ရှမ်းပြည်နယ် အင်းလေးဒေသအတွင်းမှာရှိတဲ့ သာလေးကျေးရွာနှင့် တောင်လေးလုံးကျေးရွာတို့တွင် ကျန်းမာရေး စောင့်ရှောက်မှုကွန်ရက် တစ်ခုဖြစ်တဲ့ ကျေးလက်ကျန်းမာရေးဌာနခွဲကို မေလ(၂၁)ရက်မှာ ဖွင့်လှစ်ခဲ့ပါတယ်။ အင်းလေးဒေသအတွင်းရှိ သာလေးကျေးရွာနဲ့ အဆိုပါ ကျေးရွာအနီးအနားမှာတော့ ကျေးရွာ (၁၂)ရွာတည်ရှိပြီး ကျေးလက်နေပြည်သူ (၅ ထောင်)ကျော်နေထိုင်ကြတာဖြစ်ပါတယ်။

ဒါ့အပြင် တောင်လေးလုံးကျေးရွာမှာတော့ ကျေးရွာ (၁၇)ရွာတည်ရှိပြီး ကျေးလက်နေပြည်သူ (၉၅၀၀) ကျော်နေထိုင်ကြတာပါ။ယခင်က အဆိုပါကျေးရွာတွေမှာ နေထိုင်ကြတဲ့ ကျေးလက်နေပြည်သူတွေအတွက် ကျန်းမာရေးစောင့်ရှောက်မှုအနေနဲ့ ကျေးလက်ကျန်းမာရေးဆေးခန်းထားရှိထားပေမယ့်လည်း ဆေးဝါးမလုံလောက်မှု ၊ကိုယ်ဝန်ဆောင်မိခင်တွေအနေနဲ့ သားဖွားမှုအခက်အခဲတွေ ရှိခဲ့တယ်လို့ သိရပါတယ်။

ဒါ့ကြောင့် အခုအခါမှာတော့ ကျန်းမာရေးစောင့်ရှောက်မှုကွန်ရက်တစ်ခုဖြစ်တဲ့ ကျေးလက်ကျန်းမာရေးဌာနခွဲကို အင်းလေး ဖောင်တော်ဦးဘုရားအနီးမှာ ဖွင့်လှစ်လိုက်တဲ့အတွက် ကျေးလက်နေပြည်သူတွေအပါအ၀င် ပြည်တွင်း/ပြည်ပ ဘုရားဖူးခရီးသွား ပြည်သူတွေအတွက်ပါ ကျန်းမာရေးစောင့်ရှောက်မှုကို ပေးနိုင်မှာဖြစ်တယ်လို့ သိရပါတယ်။အင်းလေးဒေသ သာလေးကျေးရွာမှာရှိတဲ့ ကျေးလက်နေပြည်သူတွေအနေနဲ့ အရင်က ကျန်းမာရေး စောင့်ရှောက်မှုအဖြစ် နန့်ပန်ဆေးရုံကိုသာ အားကိုးနေရတာဖြစ်ပြီး နန့်ပန်ဆေးရုံကို နာရီဝက်ကြာ သွားရောက် ဆေးကုသမှုခံယူရတယ်လို့သိရပါတယ်။အခုဖွင့်လှစ်လိုက်တဲ့ ကျေးလက် ကျန်းမာရေးဌာနခွဲမှာတော့ ကိုယ်ဝန်ဆောင်မိခင်တွေအတွက် ကလေးမွေးဖွားခန်း၊ HIV ၊ TB ၊ ငှက်ဖျားစတဲ့ ကူးစက်ရောဂါတွေ အတွက်ပါ ကုသလို့ရနိုင်မှာဖြစ်တဲ့အတွက် ကျေးလက်နေပြည်သူတွေအတွက်အကျိုးကျေးဇူးတွေရရှိတယ်လို့သိရပါတယ်။

ကျန်းမာရေးစောင့်ရှောက်မှုကွန်ရက်တစ်ခုဖြစ်တဲ့ ကျေးလက်ကျန်းမာရေးဌာနခွဲကို အူရီဒူးမြန်မာနှင့် UNOPS တို့က ပူးပေါင်းဆောက်လုပ်ခဲ့တာ ဖြစ်ပါတယ်။ အခုဖွင့်လှစ်လိုက်တဲ့ ကျေးလက်ကျန်းမာရေးဌာနခွဲအသစ်မှာတော့ လူနာစမ်းသပ်ခန်း၊ဆေးသိုလှောင်ခန်း၊ ရေနှင့်ရေဆိုးများ သန့်စင်ရေးစနစ်၊ နေရောင်ခြည်သုံးလျှပ်စစ်စွမ်းအင်နှင့် ကျန်းမာရေးစောင့်ရှောက်မှုပေးတဲ့ ၀န်ထမ်းတွေအတွက် သီးသန့်အိမ်ခန်းတွေပါ ပါဝင်တယ်လို့သိရပါတယ်။
အူရီဒူးမြန်မာနှင့် UNOPS တို့က ပူးပေါင်းပြီး မြို့ပြနှင့်ဝေးကွာတဲ့ ကျေးလက်ဒေသတွေမှာ  ကျန်းမာရေးစောင့်ရှောက်မှုတွေဖြစ်တဲ့ ကျေးလက် ကျန်းမာရေးဌာနခွဲ (၂၁)ခုကို ဆောက်လုပ်သွားမှာဖြစ်ပြီး လက်ရှိမှာတော့ ကျေးလက်ကျန်းမာရေးဌာနခွဲ(၁၇)ခုကို ဆောက်လုပ်ခဲ့ပြီး ဖြစ်တယ်လို့သိရပါတယ်။

 

 

Related News