ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ(၂၀၀၈ခုနှစ်)ပြင်ဆင်ရေး ပူးပေါင်းကော်မတီ ဖွဲ့စည်းတာဝန်ပေး အပ်ခြင်း အမိန့်ကြော်ငြာစာမူကြမ်းကို  ပြည်ထောင်စုလွှတ်တော်က အတည်ပြုလိုက်တယ်လို့ သိရပါတယ်။ ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ(၂၀၀၈ခုနှစ်)ပြင်ဆင်ရေး ပူးပေါင်းကော်မတီ ဖွဲ့စည်းတာဝန်ပေး အပ်ရန်ဆောင်ရွက်ထားမှုနှင့် စပ်လျဉ်းပြီး ပြည်ထောင်စုလွှတ်တော် ဒုတိယနာယက ဦးထွန်းထွန်းဟိန်ကရှင်းလင်းတင်ပြခြင်းတွေနဲ့ ဖွဲ့စည်းပုံအခြေခံဥပဒေ (၂၀၀၈ခုနှစ်)ပြင်ဆင်ရေး ပူးပေါင်းကော်မတီ ဖွဲ့စည်း တာဝန်ပေးအပ်ခြင်းတွေကို  ဖေဖော်ဝါရီလ(၁၉)ရက် က ပြုလုပ်ခဲ့တဲ့ ဒုတိယအကြိမ် ပြည်ထောင်စုလွှတ်တော် (၁၁)ကြိမ်မြောက် ပုံမှန်အစည်းအဝေးမှာ ဆောင်ရွက်ခဲ့ကြတာပါ။ အဆိုပါ ရှင်းလင်းတင်ပြခဲ့တဲ့အထဲမှာ  ဖွဲ့စည်းပုံအခြေခံဥပဒေ(၂၀၀၈ခုနှစ်)ပြင်ဆင်ရေး ပူးပေါင်းကော်မတီကို မနည်းလွန်း မများလွန်းသော ကိုယ်စားလှယ်အရေအတွက် ဖြစ်တဲ့(၄၅)ဦးဖြင့် ဖွဲ့စည်းဆောင်ရွက်သွားမယ်လို့ သိရပါတယ်။ အဲဒီထဲမှာ ကော်မတီဥက္ကဋ္ဌအဖြစ် ပြည်ထောင်စုလွှတ်တော် ဒုတိယနာယက ဦးထွန်းထွန်းဟိန်၊ ဒုတိယဥက္ကဋ္ဌအဖြစ် အမျိုးသားလွှတ်တော်ဒုတိယဥက္ကဋ္ဌ ဦးအေးသာ အောင်နဲ့ အဖွဲ့ဝင်၄၁ဦးတို့အပါအ၀င် တွဲဖက်အတွင်းရေးမှူးတစ်ဦး၊ အတွင်းရေးမှူးတစ်ဦးတို့နှင့်ဖွဲ့စည်းသွားမယ်လို့ သိရပါတယ်။ 

ပြည်ထောင်စုလွှတ်တော် ဒုတိယနာယက ဦးထွန်းထွန်းဟိန်ရဲ့ ရှင်းလင်းတင်ပြမှုတွေအပြီးနောက် ဖွဲ့စည်းပုံ အခြေခံဥပဒေ (၂၀၀၈ ခုနှစ်)ပြင်ဆင်ရေး ပူးပေါင်းကော်မတီ ဖွဲ့စည်းတာဝန်ပေးအပ်ခြင်းအမိန့်ကြော်ငြာစာ မူကြမ်းကို အတည်ပြုရန် ပြည်ထောင်စု လွှတ်တော်ရဲ့ အဆုံးအဖြတ်ကို ရယူခဲ့ရာ ကန့်ကွက်သူရှိခဲ့တာကြောင့် စက်ခလုတ်နှိပ် မဲခွဲဆုံးဖြတ်ခဲ့ပါတယ်။ မဲခွဲဆုံးဖြတ်ရာမှာ တော့  ထောက်ခံဆန္ဒမဲ(၃၈၉)မဲနဲ့ ကန့်ကွက်ဆန္ဒမဲ(၁၉၂)မဲ၊ ကြားနေဆန္ဒမဲ(၃)မဲရရှိခဲ့တယ်လို့ သိရပါတယ်။ ဖွဲ့စည်းပုံအခြေခံဥပဒေ(၂၀၀၈ခုနှစ်)ပြင်ဆင်ရေး ပူးပေါင်းကော်မတီဖွဲ့စည်းနိုင်ရေးအတွက် ပြည်ထောင်စုလွှတ်တော်အတွင်းရှိ နိုင်ငံရေးပါတီ ၁၄ ခုနဲ့ တပ်မတော်သားလွှတ်တော်ကိုယ်စားလှယ်များအစုအဖွဲ့အသီးသီးမှ တာဝန်ခံများနှင့် ဖေဖော်ဝါရီလ(၈)ရက်နဲ့ (၁၅)ရက်တို့မှာ ပြည်ထောင်စုလွှတ်တော်နာယက၊ အမျိုးသားလွှတ်တော်ဥက္ကဋ္ဌတို့နဲ့  အစည်းအဝေးနှစ်ကြိမ် ပြုလုပ်ခဲ့တယ်လို့ သိရပါတယ်။

 

Related News