သင်္ကြန်ကာလအတွင်း ရန်ကုန်ပြည်သူ့ဆေးရုံကြီး ၊ အရေးပေါ်ဌာနကို လူနာ (၉၁၄) ဦးရောက်ရှိခဲ့ပြီး သေဆုံးသူ ခြောက်ဦးရှိခဲ့တယ်လို့ ရန်ကုန်ပြည်သူ့ဆေးရုံကြီးမှ သိရပါတယ်။ သင်္ကြန်ကာလအတွင်း အရေးပေါ်ဌာနကို ဝင်ရောက်ခဲ့တဲ့ လူနာတွေထဲမှာ ယာဉ်မတော်တဆမှုနဲ့ ရောက်ရှိလာတဲ့ လူနာကအများဆုံးဖြစ်ပြီး ခိုက်ရန်ဖြစ်ပွားမှုတွေနဲ့အခြားအထွေထွေရောဂါတွေကြောင့် ဆေးရုံတက်ရောက်သူတွေလည်းရှိပါတယ်။ ယခုနှစ် သင်္ကြန်ကာလအတွင်း လူနာဝင်ရောက်မှုက (၉၀၀)အထက်ရှိပြီး ပြီးခဲ့တဲ့နှစ်ကထက် အရေးပေါ်လူနာဦးရေ တစ်ရာကျော် ပိုမို ရောက်ရှိခဲ့တာဖြစ်ပါတယ်။ သေဆုံးခဲ့သူ လူနာဦးရေ (၆)ဦးရှိပြီး သေဆုံးသူတွေဟာယာဉ်မတော်တဆမှုကြောင့် ဆေးရုံကိုမရောက်ခင်တည်းက သေဆုံးသူတွေ ဖြစ်တယ်လို့သိရပါတယ်။ 

ဒီနှစ် သင်္ကြန်ရဲ့ အကြတ်နေ့နဲ့အတက်နေ့တွေမှာ လူနာဦးရေ (၂၀၀)ကျော်အထိ ဝင်ရောက်ခဲ့တာကြောင့် သင်္ကြန်တွင်း လူနာဝင်ရောက်မှု အရေအတွက် မြင့်တက်သွားတာဖြစ်တယ်လို့သိရပါတယ်။ မော်တော်ယာဉ် ထိခိုက်မှုနဲ့ လူနာဦးရေ (၂၇၀) ဝင်ရောက်ခဲ့ပြီး ဆိုင်ကယ်အပြင် အခြားယာဉ်တွေနဲ့ထိခိုက်မိလို့လူနာဦးရေ (၂၄၀) ကျော် ဝင်ရောက်ခဲ့ပါတယ်။ ရာသီဥတုပူပြင်းတာကြောင့် အရေးပေါ်ဌာနမှာ အပူရှပ်လူနာတွေအတွက် အခန်းသီးသန့်ပြင်ဆင်ထားပေမယ့် သင်္ကြန်အတွင်းမှာတော့ အပူရှပ်လူနာတွေ ဝင်ရောက်မှု မရှိဘူးလို့သိရပါတယ်။ ရန်ကုန်ဆေးရုံကြီး၊ အရေးပေါ်ဌာနမှာ သင်္ကြန်လေးရက်တာနှင့် နှစ်ဆန်းတစ်ရက်အပါအဝင် ပြင်ပလူနာ ခြောက်ရာ ပြသခဲ့ပြီး   အတွင်းလူနာ (၃၀၀) အထက်က ဆေးရုံတက်ရောက်ကုသခဲ့ပါတယ်။ (၂၀၁၆) ခုနှစ်၊ သင်္ကြန်ကာလအတွင်းကတော့ ရန်ကုန်ပြည်သူ့ဆေးရုံကြီးကို အရေးပေါ်လူနာဦးရေ တစ်ထောင်ကျော်အထိ ဝင်ရောက်ဖူးတယ်လို့သိရပါတယ်။ 


 

Related News