ပြည်တွင်းက စီးပွားရေးလုပ်ငန်းယှဉ်ပြိုင်မှုတွေနဲ့ ပတ်သက်ပြီး ယှဉ်ပြိုင်မှုဥပဒေအရ ယှဉ်ပြိုင်မှုကော်မရှင်ကို ဖွဲ့စည်းထားပြီဖြစ်ပြီး တိုင်းကြားမှုတွေကို စတင်ဖြေရှင်းပေးတော့မှာ ဖြစ်တယ်လို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောပါတယ်။

ယှဉ်ပြိုင်မှုကော်မရှင်ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးဒေါက်တာသန်းမြင့်က ဥက္ကဋ္ဌအဖြစ်နဲ့ တာဝန်ယူမှာဖြစ်ပြီး  မြန်မာနိုင်ငံကုန်သည်များနှင့်စက်မှုလက်မှု လုပ်ငန်းရှင်များအသင်းချုပ်က ကိုယ်စားလှယ်တစ်ဦးအပါအ၀င် ဌာနဆိုင်ရာတွေ၊ တာဝန်ရှိသူတွေ စုစုပေါင်း(၁၁)ဦးနဲ့ဖွဲ့စည်းထားပါတယ်။ ကော်မရှင်ရဲ့ ဒုတိယအကြိမ်အစည်းအဝေးကို  မတ်လ ဒုတိယပတ်က ပြုလုပ်ခဲ့ပြီးဖြစ်တယ်လို့လည်း သိရပါတယ်။ လုပ်ငန်းရှင်များ အချင်းချင်းတရားမျှတစွာ ယှဉ်ပြိုင်မှုအားပေးဖို့ဖွဲ့စည်းလုပ်ဆောင်ခဲ့တာဖြစ်ပြီး ယှဉ်ပြိုင်မှုတွေမှာ ဥပဒေ၊ စည်းကမ်းတွေကို ချိုးဖောက်မှုတွေရှိလာရင်လည်း ပညာပေး၊ အရေးယူမှုတွေကို လုပ်ဆောင်သွားမှာဖြစ်တယ်လို့ ပြည်ထောင်စုဝန်ကြီးက ပြောပါတယ်။

ကော်မရှင်ကို လက်ရှိမှာ တိုင်ကြားစာ(၂)စောင် ရောက်ရှိနေတယ်လို့ သိရပါတယ်။ ဒီတိုင်ကြားစာတွေကို  ယှဉ်ပြိုင်မှု ဥပဒေနဲ့အညီ ကော်မရှင်က စတင်ဖြေရှင်းပေးဖို့ဆောင်ရွက်နေပြီးဖြစ်တယ်လို့ ပြည်ထောင်စုဝန်ကြီး ဒေါက်တာသန်းမြင့်က ပြောပါတယ်။ ဒါ့ကြောင့် လုပ်ငန်းရှင်တွေအနေနဲ့ စီးပွားရေးလုပ်ငန်းတွေကို စနစ်တကျ ယှဉ်ပြိုင်နိုင်အောင် ပြင်ဆင်ဖန်တီးထားဖို့လည်း လိုအပ်ပြီး ဒီအတွက် ယှဉ်ပြိုင်မှု ကော်မရှင်က စီးပွားရေးလုပ်ငန်းရှင်တွေနဲ့ တွေ့ဆုံရှင်းလင်းမှုတွေပြုလုပ်သွားမယ်လို့ သိရပါတယ်။ တွေ့ဆုံရှင်းလင်းမှုတွေကို ရန်ကုန်နဲ့မန္တလေးမြို့တွေမှာ မကြာခင်ပြုလုပ်သွားဖို့ရှိတယ်လို့လည်း သိရပါတယ်။ ပြီးခဲ့တဲ့ မတ်လ(၁၅)ရက်က UMFCCI မှာပြုလုပ်ခဲ့တဲ့ (၂၅)ကြိမ်မြောက် ပုဂ္ဂလိက ကဏ္ဍဖွံ့ဖြိုးတိုးတက်ရေးကော်မတီ(ဥက္ကဋ္ဌ)၊ ဒုတိယသမ္မတ ဦးမြင့်ဆွေနဲ့ မြန်မာ့စီးပွားရေးလုပ်ငန်းရှင်တွေ ပုံမှန်တွေ့ဆုံဆွေးနွေးပွဲမှာ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီးဒေါက်တာသန်းမြင့်က ပြောကြားခဲ့တာဖြစ်ပါတယ်။

 

 

Related News