မြန်မာနိုင်ငံတက္ကသိုလ်များ သုတေသနညီလာခံကို မေလ(၂၄)ရက်နဲ့ (၂၅)ရက်မှာ ရန်ကုန်တက္ကသိုလ် ၀ိဇ္ဇာခန်းမမှာ ပြုလုပ်နေတာဖြစ်ပါတယ်။မြန်မာနိုင်ငံတက္ကသိုလ်များ သုတေသနညီလာခံကို အမျိုးသားပညာရေးမူဝါဒကော်မရှင် နဲ့ ပါမောက္ခချုပ်များ ကော်မတီတို့က ပူးပေါင်းကျင်းပတာဖြစ်ပြီး ပညာရေးဝန်ကြီးဌာနကထောက်ပံ့ ကူညီပေးထားတယ်လို့ သိရပါတယ်။ ညီလာခံမှာ တက္ကသိုလ်ပေါင်းစုံရဲ့ ပညာရပ်(၉)ခုဖြစ်တဲ့ ၀ိဇ္ဇာ၊ သိပ္ပံ၊ အင်ဂျင်နီယာနဲ့ နည်းပညာရပ်များ၊ ကွန်ပျူတာနည်းပညာရပ်များ၊ စီးပွားရေးဆိုင်ရာပညာရပ်များ၊ ဆေးနှင့်ဆေးနှီးနွယ်ပညာရပ်များ၊ ဘာသာယဉ်ကျေးမှုနှင့်အနုပညာရပ်များ၊ သစ်တောစိုက်ပျိုးရေးနှင့်မွေးမြူရေးပညာရပ်များနဲ့ ဆရာအတတ်ပညာရပ်စတဲ့ ဘာသာရပ်ဆိုင်ရာ သုတေသန စာတမ်းဖတ်ပွဲကိုပါ ထည့်သွင်းကျင်းပခဲ့တာဖြစ်ပါတယ်။

တက္ကသိုလ်များဖွံ့ဖြိုးတက်ဖို့နဲ့ နိုင်ငံထွန်းကားဖို့ဆောင်ရွက်ရာမှာ သုတေသနပြုခြင်းက အရေးကြီးတာကြောင့် ဒီလိုသုတေသနစာတမ်းဖတ်ပွဲကို ကျင်းပနေတာဖြစ်ပြီး ဒီစာတမ်းဖတ်ပွဲကတစ်ဆင့် သုတေသီအချင်းချင်း တွေ့ဆုံဆွေးနွေးနိုင်ဖို့ နဲ့ ပြည်တွင်းကတက္ကသိုလ်တွေကို ကိုယ်ပိုင်အုပ်ချုပ်ခွင့်ရ တက္ကသိုလ်များအဖြစ်ပြောင်းလဲရာမှာ သုတေသနပြုလုပ်ခြင်းကအရေးကြီးကြောင်းသိရှိစေဖို့ ရည်ရွယ်တာဖြစ်ပါတယ်။

သုတေသနစာတမ်းဖတ်ပွဲ အတွက် ပြည်တွင်းရှိတက္ကသိုလ်(၁၇၃)ခုကနေ ဘာသာရပ်(၉)ခုအတွက် စာတမ်းပေါင်း(၉၀၀)ကျော် တင်သွင်းခဲ့တယ်လို့သိရပြီး အကောင်းဆုံးစာတမ်းအတွက် ဆုများလည်းချီးမြှင့်သွားမှာဖြစ်ပါတယ်။အခုပြုလုပ်နေတဲ့ မြန်မာနိုင်ငံတက္ကသိုလ်များ သုတေသနညီလာခံကို ပညာရေးဝန်ကြီးဌာန၊ပြည်ထောင်စုဝန်ကြီး ဒေါက်တာမျိုးသိမ်းကြီး၊အမျိုးသားပညာရေးမူဝါဒကော်မရှင်၊ ပါမောက္ခချုပ်များကော်မတီ နဲ့ တက္ကသိုလ်ပေါင်းစုံမှ ဆရာ၊ဆရာမများတက်ရောက်ခဲ့ကြပါတယ်။

 

Related News