မြန်မာတစ်နိုင်ငံလုံးရဲ့ ပုံမှန်ကာကွယ်ဆေးထိုး လွှမ်းခြုံမှုမြင့်တက်မှ ကာကွယ်ဆေးနဲ့ ကာကွယ်၍ ရနိုင်တဲ့ ရောဂါတွေကူးစက် ခံရလို့ ဖြစ်ပွား၊ သေဆုံးတာတွေ လျော့ကျသွားမှာဖြစ်တယ်လို့ ဧပြီ (၂၀) ရက်က မာကျူရီဟိုတယ်မှာ ပြုလုပ်တဲ့ ကမ္ဘာ့ကာကွယ် ဆေးထိုးရက်သတ္တပတ်အတွက် သတင်းမီဒီယာများနှင့် တွေ့ဆုံပွဲမှသိရပါတယ်။ မြန်မာနိုင်ငံမှာ မွေးကင်းစကနေ အသက်(၁၈)လ အရွယ်ကလေးတွေကို ကာကွယ်ဆေး (၁၁)မျိုး အခမဲ့ထိုးနှံပေးတဲ့ ပုံမှန်ကာကွယ်ဆေးထိုးလုပ်ငန်း ဆောင်ရွက်နေပါတယ်။ အဲ့ဒီကာကွယ်ဆေးထိုးလုပ်ငန်းက အသက်ငါးနှစ်အောက်ကလေးတွေ ကူးစက်ရောဂါကြောင့် မသေဆုံးစေရန် ကာကွယ်ပေးနေတာဖြစ်ပါတယ်။ ဒါပေမဲ့ တစ်နိုင်ငံလုံးမှာ နှစ်စဉ်နှစ်တိုင်း ကာကွယ်ဆေးထိုးနှံနိုင်မှု ၊ လွှမ်းခြုံနိုင်မှုက (၈၅) ရာခိုင်နှုန်းအထက်သာရှိပြီး (၁၅) ရာခိုင်နှုန်းက အမြဲကျန်နေခဲ့တာပါ။

အဲ့ဒီ ကာကွယ်ဆေးမရတဲ့ အုပ်စုတွေကတော့ နယ်မြေမငြိမ်းချမ်းတဲ့နေရာတွေ၊ သွားလာရခက်ခဲတဲ့နေရာတွေနဲ့ ရွှေ့ပြောင်းသွားလာသူတွေထဲမှ ကလေးတွေပဲဖြစ်ပါတယ်။ ဒီလို ကာကွယ်ဆေးမရတဲ့ ကလေးတွေက လူဦးရေထူထပ်တဲ့နေရာတွေကို ပြောင်းရွှေ့အခြေချရင် ရောဂါတွေကကပ်ရောဂါအသွင်ဖြစ်ပေါ်လာလေ့ရှိပြီး သေဆုံးသူတွေအထိ ရှိလာပါတယ်။ ဒါကြောင့် ပုံမှန်ကာကွယ်ဆေးထိုးလုပ်ငန်းရဲ့ လွှမ်းခြုံမှုကို  (၉၀) ရာခိုင်နှုန်း အထက် ရရှိဖို့ ကျန်းမာရေးဝန်ထမ်းတွေသာမက ပြည်သူတွေပူးပေါင်းပါဝင် ထိုးနှံပေးဖို့ လိုအပ်နေပါတယ်။

ပုံမှန်ကာကွယ်ဆေးထိုးတဲ့ အစီအစဉ်ကို ဆေးရုံကြီးတွေသာမက မြို့နယ်ဒေသန္တရကျန်းမာရေးဌာန၊ မိခင်နှင့်ကလေး စောင့်ရှောက်ရေး အသင်းရုံးတွေ၊ ရပ်ကွက်အုပ်ချုပ်ရေးမှူးရုံးတွေမှာ စုံစမ်းပြီး အခမဲ့ ထိုးနှံပေးနိုင်ပါတယ်။ ဆေးတွေကလည်း WHO အသိအမှတ်ပြု ကာကွယ်ဆေးတွေဖြစ်တာကြောင့် ယုံကြည်စိတ်ချရပြီး အပြည့်အဝကာကွယ်ပေးနိုင်ပါတယ်။ ဒါကြောင့် မိဘတွေကနေ ကိုယ့်သားသမီးအတွက် ကာကွယ်ဆေးကို လိုလိုလားလားနဲ့ လာရောက်ထိုးနှံဖို့လိုအပ်တယ်လို့  ဗဟိုတိုးချဲ့ ကာကွယ်ဆေးထိုးလုပ်ငန်းမှ လက်ထောက်ညွှန်ကြားရေးမှူးက ပြောပါတယ်။ 

ကာကွယ်ဆေးထိုးလုပ်ငန်းတွေပေါ်မှာ လျော့ရဲနေတဲ့ ပြည်သူလူထုရဲ့ ယုံကြည်မှုကို ပြန်လည်မြှင့်တင်ပေးဖို့ ကမ္ဘာတစ်ဝန်းလုံးက ဧပြီလ (၂၄) ရက်ကနေ (၃၀) ရက်ကို ကမ္ဘာ့ကာကွယ်ဆေးထိုးရက်သတ္တပတ် အဖြစ်သတ်မှတ်ပြီး အဲ့ဒီကာလအတွင်း အသိပညာပေးလုပ်ငန်းတွေ လုပ်ဆောင်လေ့ရှိပါတယ်။ ယခုနှစ် ကာကွယ်ဆေးထိုးရက်သတ္တပတ်မှာတော့ ကျန်းမာရေးနှင့်အားကစားဝန်ကြီးဌာနက စာနယ်ဇင်းအဖွဲ့တွေ၊ ရုပ်သံဌာနတွေ၊ FM ရေဒီယိုတွေနဲ့ တွေ့ဆုံပြီး သတင်းမီဒီယာတွေကနေ ကာကွယ်ဆေးလုပ်ငန်းအကြောင်း ထုတ်လွှင့်တင်ဆက်ပေးရန် တွေ့ဆုံတောင်းဆိုခဲ့ကြပါတယ်။ 

 


 

Related News