မြန်မာနိုင်ငံမှာတော့ (၂၀၁၈)ခုနှစ် သြဂုတ်လ(၁)ရက်ကစပြီး ကုမ္ပဏီတွေနဲ့ပတ်သက်ပြီး ဥပဒေသစ်နဲ့ စတင်ကျင့်သုံးနေတာဖြစ်ပါတယ်။ဒီဥပဒေသစ်အရ ကုမ္ပဏီအားလုံးဟာ ပြန်လည်မှတ်ပုံတင်ရမှာဖြစ်ပါတယ်။ကုမ္ပဏီဥပဒေသစ်နဲ့အတူ အွန်လိုင်းမှတ်ပုံတင်စနစ် (MyCo) ကိုပါပြောင်းလဲကျင့်သုံးလိုက်တာကြောင့် အရင်မှတ်ပုံတင်ထားတဲ့ ကုမ္ပဏီအားလုံးဟာ အွန်လိုင်းကနေ မဖြစ်မနေပြန်လည်မှတ်ပုံတင်ရမှာဖြစ်ပါတယ်။မှတ်ပုံတင်ကာလကိုတော့ ၂၀၁၈ခုနှစ် သြဂုတ်လ(၁)ရက်ကနေ ၂၀၁၉ ခုနှစ် ဇန်န၀ါရီ (၃၁)ရက် အထိ (၆)လ သတ်မှတ်ပေးထား တာဖြစ်ပြီး လက်ရှိအချိန်မှာ ပြန်လည်မှတ်ပုံတင်နိုင်တဲ့ ကာလကုန်ဆုံးသွားပြီဖြစ်ပါတယ်။

ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာနရဲ့ စာရင်းတွေအရ သတ်မှတ်ကာလအတွင်း အရင်ရှိခဲ့ တဲ့ ကုမ္ပဏီခြောက်သောင်းဝန်းကျင်ထဲက လေးသောင်းခုနှစ်ထောင်ကျော်က ပြန်လည်မှတ်ပုံတင်ခဲ့ပြီး ကုမ္ပဏီ တစ်သောင်းသုံးထောင်လောက်ကတော့ ပြန်လည်မှတ်ပုံတင်ထားခြင်းမရှိဘူးလို့သိရပါတယ်။လက်ရှိအချိန်မှာတော့ ပြန်လည်မှတ်ပုံမတင်တဲ့ ကုမ္ပဏီတွေကို ကုမ္ပဏီစာရင်းကနေပယ်ဖျက်ဖို့ စတင်လုပ်ဆောင်နေပြီလို့သိရပါတယ်။လက်ရှိအချိန်မှာ ပြန်လည်မှတ်ပုံမတင်ရသေးတဲ့ ကုမ္ပဏီတွေအနေနဲ့ ခိုင်လုံတဲ့အကြောင်းပြချက်ပြနိုင်မှသာ ဒဏ်ကြေးငွေပေးဆောင်ကာ ပြန်လည်မှတ်ပုံတင်နိုင်မယ်လို့သိရပါတယ်။အကြောင်းပြချက်မပေးနိုင်ပါက ကုမ္ပဏီအသစ်အဖြစ် ထပ်မံမှတ်ပုံတင်ကာ လုပ်ငန်းဆောင်ရွက်ရမှာဖြစ်တယ်လို့သိရပါတယ်။

အသစ်ပြန်လည်မှတ်ပုံတင်ပါကလည်း နှစ် နှစ်အတွင်း မူလကုမ္ပဏီနာမည်အတိုင်း ရရှိမှာမဟုတ်ဘူးလို့သိရပါတယ်။ခိုင်လုံတဲ့ အကြောင်းပြချက်ရှိပါက ဒဏ်ကြေးငွေကတော့ ပြန်လည်မှတ်ပုံတင်ရာမှာ ကုမ္ပဏီတစ်ခုကို ငွေကျပ် (၂)သိန်းခွဲနဲ့ အများပိုင်ကုမ္ပဏီဖြစ်ပါက ငွေကျပ်(၂၅)သိန်းပေးဆောင်ရမယ်လို့သိရပါတယ်။၂၀၁၈ ခုနှစ် သြဂုတ်လ(၁)ရက် ကစပြီး ပြည်တွင်းမှာ (၁၉၁၄) ခုနှစ် ကုမ္ပဏီများဥပဒေအစား(၂၀၁၇)ခုနှစ် မြန်မာကုမ္ပဏီများဥပဒေနဲ့ အစားထိုးကျင့်သုံးလိုက်တာဖြစ်ပါတယ်။ ဥပဒေသစ်အရ မြန်မာကုမ္ပဏီတွေမှာ နိုင်ငံခြားသား ရှယ်ယာ(၃၅)ရာခိုင်နှုန်းအထိ ပါဝင်ခွင့်ပြုခဲ့သလို တစ်ဦးတည်းနဲ့ကုမ္ပဏီ ထောင်ခွင့်လည်းရှိနေပါတယ်။

 

 

 

Related News