လက်ရှိမှာ ပြည်တွင်းမှာ နှစ်စဉ်ပျားရည် မက်ထရစ်တန်(၆၀၀၀)ကျော်ထွက်ရှိနေမယ့် ပျားရည်ထုတ်လုပ်မှုနဲ့ တင်ပို့ရောင်းချ မှုတွေကတော့ တစ်ခြားနိုင်ငံတွေထက်နည်းပါးသေးတယ်လို့ မြန်မာနိုင်ငံပျားလုပ်ငန်းရှင်းများအသင်းက သိရပါတယ်။လက်ရှိပြည်တွင်းမှာ ပျားမွေးမြူသူလုပ်ငန်းရှင်(၉၅၀)ဦးနဲ့ လုပ်သား(၂၀၀၀)ခန့်က ပျားအုံ(၁၈၅၀၀၀)အုံ မွေးမြူလျက်ရှိပြီး နှစ်စဉ်ပျားရည်မက်ထရစ်တန် (၆၅၀၀)ထုတ်လုပ်လျက်ရှိတယ်လို့သိရပါတယ်။ဒီလို နှစ်စဉ်ထွက်ရှိလာတဲ့ ပျားရည်တွေ ထဲက Premium အဆင့်ရှိတဲ့ ပျားရည်ပျှမ်းမျှမက်ထရစ်တန်(၂၅၀၀)ကို ပြည်ပကိုတင်ပို့ရောင်းချပြီး နိုင်ငံခြားဝင်ငွေ အမေရိကန်ဒေါ်လာ(၃.၇)သန်းရရှိပေမယ့် တစ်ခြားနိုင်ငံတွေနဲ့ယှဉ်ရင်တော့ ပြည်တွင်းရဲ့ ပျားရည်ထုတ်လုပ်မှုနဲ့ တင်ပို့ရောင်းချမှုတွေက နည်းပါးသေးတယ်လို့ မြန်မာနိုင်ငံပျားလုပ်ငန်းရှင်းများအသင်း ဥက္ကဋ္ဌက ပြောပါတယ်။

ပျားမွေးမြုရေးကို လက်ရှိအချိန်မှာ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး နဲ့ မကွေးတိုင်းဒေသကြီးတို့မှာ အများဆုံးမွေးမြူကြတာဖြစ်ပြီး  ပြည်တွင်းရဲ့ဒေသအများစုမှာလည်း ပျားစားကျက်တွေ ထပ်မံဖော်ထုတ်နိုင်သေးတယ်လို့ သိရပါတယ်။ဒါ့အပြင် နိုင်ငံရဲ့စိုက်ပျိုးဧရိယာနဲ့ယှဉ်ရင် ပျားအုံခြွေတာက နည်းပါနေသေးတယ်လို့ ပျားမွေးမြူသူ လုပ်ငန်းရှင်တချို့ပြောပါတယ်။ 

ဒီလိုအခက်အခဲတွေဖြေရှင်းနိုင်ဖို့ နဲ့ ပျားရည်ထုတ်လုပ်မှုနဲ့တင်ပို့ရောင်းချမှု တိုးတက်လာစေဖို့အတွက် မြန်မာနိုင်ငံပျားလုပ်ငန်းရှင်များအသင်း၊ မွေးမြူရေးနှင့်ကုသရေးဦးစီးဌာန နဲ့ မွေးမြူရေးဆေးတက္ကသိုလ်တို့ ပူးပေါင်းပြီး နေပြည်တော်နဲ့မန္တလေးတိုင်းဒေသကြီးမှာ ပျားမျိုးကောင်း၊မျိုးသန့်တွေကို စမ်းသပ်စခန်းအနေနဲ့လုပ်ဆောင်နေတဲ့ အပြင် နိုင်ငံတကာအဖွဲ့အစည်းတွေကလည်း နည်းပညာအကူအညီတွေပေးနေတယ်လို့ သိရပါတယ်။ ပြည်တွင်းမှာ ပျားရည်နဲ့ပတ်သက်တဲ့ အဓိကကုန်သွယ်ဘက်နိုင်ငံအဖြစ် ဂျပန်နိုင်ငံကိုအများဆုံးတင်ပို့နေတယ်လို့သိရပြီး တရုတ်နိုင်ငံ၊ ကနေဒါနိုင်ငံ အပါအ၀င် အရှေ့တောင်အာရှ နိုင်ငံတချို့ကိုလည်း တင်ပို့လျက်ရှိတာဖြစ်ပါတယ်။

 

Related News