ရန်ကုန်တိုင်းဒေသကြီးအတွင်း သဘာဝပတ်ဝန်းကျင်အတွက်ခြိမ်းခြောက်မှုကြီးမားသော ပလတ်စတစ်သုံးစွဲမှုကို လျော့ပါးစေရေးစီမံဆောင်ရွက်ပေးဖို့တိုင်းဒေသကြီးအစိုးရအဖွဲ့သို့ တိုက်တွန်းကြောင်းအဆို ကို ဖေဖော်ဝါရီ(၁၈)ရက်က ပြုလုပ်တဲ့ ရန်ကုန်တိုင်းဒေသကြီးလွှတ်တော်အစည်းအဝေးမှာ တိုင်းဒေသကြီးလွှတ်တော်ကိုယ်စားလှယ် ဦးသန်းနိုင်ဦးက တင်သွင်းခဲ့တာပါ။ခုချိန်ကတည်းက ပလပ်စတစ်သုံးစွဲမှုလျော့ပါးအောင်မလုပ်ဆောင်၊မထိန်းချုပ်နိုင်ဘူးဆိုရင် ကမ္ဘာမြေကြီးနဲ့ နောက်မျိုးဆက်တွေ ပြသာနာပေါင်းစုံ ဆိုးဆိုးဝါးဝါးကြုံတွေ့နိုင်ပြီး ဂေဟစနစ်ပျက်စီးသွားစေနိုင်လို့ အဆိုတင်သွင်းခဲ့တာဖြစ်တယ်လို့ဆိုပါတယ်။ရန်ကုန်မြို့မှာ တစ်ရက်ကို စွန့်ပစ်အမှိုက် တန်ချိန်ပေါင်း(၂၄၀၀)နီးပါးရှိနေပြီး ဒီစွန့်ပစ်အမှိုက်တွေထဲမှာ ပလတ်စတစ်ဗူးတွေ၊ကြွပ်ကြွပ်အိတ်တွေ၊ ပလတ်စတစ်လူသုံးကုန်အဟောင်းတွေ မျိုးစုံပါဝင်နေတာလည်း ဖြစ်ပါတယ်။ ဒီပလတ်စတစ်တွေဟာ နှစ်ပေါင်းရာချီမဆွေးမြေ့၊မပျက်စီးစေတတ်သလို မြေဆီလွှာပျက်စီးစေတဲ့အန္တရာယ်၊ မီးရှို့ဖျက်ဆီးရင်လည်း လေထုညစ်ညမ်းစေတဲ့အန္တရာယ်တွေ ဖြစ်စေတယ်လို့လည်း အဆိုရှင် ဦးသန်းနိုင်ဦးက ပြောပါတယ်။ 

ဒီအဆိုကို တိုင်းဒေသကြီးလွှတ်တော်မှာ ဆွေးနွေးဖို့ တိုင်းဒေသကြီးလွှတ်တော်ကိုယ်စားလှယ် ဒေါ်မိုးမိုးစုကြည် ထောက်ခံခဲ့ပါတယ်။  တိုင်းဒေသကြီးအစိုးရအဖွဲ့ရဲ့သဘောထားမှတ်ချက်တောင်းခံရာမှာတော့  ရန်ကုန်မြို့တော်ဝန်ဦးမောင်မောင်စိုးက ဒီအဆိုကို တိုင်းဒေသကြီးလွှတ်တော်မှာဆွေးနွေးသင့်ပေမယ့် အတည်မပြုသေးဘဲ မှတ်တမ်းအဖြစ်သာထားရှိဖို့ သဘောထားမှတ်ချက်ပေးခဲ့ပါတယ်။ အတည်ပြုလိုက်ရင်တော့ အကောင်အထည်ဖော်လုပ်ဆောင်ရမှာဖြစ်ပြီး ပလပ်စတစ်အစားထိုးသုံးစွဲမှုကဏ္ဍအတွက် အဆင်သင့်မဖြစ်သေးတဲ့အခြေအနေရှိ်နေတာကြောင့် ဖြစ်တယ်လို့လည်း ရန်ကုန်မြို့တော်ဝန်က ဆိုပါတယ်။

ဒီအဆိုကို ဆွေးနွေးဖို့အတွက် ရန်ကုန်တိုင်းဒေသကြီးလွှတ်တော်က အတည်ပြုလိုက်ပြီး ဆွေးနွေးလိုတဲ့ ကိုယ်စားလှယ်တွေရဲ့ အမည်စာရင်းကို တိုင်းဒေသကြီးလွှတ်တော်ဥက္ကဋ္ဌက တောင်းခံထားပါတယ်။ဒီအဆိုကို လာမယ့်တိုင်းဒေသကြီးလွှတ်တော်ပုံမှန်အစည်းအဝေးရက်တွေမှာ ဆွေးနွေးသွားမှာဖြစ်ပြီး အတည်ပြု၊မပြုကိုလည်း ဆုံးဖြတ်သွားမှာဖြစ်ပါတယ်။

 

 

Related News