တိုင်းဒေသကြီးအဆင့်ကလေးသူငယ်အခွင့်အရေးများဆိုင်ရာကော်မတီ လုပ်ငန်းညှိနှိုင်းအစည်းအဝေးကို ဇူလိုင်လ(၁၁)ရက်က IBC မှာ ပြုလုပ်ခဲ့ပါတယ်။ကလေးသူငယ်များနဲ့ပတ်သက်ပြီး ကလေးသူငယ်အခွင့်အရေးများဆိုင်ရာ ကုလသမဂ္ဂညီလာခံသဘောတူညီမှုစာချုပ်ကို (၁၉၈၉)ခုနှစ်၊ နိုဝင်ဘာလ(၂၀)ရက်မှာ ကုလသမဂ္ဂအထွေထွေညီလာခံက အတည်ပြုပြဌာန်းခဲ့လို့သိရပါတယ်။ ဒါ့ကြောင့်မြန်မာနိုင်ငံအနေနဲ့ စာချုပ်မှာပါတဲ့အတိုင်း ကလေးသူငယ်အခွင့်အရေး အခြေခံမူ (၄)ရပ်ဖြစ်တဲ့ အသက်ရှင်သန်ရေး၊ ဖွံ့ဖြိုးတိုးတက်ရေး၊ ကာကွယ်စောင့်ရှောက်မှုရရှိစေရေးနဲ့ လူမှုအဖွဲ့ အစည်းများမှာပါဝင်ဆောင်ရွက်စေရေး စတာတွေကို အလေးထားဆောင်ရွက်နေတယ်လို့ ရန်ကုန်တိုင်းဒေသကြီး လူမှုဝန်ထမ်းဦးစီးဌာန ညွှန်ကြားရေးမှူးဒေါက်တာကေသီကျော်ကပြောပါတယ်။

ရန်ကုန်တိုင်းဒေသကြီး ကလေးသူငယ်အခွင့်အရေးများဆိုင်ရာကော်မတီကို ရန်ကုန်တိုင်းဒေသကြီးအစိုးရအဖွဲ့လူမှုရေးဝန်ကြီးက ဥက္ကဋ္ဌ အဖြစ်ဆောင်ရွက်နေပြီး တိုင်းဒေသကြီး၊ ခရိုင်၊ မြို့နယ်အလိုက် ကလေးသူငယ်အခွင့်အရေးများဆိုင်ရာ ကော်မတီဝင်များထားရှိကာ ဌာနဆိုင်ရာများ၊ ရန်ကုန်တိုင်းဒေသကြီးအမျိုးသမီးကော်မတီ၊ NGO/INGO တွေနဲ့ပူးပေါင်းပြီး ဆောင်ရွက်နေတယ်လို့သိရပါတယ်။ အခုလို တိုင်းဒေသကြီးအဆင့် ကလေးသူငယ်အခွင့်အရေးများဆိုင်ရာကော်မတီ လုပ်ငန်းညှိနှိုင်းအစည်းအဝေးမှတဆင့် ကလေးသူငယ်အခွင့်အရေးများနဲ့ ပတ်သက်ပြီးရှေ့ဆက်ရမယ့်လုပ်ငန်းတွေကို ဆွေးနွေးညှိနှိုင်းကြမှာဖြစ်တယ်လို့သိရပါတယ်။မြန်မာနိုင်ငံအနေနဲ့ သဘောတူစာချုပ်ပါပြဌာန်းချက်တွေကို အကောင်အထည်ဖော်ဆောင်ရွက်တဲ့အနေနဲ့ (၁၉၉၃) ခုနှစ်မှာ ကလေးသူငယ်ဥပဒေ၊ (၂၀၀၁)ခုနှစ်မှာ ကလေးသူငယ်နည်းဥပဒေကို ပြဌာန်းထားရှိခဲ့ပြီးဖြစ်တယ်လို့သိရပါတယ်။ တိုင်းဒေသကြီးအဆင့် ကလေးသူငယ်အခွင့်အရေးများဆိုင်ရာကော်မတီ လုပ်ငန်းညှိနှိုင်းအစည်းအဝေးကို ရန်ကုန်တိုင်းဒေသကြီး အစိုးရအဖွဲ့လူမှုရေးဝန်ကြီး ဦးနိုင်ငံလင်း၊ ဌာနဆိုင်ရာမှတာဝန်ရှိသူတွေနဲ့ NGO/INGO မှ တာဝန်ရှိသူတွေ တက်ရောက်ခဲ့ကြ ပါတယ်။

 

 

Related News