်ပါတယ်။ ဒါ့ကြောင့်မဲစာရင်းတွေကို ရွေးကောက်ပွဲမကျင်းပမီ(၂)ပတ်ခန့်အလိုလောက်မှာ ထုတ်ပြန်ကြေညာပေးနိုင်အောင် လုပ်ဆောင်သွားမယ်လို့ ပြောကြားထားပါတယ်။ ကော်မရှင်အနေနဲ့လူဦးရေစာရင်းရရှိပြီးရင်တော့ မဲစာရင်းတွေပြုစုဖို့ လူနဲ့ ကွန်ပျူတာ အင်အားအများအပြားသုံးပြီး လုပ်ဆောင်သွားရမှာဖြစ်တယ်လို့  ရန်ကုန်မြို့တော်စည်ပင်သာယာရွေးကောက်ပွဲကော်မရှင်ဥက္ကဋ္ဌ ဦးအောင်ခိုင်က ပြောပါတယ်။

မဲစာရင်းထုတ်ပြန်ကြေညာချိန်မှာ မဲပေးခွင့်ရှိသူတွေအနေနဲ့ မဲစာရင်းတွေပါမပါကို ကြည့်ရှုဖို့လိုအပ်သလို မဲစာရင်းတွေမှားတာ၊ မပါတာ၊ သေဆုံးသူတွေပါဝင်နေတာစတာတွေကို သက်ဆိုင်ရာမဲစာရင်းထုတ်ပြန် ကြေညာတဲ့နေရာတွေမှာ ချက်ချင်းပြင်ဆင်နိုင်ဖို့နဲ့ မဲပေးပိုင်ခွင့် ရှိသူတိုင်းဆန္ဒမဲပေးနိုင်အောင် စီစဉ်ထားတယ်လို့လည်း သိရပါတယ်။ရန်ကုန်မြို့တော်စည်ပင်သာယာရွေးကောက်ပွဲကို ၂၀၁၉ခုနှစ်၊ မတ်လ(၃၁)ရက်မှာ ကျင်းပမယ်လို့  ရန်ကုန်မြို့တော်စည်ပင်သာယာ ရွေးကောက်ပွဲကော်မရှင်က တရားဝင်ထုတ်ပြန်မကြေညာခင်မှာ မဲစာရင်းတွေကို ဖေဖော်ဝါရီလ(၁၅)ရက် နောက်ဆုံးထား ထုတ်ပြန်ပေး သွားမယ်လို့ သတင်းထွက်ပေါ်ခဲ့ပါတယ်။ ဒီအခြေအနေနဲ့ပတ်သက်လို့ ဖေဖော်ဝါရီလ(၁၅)ရက်နောက်ဆုံးထား ထုတ်ပြန်နိုင်ဖို့ အခက်အခဲတွေ ရှိလို့ အဆင်မပြေနိုင်သေးဘူးလို့လည်း ကော်မရှင်ဥက္ကဋ္ဌဦးအောင်ခိုင်က ပြောကြားထားပါတယ်။ 

 

Related News