မြန်မာနိုင်ငံအင်ဂျင်နီယာအသင်းချုပ် နဲ့ SEEDS Asia တို့ပူးပေါင်းပြီှး School Cum(ကန့်) Shelter စီမံကိန်းနဲ့ ပြည်တွင်းရှိ သဘာဝဘေးဒဏ်အများဆုံးခံရတဲ့ဒေသတွေမှာ စာသင်ကျောင်းများတည်ဆောက်သွားမယ်လို့ ဖေဖော်ဝါရီလ(၁၉)ရက်က ရန်ကုန်မြို့ မြန်မာနိုင်ငံအင်ဂျင်နီယာအသင်းချုပ်မှာ ပြုလုပ်ခဲ့တဲ့ အလုပ်ရုံဆွေးနွေးမှသိရပါတယ်။ မြန်မာနိုင်ငံအင်ဂျင်နီယာအသင်းချုပ်နဲ့ SEEDS Asia တို့က (၂၀၀၈)ခုနှစ် နာဂစ်မုန်တိုင်းအပြီးထဲက ပြည်တွင်းမှာ သဘာဝဘေး အန္တရာယ်ကြောင့် ထိခိုက်မှုလျော့ချနိုင်ဖို့အတွက် သဘာဝဘေးအန္တရာယ်အသိပညာပေးမှုတွေကို ပူးပေါင်းဆောင်ရွက်မှုတွေကို ပြုလုပ်နေတာပါ။ဒီလို ဆောင်ရွက်မှုတွေထဲမှာ တစ်ခုအပါအ၀င်ဖြစ်တဲ့ School Cum Shelter စီမံကိန်းကတော့ မိုးတွင်းကာလ ရေကြီး၊ ရေလျှံ အဖြစ်များတဲ့ ဒေသတွေနဲ့ ကားလမ်းမပေါက်ပဲ လှေနဲ့သာသွားလာရတဲ့ဒေသတွေဖြစ်တဲ့ မြစ်ဝကျွန်းပေါ်ရှိ ဒေသတွေမှာ စာသင်ကျောင်းအဖြစ်ရော ကယ်ဆယ်ရေးစခန်းအဖြစ်ပါ အသုံးပြုနိုင်တဲ့ School Cum Shelter တွေကို တည်ဆောက်ပေးနေတာဖြစ်ပါတယ်။ 
 

School Cum Shelter စီမံကိန်းရဲ့ပထမဆုံးအစီအစဉ်အဖြစ် ဟသာင်္တမြို့နယ်၊နဘဲကုန်ကျွေးရွာမှာ ရပ်ရွာလူထုနဲ့ ပူးပေါင်းပြီး School Cum Shelter စာသင်ကျောင်းကိုဆောက်လုပ်ပြီးခဲ့ပြီလို့ သိရပါတယ်။နဘဲကုန်ကျေးရွာက ဧရာဝတီမြစ်ရေကြီးလာတဲ့အခါ ရွာအတွင်းမှာ ရေကြီးရေလျှံမှုအမြဲဖြစ်လေ့ရှိတာကြောင့် School Cum Shelterစီမံကိန်းရဲ့ ပထမဆုံးအစီအစဉ်အဖြစ် စာသင် ကျောင်းဆောက်လုပ်ပေးခဲ့တာဖြစ်ပါတယ်။အခုဆောက်လုပ်ပေးခဲ့တဲ့ School Cum Shelter စာသင်ကျောင်းက သဘာဝဘေး အန္တရာယ်တွေ့ကြုံလာချိန်မှာ ကယ်ဆယ်ရေးစခန်းအဖြစ် လူ(၇၀၀) နီးပါးနေထိုင်နိုင်တဲ့အပြင် ကျောင်းတွင်းမှာ ရေရရှိရေးစနစ်၊ သန့်စင်ခန်းစနစ် နဲ့ လိုအပ်မယ့်ရိက္ခာတွေကို သိုလှောင်နိုင်မယ့် အခန်းတွေပါ ပါဝင်တယ်လို့ သိရပါတယ်။

မြန်မာနိုင်ငံအင်ဂျင်နီယာအသင်းချုပ် နဲ့ SEEDS Asia တို့ပူးပေါင်းဆောင်ရွက်နေတဲ့ School Cum Shelter စီမံကိန်းရဲ့ ဒုတိယ အစီအစဉ်နဲ့ပတ်သက်ပြီးတော့လည်း လက်ရှိမှာ သက်ဆိုင်ရာဒေသဆိုင်ရာအဖွဲ့အစည်းတွေ၊ ပညာရေးအဖွဲ့အစည်းတွေနဲ့  မည်သည့်နေရာမှာ ဆက်လက်ဆောက်လုပ်သွားမလဲဆိုတာတွေကို ညှိုနှိုင်းဆွေးနွေးနေတယ်လို့ သိရပါတယ်။


 

Related News