ပြည်တွင်းကုန်လမ်းသွားလာရေးအတွက် အဓိကအဝေးပြေးယာဉ်ရပ်နားစခန်းကြီး(၂)ခုဖြစ်တဲ့ ရန်ကုန်က အောင်မင်္ဂလာအဝေးပြေးယာဉ်ရပ်နားစခန်းနဲ့ (ဒဂုံ - ဧရာ) အဝေးပြေးယာဉ်ရပ်နားစခန်းတွေမှာ ကားဂိတ်နဲ့ ဆိုင်ခန်းများငှားရမ်းခ တစ်နှစ်ကျပ်သိန်း(၁၈၀၀)ကျော်ရရှိတယ်လို့ သိရပါတယ်။ ရန်ကုန်က အဝေးပြေးယာဉ်ရပ်နားစခန်းကြီး(၂)ခုဖြစ်တဲ့ အောင်မင်္ဂလာအဝေးပြေးယာဉ်ရပ်နားစခန်းနဲ့ ဒဂုံ - ဧရာအဝေးပြေးယာဉ်ရပ်နားစခန်းတွေကို ရန်ကုန်မြို့တော်စည်ပင်သာယာရေးကော်မတီက စီမံခန့်ခွဲနေပြီး ဒီစခန်း(၂)ခုက ရရှိလာတဲ့ အခွန်အခနဲ့အခန်းငှားရမ်းခတွေဟာလည်း ရန်ကုန်မြို့တော်စည်ပင်သာယာရေးကော်မတီရဲ့ ရငွေထဲပါဝင်တာဖြစ်ပါတယ်။ ဒီစခန်း(၂)ခုပေါင်း  ကားဂိတ်နဲ့ဆိုင်ခန်းတွေဖွင့်လှစ်နိုင်ဖို့အတွက်  အခန်းတွေဖွဲ့စည်းငှားရမ်းပေးထားပြီး အခန်းပေါင်း(၁၁၀၀)ကျော်ရှိတယ်လို့ သိရပါတယ်။ ဒီအခန်းပေါင်း(၁၁၀၀)ကျော်အတွက်   အခန်းငှားရမ်းခတွေအနေနဲ့ ဆိုင်ခန်းအကျယ်အဝန်းပေါ်မူတည်ပြီး တစ်ခန်းကို တစ်လကျပ်(၂၀၀၀)ကနေ အများဆုံးကျပ်(၇၀၀၀)ထိ သတ်မှတ်ကောက်ခံနေတယ်လို့ ရန်ကုန်မြို့တော်ဝန် ဦးမောင်မောင်စိုးကပြောပါတယ်။ ဒီစခန်း(၂)ခုရှိ ကားဂိတ်နဲ့ဆိုင်ခန်းများအားလုံးငှားရမ်းခအနေနဲ့ တစ်နှစ်ငွေကျပ်သိန်း (၁၈၀၀)ကျော် ရရှိတယ်လို့သိရပါတယ်။

အောင်မင်္ဂလာအဝေးပြေးယာဉ်ရပ်နားစခန်းနဲ့ ဒဂုံ - ဧရာ အဝေးပြေးယာဉ်ရပ်နားစခန်းတွေက ကားဂိတ်နဲ့ ဆိုင်ခန်းများငှားရမ်းခတွေဟာ လက်ရှိမှာ ပုဂ္ဂလိက ဆိုင်ခန်းငှားရမ်းခဈေးနှုန်းတွေနဲ့ နှိုင်းယှဉ်ရင် ပမာဏများစွာ ကွာခြားနေတာလည်း ဖြစ်ပါတယ်။ ဒီအခြေအနေတွေနဲ့ပတ်သက်လို့ ရန်ကုန်မြို့တော်စည်ပင် သာယာရေး ကော်မတီက ရရှိမယ့် ၀င်ငွေတွေကို သေချာလေ့လာစိစစ်ကောက်ခံမယ်ဆို ဒီထက်မက ပိုမိုရရှိနိုင်ကြောင်းကို တိုင်းဒေသကြီးလွှတ်တော်ကိုယ်စားလှယ် ဒေါ်အေးအေးမာက ဇူလိုင်လ(၁၁)ရက်က ပြုလုပ်ခဲ့တဲ့ ရန်ကုန်တိုင်းဒေသကြီးလွှတ်တော် နဝမပုံမှန်အစည်းအဝေး အကြံပြုတိုက်တွန်းခဲ့ပါသေးတယ်။

အခန်းငှားရမ်းခတွေကို အခန်းအကျယ်အဝန်းပေါ်မူတည်ကာ ဆိုင်လခနှုန်းထားတွေကို သတ်မှတ်ထားပြီး အောင်မင်္ဂလာအဝေးပြေးယာဉ်ရပ်နားစခန်းမှာတော့ ဆိုင်ခန်းပေါင်း(၆၀၀)ကျော်ရှိပြီး တစ်ခန်းကို (၁)လအနည်းဆုံးကျပ်(၂၀၀၀)ကနေ အများဆုံးကျပ်(၇၀၀၀)အထိ၊ ကားဂိတ်အခန်းပေါင်း(၂၆၀)နီးပါးရှိပြီး တစ်ခန်းကို (၁)လအနည်းဆုံးကျပ်(၃၀၀၀) အများဆုံးကျပ်(၇၀၀၀)အထိ ကောက်ခံနေတယ်လို့သိရပါတယ်။ အောင်မင်္ဂလာအဝေးပြေးယာဉ်ရပ်နားစခန်းရဲ့ ဆိုင်ခန်းနှင့်ကားဂိတ်အခန်းများငှားရမ်းခ တစ်နှစ်ဝင်ငွေမှာ ကျပ်သိန်း(၁၀၀၀)ကျော်ရရှိတယ်လို့သိရပါတယ်။ လှိုင်သာယာမြို့နယ်ရှိ ဒဂုံ - ဧရာ အဝေးပြေးယာဉ်ရပ်နားစခန်းမှာ ဆိုင်ခန်းပေါင်း(၂၀၀)ကျော်ရှိပြီး တစ်ခန်းကို (၁)လအနည်းဆုံးကျပ်(၃၀၀၀)ကနေ အများဆုံးကျပ်(၅၅၀၀)အထိ၊ ကားဂိတ်အခန်းပေါင်း(၈၀)ကျော်ရှိပြီး တစ်ခန်းကို (၁)လအနည်းဆုံးကျပ်(၅၅၀၀)နဲ့ ကောက်ခံနေတယ်လို့ သိရပါတယ်။ ဒဂုံ - ဧရာအဝေးပြေးယာဉ်ရပ်နားစခန်းမှာ ဆိုင်ခန်းနှင့်ကားဂိတ်အခန်းများငှားရမ်းခ တစ်နှစ်ဝင်ငွေမှာ ငွေကျပ်သိန်း(၇၈၀)ရှိတယ်လို့ သိရပါတယ်။

 

 

Related News