လှိုင်သာယာမြို့နယ်၊ ပြည်သူ့ကျန်းမာရေးဦးစီးဌာနက ကျောင်းတွေကို ကွင်းဆင်းပြီး သွေးလွန်တုပ်ကွေးနဲ့ ပတ်သက်တဲ့ ကျန်းမာရေးအသိပညာပေးဟောပြောပွဲတွေ ဆောင်ရွက်လျက်ရှိပါတယ်။ ဒီကနေ့ကျောင်းကျန်းမာရေးပညာပေးဟောပြောပွဲ ပြုလုပ်ခဲ့တဲ့ ကျောင်းကတော့ လှိုင်သာယာမြို့နယ်၊ အမှတ်(၁၇) အခြေခံပညာအထက်တန်းကျောင်းပဲဖြစ်ပါတယ်။ ကလေးတွေဟာ အိမ်မှာနေရတဲ့အချိန်ထက်စာရင် စာသင်ခန်းမှာ နေထိုင်ရတဲ့ အချိန်ကပိုများပါတယ်။ ဒါကြောင့် ကလေးတွေ ခြင်အကိုက်မခံရဖို့၊ ကျန်းမာရေးအသိပညာရှိဖို့ ပြည်သူ့ကျန်းမာရေး ဦးစီးဌာနက ကျောင်းတွေကို ယခုလို ကွင်းဆင်းဟောပြောပေးတာဖြစ်ပါတယ်။ အလယ်တန်းနဲ့ အထက်တန်းကျောင်းသား၊ ကျောင်းသူတွေကို သွားကျန်းမာရေးစစ်ဆေးပေးတာ၊ သွေးလွန်တုပ်ကွေးအကြောင်း သိမှတ်စရာ ဟောပြောတာတွေ ဆောင်ရွက်ခဲ့ပြီး မူလတန်းကျောင်းသားတွေကို ရုပ်ပုံတွေ အရောင်ခြယ်ခိုင်းပြီး ကျန်းမာရေးအသိပညာပေးခဲ့ပါတယ်။ 

လှိုင်သာယာမြို့နယ်၊ အမှတ်(၁၇) အခြေခံပညာအထက်တန်းကျောင်းက နှစ်ချိန်ကျောင်းဖြစ်ပြီး ကျောင်းသား၊ ကျောင်းသူ သုံးထောင်ကျော် တက်ရောက်နေတာဖြစ်ပါတယ်။ အထက်တန်းကျောင်းအဖြစ် အခုနှစ်မှ အဆင့်တိုးမြှင့်သတ်မှတ်ခံရတာဖြစ်ပြီး ကျောင်းဝင်းအတွင်းမှာ ရေစီးရေလာမကောင်းတာ ကြုံတွေ့နေရတယ်လို့သိရပါတယ်။ လှိုင်သာယာမြို့နယ်မှာ ပြောင်းရွှေ့အခြေချနေထိုင်သူတွေများပြီး လူဦးရေ ခုနစ်သိန်းခန့် နေထိုင်လျက်ရှိပါတယ်။ အစိုးရစာသင်ကျောင်းတွေကတော့ ခြောက်ဆယ်ကျော်ရှိပြီး ကလေးဦးရေ တစ်သိန်းခန့် ကျောင်းတက်ရောက်နေပါတယ်။ 


 

Related News