ဧရာဝတီတိုင်းဒေသကြီး၊ ပန်းတနော်မြို့နယ်ရဲ့ မြေဧကလေးရာပေါ်မှာ ငါးတန်သီးသန့်မွေးမြူပြီး ပြည်ပနိုင်ငံတွေထံ တင်ပို့သွားမယ်လို့ မြန်မာနိုင်ငံငါးလုပ်ငန်းအဖွဲ့ချုပ်ကနေ သိရပါတယ်။ မြန်မာနိုင်ငံမှာ အရင်ကတည်းက ငါးတန်ကိုမွေးမြူရင် တစ်ဧကမှာ အကောင်ရေနှစ်သောင်းထည့်ပြီး နှစ်ရှည်မွေးမြူကြတာ ဖြစ်ပါတယ်။ ပန်းတနော်မြို့မှာ ဆောင်ရွက်မယ့် ငါးတန်သီးသန့်မွေးမြူရေးစီမံကိန်းမှာတော့ တစ်ဧကကို ငါးအကောင်ရေ တစ်သိန်းနှစ်သောင်းအထိထည့်ပြီး နိုင်ငံတကာမှာ မွေးမြူနေတဲ့အတိုင်း ကန်ကျပ်စနစ်နဲ့ မွေးမြူသွားမှာဖြစ်ပါတယ်။ အဲ့ဒီငါးတွေကိုတော့ တရုတ်နိုင်ငံကို အဓိက တင်ပို့မှာဖြစ်ပြီး ဥရောပသမဂ္ဂအဖွဲ့ဝင် နိုင်ငံတွေနဲ့အမေရိကန်နိုင်ငံတွေကိုလည်း တင်ပို့လို့ရအောင် GAqP စနစ်နဲ့ မွေးမြူမယ်လို့ သိရပါတယ်။ လက်ရှိမှာတော့ ငါးမွေးကန်ဧကလေးရာတူးထားပြီး ဧကတစ်ရာ စမ်းသပ်မွေးမြူလျက်ရှိပါတယ်။ 

စနစ်ပြောင်းမွေးမြူနေတဲ့ ငါးတန်သီးသန့်မွေးမြူရေးစီမံကိန်းမှာ ငါးကန်တစ်ဧကကို တစ်နှစ် နှစ်ကြိမ် ကန်ဖော်နိုင်မှာဖြစ်ပြီး ငါးတစ်ကောင်ကို (၆၅) ကျပ်သားအလေးချိန်နဲ့ တစ်ကန်ကို တန်(၁၂၀) ထွက်ရှိမှာဖြစ်ပါတယ်။ အရင်ကမွေးမြူတဲ့ စနစ်အတိုင်းဆိုရင် ငါးတန်ကိုတစ်နှစ်မွေးမြူပြီးမှ ကန်ဖော်ရောင်းချရတာပါ။ ယခု ပန်းတနော်မှာဆောင်ရွက်မယ့် ငါးတန်ကန်တွေကတော့ တစ်နှစ်ကိုနှစ်ကြိမ် ကန်ဖော်ရောင်းချနိုင်မှာဖြစ်လို့ တစ်နှစ်အတွင်း အမြတ်ပြန်လည်ရရှိနိုင်မယ်လို့ သိရပါတယ်။  ငါးတန်သီးသန့်မွေးမြူရေးစီမံကိန်းကို မြန်မာနိုင်ငံငါးလုပ်ငန်းအဖွဲ့ချုပ်က တည်ထောင်ထားတဲ့ Global Earth အများပိုင်ကုမ္ပဏီက ဦးစီးဆောင်ရွက်နေတာဖြစ်ပြီး လုပ်ငန်းလည်ပတ်မှ ပြည်တွင်းပြည်ပရှယ်ယာရှင်တွေကို ရင်းနှီးမြှုပ်နှံဖို့ ဖိတ်ခေါ်သွားမယ်လို့ သိရပါတယ်။ ဒီစီမံကိန်းနဲ့အတူ ပန်းတနော်မြို့နယ်မှာ နိုင်ငံတကာအဆင့်မီ ငါးမွေးမြူရေးဇုန်ကိုပါ ပူးတွဲတည်ဆောက်လျက်ရှိပြီး (၂၀၂၁) မှာ လုပ်ငန်းအပြီးသတ်ဖို့ မျှော်လင့်ထားတယ်လို့ သိရပါတယ်။

 

 

Related News