ရှားပါးတိရစ္ဆာန်တွေသေဆုံးသွားလို့ ထိန်းသိမ်းချင်တာဘဲဖြစ်ဖြစ် မိမိတို့အိမ်မှာ အလှမွေးထားတဲ့ တိရစ္ဆာန်လေးတွေ သေဆုံးသွားလို့ အမှတ်တရအနေနဲ့ ဆက်လက်ထားရှိချင်တာဘဲဖြစ်ဖြစ် ရုပ်လုံးသွင်းအတတ်ပညာနဲ့ ပြုလုပ်လို့ရပါတယ်။ ရုပ်လုံးသွင်းတဲ့အခါမှာ ဂုန်နီအိတ်စ သို့ ကြွတ်ကြွတ်အိတ်စတွေနဲ့သွင်းရပါတယ်။  ရုပ်လုံးသွင်းပညာရပ်ကို ပျောက်ကွယ်မသွားအောင် ထိန်းသိမ်းသင့်တယ်လို့ သိရပါတယ်။ 

ရုပ်လုံးသွင်းပညာရှင် ဦးမျိုးနိုင်ကတော့ ဒီအလုပ်ကိုလုပ်ကိုင်နေတာ ၁၇ နှစ်ပါးရှိနေပါပြီ။ ရုပ်လုံးသွင်းတယ်ဆိုတာကတော့ သေဆုံးသွားတဲ့ တိရစ္ဆာန်ခန္တာကိုယ်ထဲက အတွင်းကလီစာတွေကို ထုတ်ပြီး မူလပုံစံမပျက် ရုပ်လုံးသွင်းရတာဖြစ်ပါတယ်။ ရုပ်လုံးသွင်းဖို့ သေဆုံးသွားတဲ့ တိရစ္ဆာန်ကို သေဆုံးပြီးပြီးချင်း(၂၄)နာရီအတွင်းမှာသာ ရုပ်လုံးသွင်းနိုင်မှာဖြစ်ပါတယ်။ ဒီလိုရုပ်လုံးသွင်းတဲ့အခါမှာ မပုပ်မသိုးဖို့ ကျောက်ချဉ်ဖောလစ်အက်ဆစ်တို့ကို တိရစ္ဆာန်အမျိုးအစားပေါ်မူတည်ပြီး အသုံးပြုရတယ်လို့ ရုပ်လုံးသွင်းပညာရှင် ဦးမျိုးနိုင်ကပြောပါတယ်။ 

ရုပ်လုံးသွင်းပြီးသား တိရစ္ဆာန်တွေကို အိမ်မှာထားတဲ့အခါမှာလည်း သုံးလတစ်ကြိမ် ပိုးသတ်ဆေးဖြန်းပေးတာ ကျောက်ချဉ်မှုန့်ဖြန်းပေးတာ ပရုတ်လုံးထည့်ပေးတာတွေကို ပြုလုပ်ပေးရတယ်လို့ သိရပါတယ်။ ရုပ်လုံးသွင်းထားတဲ့တိရစ္ဆာန်ဟာ နှစ်ပေါင်း၅၀အထိ မပျက်စီးနိုင်တဲ့အတွက် ရှားပါးတိရစ္ဆာန်တွေလိုမျိုး သတ္တ၀ါတွေဆို နောင်လာနောင်သားတွေသိရအောင် လုပ်နိုင်တဲ့အတွက် ရုပ်လုံးသွင်းအတတ်ပညာကို ပျောက်ကွယ်မသွားနိုင် လက်ဆင့်ကမ်းသင်ယူသင့်တယ်လုို့ ရုပ်လုံးသွင်းပညာရှင် ဦးမျိုးနိုင်ကပြောပါတယ်။ 

ခြေနှစ်ချောင်းသတ္တ၀ါဖြစ်တဲ့ ငှက်အမျိုးအစားတွေကိုရုပ်လုံးသွင်းတဲ့အခါမှာ နာရီပိုင်းသာကြာနိုင်ပြီး အခြားခြေလေးချောင်း သတ္တ၀ါတွေကတော့ ရက်ပိုင်းကြာနိုင်တယ်လို့ သိရပါတယ်။ ရုပ်လုံးသွင်းတဲ့အခါမှာ ငှက်အမျိုးအစားဆို ငွေကျပ်ငါးထောင် ခြေလေးချောင်းသတ္တ၀ါဆို ငွေကျပ် သုံးသောင်းကနေ ငါးသောင်းအထိရှိနိုင်သလို မြွေဆိုရင်တော့ နှစ်သောင်းခွဲလောက်ကျနိုင်တယ်လို့ သိရပါတယ်။

 

 

Related News