ရန်ကုန်မြို့တော်စည်ပင်သာယာရေးကော်မတီ ရွေးကော်ပွဲကော်မရှင်ကနေ ရွေးကောက်ခံမယ့် ကော်မတီဝင် ကိုယ်စားလှယ်လောင်းဦးရေ စုစုပေါင်း (၂၇၃) ဦးပါဝင်တဲ့ ဆန်ခါတင်အမည်စာရင်းကို ဖေဖော်ဝါရီလ (၁၈) ရက်က အတည်ပြုထုတ်ပြန်လိုက်ပါတယ်။ ယခုနှစ်မတ်လ (၃၁)ရက်မှာ ပြုလုပ်မယ့် ရန်ကုန်မြို့တော်စည်ပင်သာယာရွေးကောက်ပွဲမှာ ပါဝင်ယှဉ်ပြိုင်ဖို့ ကော်မတီဝင်ကိုယ်စားလှယ်လောင်းဦးရေ (၂၇၃) ဦးကို စိစစ်ရွေးချယ်ခဲ့တယ်လို့သိရပါတယ်။ ရန်ကုန်မြို့တော်စည်ပင်သာယာရေးကော်မတီဝင်နေရာ (၆)နေရာနဲ့ မြို့နယ်အဆင့် စည်ပင်သာယာရေး ကော်မတီဝင် နေရာအသီးသီးအတွက် အဆိုပြုလွှာတင်သွင်းခဲ့တဲ့ ကိုယ်စားလှယ်လောင်းဦးရေ (၂၇၇) ဦးအထိရှိခဲ့ပြီး မိမိဆန္ဒအလျောက် နှုတ်ထွက်သူ (၂)ဦးနဲ့စည်ပင်သာယာရွေးကောက်ပွဲနည်းဥပဒေအရ ပယ်ချခံရသူ (၂) ဦးရှိခဲ့တယ်လို့သိရပါတယ်။ ကိုယ်စားလှယ်လောင်း အမည်စာရင်းစိစစ်ရာမှာ ပယ်ချခံရသူ နှစ်ဦးက စည်ပင်သာယာရွေးကောက်ပွဲနည်းဥပဒေ ၂၇(က)နဲ့ ၂၉(စ)ဖြစ်တဲ့ မွေးဖွားစဉ်က မိဘနှစ်ပါးဖြစ်သူ နိုင်ငံသားဖြစ်ရမယ်ဆိုတဲ့ အချက်နဲ့ မကင်းလွတ်တာကြောင့်ပယ်ချခံရခြင်းဖြစ်ပါတယ်။ 

နောက်ဆုံးအပြီးသတ် စိစစ်ပြီးဖြစ်တဲ့ ရွေးကောက်ခံကိုယ်စားလှယ်လောင်းတွေကတော့ ဖေဖော်ဝါရီလ (၂၈) ရက်ကနေ မတ်လ (၂၉) ရက်အတွင်း မဲဆွယ်ခွင့်ရှိမှာဖြစ်ပါတယ်။ မဲဆွယ်ကာလအတွင်း ကိုယ်စားလှယ်လောင်းတွေက မိမိပါဝင်ယှဉ်ပြိုင်မယ့် သက်ဆိုင်ရာမြို့နယ်ရွေးကောက်ပွဲကော်မရှင်မှာ မဲဆွယ်စည်းရုံးမှုအတွက် ခွင့်ပြုချက်ခံယူမဲဆွယ်စည်းရုံးနိုင်မှာဖြစ်ပါတယ်။ 
ဒါပေမဲ့ မဲဆွယ်ခွင့်ကာလမတိုင်ခင် ကြိုတင်မဲဆွယ်တာတွေ စိစစ်တွေ့ရှိရင် ပထမကြိမ်ခေါ်ယူသတိပေးမှာဖြစ်ပြီး လိုက်နာဆောင်ရွက်ခြင်းမရှိရင်တော့ ရွေးကောက်ပွဲနည်းဥပဒေအရ အရေးယူမယ်လို့ ရန်ကုန်မြို့တော်စည်ပင်သာယာရွေးကောက်ပွဲကော်မရှင် ဥက္ကဋ္ဌကပြောပါတယ်။ 

စည်ပင်သာယာရွေးကောက်ပွဲမှာ ပါဝင်ယှဉ်ပြိုင်ဖို့ စိစစ်ထုတ်ပြန်ထားတဲ့ ကိုယ်စားလှယ်လောင်းတွေထဲမှာ မြို့တော်ကော်မတီဝင်နေရာအတွက် (၂၇)ဦး၊ မြို့နယ်ဥက္ကဋ္ဌ၊ မြို့နယ်အဖွဲ့ဝင်(၁)နဲ့ မြို့နယ်အဖွဲ့ဝင်(၂) နေရာအတွက် (၂၄၆) ဦးပါဝင်ယှဉ်ပြိုင်မှာဖြစ်ပါတယ်။ ရန်ကုန်မြို့တော်စည်ပင်သာယာရွေးကောက်ပွဲမှာ မြို့နယ်အနည်းဆုံး မြို့နယ်နှစ်မြို့နယ်ကနေ အများဆုံး မြို့နယ် (၁၂) မြို့နယ်အထိပါဝင်တဲ့ မဲဆန္ဒနယ်ခြောက်ခု သတ်မှတ်ထားပြီး မဲပေးရမယ့်သူတွေရဲ့စာရင်းကိုတော့ ဖေဖော်ဝါရီလမကုန်မီ ထုတ်ပြန်ဖို့ရှိတယ်လို့သိရပါတယ်။ 


 

 

Related News