ရန်ကုန်မြို့ကို စက်ဝိုင်းပုံစံ အပြင်ဘက်ကပတ်ပြီး တည်ဆောက်မယ့် ရန်ကုန်အပြင်မြို့ပတ်လမ်းစီမံကိန်းကိုတော့ ၂၀၂၁ ခုနှစ်နောက်ပိုင်းမှာ စတင်နိုင်မယ်လို့ သိရပါတယ်။ အခုဒီစီမံကိန်းအတွက် ဒေသခံတွေနဲ့ တွေ့ဆုံပြီး ပတ်ဝန်းကျင် ဆန်းစစ်မှု (EIA) အစီအစဉ်လုပ်ဆောင်တာတွေ ပြုလုပ်နေပြီဖြစ်ပါတယ်။ ရန်ကုန် မြို့ပြင်ပတ်လမ်းကို အပိုင်းလေးပိုင်းခွဲတည်ဆောက်မှာဖြစ်ပြီး သီလ၀ါစက်မှုဇုန်ကနေ သန်လျင်၊ ကျောက်တန်းမြို့နယ် တွေကို ဖြတ်ပြီး အမြန်လမ်းအစမှာ လမ်းဆုံးမယ့် အရှေ့ဘက်အပိုင်း၊ အဲ့ဒီကနေ မှော်ဘီ၊ လှိုင်သာယာအထိ တောင်ဘက်အပိုင်း၊ လှိုင်သာယာကနေ ဒလအထိ မြို့သစ်စီမံကိန်းနဲ့ ချိတ်ဆက်နိုင်မယ့် အနောက်ဘက်အပိုင်းနဲ့ ဒလကနေ သန်လျင်အထိ မြောက် ဘက်ပိုင်းဆိုပြီး ခွဲပြီးတည်ဆောက်မှာ ဖြစ်ပါတယ်။ ဒီအပြင်ပတ်လမ်းက ကီလိုမီတာ(၁၄၀)ကျော်ရှည်မှာဖြစ်ပြီး (၆၅)ကီလိုမီတာ ရှိတဲ့ သန်လျင်-လှည်းကူး အပိုင်းကို စတင်အကောင်အထည်ဖော်ဖို့လျာထားတယ်လို့သိရပါတယ်။ ဒီအပိုင်းမှာ ကီလိုမီတာ(၁၀၀) နှုန်းအထ်ိ မောင်းနှင်နိုင်မယ့် (၆)လမ်းသွား အမြန်လမ်းဖြစ်ကာ လမ်းလွှဲ(၇)ခုနဲ့  မြစ်ကူးတံတားတစ်စင်းလည်း ပါဝင်မှာဖြစ်ပါတယ်။

 အပြင်ပတ်လမ်းကတော့ လမ်းအူကြောင်းအရ လူနေအိမ်တွေနဲ့မလွတ်တဲ့ တစ်ချို့နေရာတွေမှာ မိုးပျံလမ်း ပုံစံဆောက်လုပ်မှာ ဖြစ်ပြီး အများစုကို  အမြန်လမ်းပုံစံအသစ်ဖောက်လုပ်မှာဖြစ်ပါတယ်။၂၀၄၀ Master Plan အရ ရန်ကုန်မြို့ကို အတွင်းနဲ့အပြင် ပတ်မယ့် စက်ဝိုင်းပုံစံ ပတ်လမ်းနှစ်ခု တည်ဆောက်မှာ ဖြစ်ပြီး မိုးပျံလမ်းပုံစံ အတွင်းပတ်လမ်းကိုတော့ အခုနှစ်အတွင်းစတင် တည်ဆောက်နိုင်ဖို့ကို တင်ဒါခေါ်ထားပြီး ဖြစ်ပါတယ်။ဒီစက်ဝိုင်းပုံစံအပြင်ပတ်လမ်းက ရန်ကုန်မြို့ပြင်မှာထပ်မံပေါ်ပေါက်လာမယ့်စက်မှုဇုန်(၁၁)ခုအတွက် အထောက်အကူ ပြုနိုင်မှာ ဖြစ်သလို မြန်မာနိုင်ငံကိုဖြတ်ကျော်ဖောက်လုပ်မယ့် East West လမ်းမကြီးနဲ့လည်း ချိတ်ဆက်နိုင်မှာဖြစ်ပါတယ်။ ဒါ့အပြင် ဟံသာဝတီလေဆိပ် ၊ ထပ်မံဖောက်လုပ်ဖို့လက်ရှိမှာ ဖြစ်နိုင်ချေလေ့လာနေတဲ့ ငရုတ်ကောင်း-ပုသိမ် - ရန်ကုန်အမြန်လမ်း၊ မန္တလေး-ရွှေလီ အမြန်လမ်းတွေနဲ့လည်းချိတ်ဆက်သွားလာနိုင်မှာဖြစ်ပါတယ်။

 

Related News