မန္တလေး ပန်းချီ ပန်းပု ကျောင်းသားကျောင်းသူဟောင်းတွေရဲ့ မြနန္ဒာ ပန်းချီ ပန်းပုပြပွဲကို ဖေဖေါ်ဝါရီလ (၁၆) ရက်ကနေ (၁၈)ရက် မန္တလေးမြို့ ပန်းချီပန်းပုကျောင်းမှာ ပြုလုပ်နေပါတယ်။အခုပြုလုပ်နေတဲ့ မြနန္ဒာ ပန်းချီ ပန်းပုပြပွဲမှာ (၁၉၅၃)ခုနှစ်မှ (၂၀၁၈)ခုနှစ်အထိ မန္တလေး ပန်းချီ ပန်းပု  ကျောင်းသား၊ ကျောင်းသူ ဟောင်းတွေ၊ ကျောင်းနဲ့ ပတ်သက်ဆက်နွယ်ခဲ့တဲ့ ပညာရှင်တွေ၊ ကျောင်းအုပ်နဲ့ နည်းပြ ဆရာ၊ ဆရာမတွေ၊ အငြိမ်းစားဆရာကြီး တွေရဲ့အနုပညာလက်လက်ရာတွေ ပြသနေတာဖြစ်တယ်လို့သိရပါတယ်။ ဒီပြပွဲကို အရင်ကရန်ကုန်မှာ (၃) ကြိမ်ပြုလုပ်ခဲ့ပြီး အခုမန္တလေးမှာ (၄) ကြိမ်မြောက်အဖြစ် ပြုလုပ်တာဖြစ်တယ်လို့ သိရပါတယ်။ ဒီပြပွဲကို မန္တလေး ပန်းချီ ပန်းပုကျောင်းမှာ လက်ရှိတက်ရောက်နေတဲ့ ကျောင်းသားကျောင်းသူတွေအနေနဲ့ ကျောင်းဆင်းပညာရှင်တွေ၊ ကျောင်းသားဟောင်းတွေကို သိရှိစေဖို့နဲ့ မန္တလေးမြို့ရှိ ပန်းချီဝါသနာရှင်တွေ လာရောက်ကြည့်ရှုနိုင်ဖို့ ပြုလုပ်တာ ဖြစ်တယ်လို့ မန္တလေးပန်းချီပန်းပုကျောင်းရဲ့ တာဝန်ခံကျောင်းအုပ် ဦးစိုးဝင်းအောင်က ပြောပါတယ်။ ဒီပြပွဲမှာ ပန်းချီပန်းပုပညာရှင် (၁၄၀)ကျော်ရဲ့ ရေဆေး၊ ဆီဆေး ပန်းချီကားပေါင်း (၂၀၀) ကျော်နဲ့ ပန်းပု (၃၀) ကျော် ပြသထားတာ ဖြစ်ပါတယ်။ ဒါ့အပြင် ပြင်ပပညာရှင်တွေရဲ့ ပန်းချီပန်းပုပညာရပ်ဆိုင်ရာ ဟောပြောပို့ချပေးမယ့် အစီအစဉ်တွေလည်း ပါဝင်တယ်လို့ သိရပါတယ်။  ဒီပြပွဲမှာ ကျောင်းသားကျောင်းသူတွေအနေနဲ့ ပညာရှင်တွေရဲ့ အနုပညာလက်ရာတွေကို ကြည့်ရှုနိုင်ပြီး ပန်းချီပညာရပ်ကို ဆက်လက် လေ့လာဖို့ အတွက် ပညာရပ်ဆိုင်ရာအထောက်အကူတွေ ရရှိစေမှာ ဖြစ်တယ်လို့ သိရပါတယ်။

 

Related News